Удмуртлыкез утись кӧкы

Удмурт Дунне
By Удмурт Дунне Ноябрь 1, 2013 14:08

Удмуртлыкез утись кӧкы

Можга педколледжысь студентъёс1918-тӥ арын 4-тӥ ноябрь понна потэм «Гудыри» газетын ялон печатлазы: Елабуга городын усьтӥськиз удмурт дышетӥсьёсты дасянъя семинария. Со пумысен нимысьтыз кыӵе ке приказ туннэ шедьтэмын ӧвӧл. Но 4-тӥ ноябрез Можга педколледж лыдъя аслаз вордӥськем нуналэныз.

— Аръёс ӵоже ниммы кӧня ке пол вошъяськылӥз ни: семинариысь училище кариськимы, табере дано югдытӥсьмылэсь Трофим Борисовлэсь нимзэ нуллӥськомы, педколледж луиськомы, — вера педколледжлэн директорез Николай Пискунов. — Котьма ке но азямы пуктэм ужпумлэсь пичи но ӧм палэнске на — туннэ но удмурт кадръёсты дасяськомы. Куддыръя синкыли пыр но шуиськомы: дунне вылын ми гинэ начальной классъёслы удмурт дышетӥсьёсты поттӥськомы. Секыт ке но луиз, ми та данъяськоно ужлэсь отӥяз но ум куштӥське. Педколледж туж бадӟым кужымзэ понӥз асьме сям-йылолъёсты улӟытон, утён, историмес быдэс калыклы шараян понна. Ас вакытаз туж трос лэсьтӥз педколледжлэн азьвыл директорез Михаил Ильин. 1926-тӥ арын со дасяз кык уж: «Изучение Вотского края (План работы по этнографии)» но «Значение вотского языка и его красочность». Милям ик физикаен дышетӥсьмы Николай Матвеев 1940-тӥ аръёслэн кутсконазы физикая, арифметикая но алгебрая учебникъёсты удмуртэ берыктӥз. Озьы удмурт калыклэн луонлыкез кылдӥз шуг предметъёсты асьсэ кылынызы дышетыны. Туала дышетӥсьёсмы но бере уг кылё — азьланьто удмурт кыллы сӥзем выль методической пособиосты поттонэз, покчи классъёсын дышетскисьёслы учебникъёс дасяло. Мон ваньмыныз таин туж данъяськисько. Удмуртлыкез утись кӧкы шуысал асьмемыз.

— Николай Аркадьевич, удмурт кадръёсты дасяськоды, но удмурт школаосы ужаны кошко-а соос?

— Котькуд ар эскериськомы, кытчы интыясько милям выпускникъёсмы. Туэ 4 специальностья диплом басьтӥз 93 мурт. Соос пӧлысь 32-ез вылӥ тодон-валан басьтоно кариськиз на очно амалэн — дышетӥсьёс ик луозы. 44-ез уже интыяськиз ни. Таос пӧлысь 34-ез асьсэ удыссыя ик школае мынӥзы. Та туж шумпотымон шуыса лыдъясько. Педколледжын но асьме пиналъёсмы ик ужало.

— Озьыен, тӥ кадръёслы ёрмонэз уд адӟиське?

— Туннэ буш интыосмы ӧвӧл. Тазьы верало: выж миськисез гинэ но конкурс пыр кутӥсько. Педколледжлэн городын но, солэн сьӧраз но данэз туж бадӟым. Ми татын ужасьёсмес но, ужзэс но дунъяськом. Котькыӵе удысын мед бергалод, нырысь ик адямиез гажано. Студентъёсмылы но сыӵе мылкыд пыӵатӥськомы.

— Дышетӥсьёстылэн шоро-куспо арлыдзы — 44 арес. Азьланяз кадръёслы ёрмоды шуыса, кышканды вань-а?

— Туэ одӥгез пинал дышетӥсьмы, аспирант, школае кошкиз. Мугзэ шараяз: уждунэз отын бадӟымгес. Туэысен уго школаысь визьнодасьёслы тросгес тырыны кутскизы. Азьвыл училищеын котьку кӧнялы ке коть тросгес басьто вал. Табере озьы ӧвӧл. Соин ик кышканэ вань, егитъёс, коньдон сьӧры уйиськыса, пегӟозы шуыса. Но мукет ласянь учконо ке, малпасько: ужась котьку сюроз. Нылпиослы гинэ медам ёрме.

— Дорады дышетскыны мылкыд карисьёс сино-а?

— Туэ ми доры сюрон понна одӥг интые 2,5 мурт куриськиз. Мукет аръёсын ӵошатыса, та кӧнялы ке ӧжытгес. Азьвыл одӥг интые 4,5 мурт но куриське вал. Малпасько, югдур герӟаськемын нылпиос ӧжыт вордскемен. Собере, вузъёсын сомында интыос — ми доры лыктӥсь быре. Таин сэрен ми куинетӥ арзэ ум кутӥське ни 11-тӥ класс бере нылпиосты — дышетскисез ӧвӧл. 9-тӥ классэз йылпумъямъёсты гинэ на дорамы кутӥськомы.

Туэ колледже пыриз 119 мурт. 22-ез Можга городысь. Городысь тамында пинал дорамы ноку уг куриськы вал. Уноез дышетскисьёсмы Можга, Кизнер, Алнаш ёросъёсысь. Ӧжытгес Вавож но Грак районысь лыктэмъёс. Таос пӧлысь потозы школа азьын визьнодасьёс, начальной классъёсты дышетӥсьёс но крезьгурен дышетӥсьёс. Азьвыл физкультураен, историен, англи кылын дышетӥсьёсты, социальной педагогъёсты но дасяськом вал. Но куд-ог предметъёсты дышетыны ӧз лэзе ни, мукетъёсаз лыктӥсь быриз.

— Нылпиос туала арын тодон-валанзыя лябесьгес, шуо…

— Котькытын сямен ик али озьы. Но талэсь но золгес шугъяськытэ мукетыз. Ог дас ар талэсь азьвыл шумпотыны луэ вал: студентъёсмы пӧлысь 25-30 процентэз — со дышетӥсьёслэн нылпиоссы, выжызылэсь удыссэс азинтӥсьёс. Туэ сыӵеос воксё но 7-8 процент гинэ на. Дышетӥсьёс нылпиоссэс соку ик вылӥ тодон-валан басьтыны ысто, лэся. Асьсэос ик пусъё ке но: визьнодась усто пӧрме, со нырысь педколледжез, собере вузэз быдтэ ке.
70-75 процентэз нылпиосмы начар семьяосысь. Тодон-валанзы ляб ӧвӧл, но вузэ пырыны но отын визь люканы соос уг быгато одӥг муген: бадӟым городын тросгес коньдон кулэ. Можгаын та ласянь капчигес, соин ик дорамы лыкто. Таос толэзьлы быдэ 750 манет социальной стипендия басьто. Усто дышетскисьёсыз 531 манет тыр академическойзэ но окто на. Вань кулэяськисьёсты общежитиямы интыяськомы.

— Оптимизациен валче республикаысьтымы куд-ог училищеосты огазеязы. Педколледжез но кыӵе ке технической тодон-валан сётӥсь училищеен одӥг липет улэ каръяны туртто вал кадь.

— Милемыз туннэ уг йӧтыло, но шуо: озьы луыны быгатоз. Кинэн огазеяны уг тодо, дыр. Школаос ёрмо дышетӥсьёслы. Вузъёсты йылпумъям специалистъёс гуртэ уг мыно ни. Нош милям выпускникъёсмы школаосы берытско на. Соин ик вылӥ кивалтӥсьёс валало: педколледжез ворсад яке мукет ӧре выжтӥд ке, быдэс дышетон удыс ужасьёстэк кылёз.

Зэм, практической тодон-валан сётонъя училищеен огазеянлэн одӥг умой палыз вань. Вуз каронъя, лэсьтӥськонъя училищеос ноку но куанер ӧз улэ — асьсэлы уксё поттыны быгатылӥзы, созэ я тазэ лэсьтыса. Педучилищеос али но, азьло но куанересь вал. Ми уго кружокъёс но спортъя секциос гинэ усьтыны быгатӥськомы. Отысь пайда уд потты. Мон кыӵе ке училищеен огазеяськыны туннэ пумит.

Нялтас вераса, колледжамы 40 ар ужаз студентъёслэн духовой оркестрзы. Но кивалтӥсез Иван Максимов пенсие потэмен, туннэ сое воштӥсь нокызьы но уг шедьтӥськы. Таин валче кружок гуньдэмын ай. Сюлэмы туж висе.
Коньдонмы уг тырмы шуыса, мон гинэ уг бӧрдӥськы — вань педучилищеос огкадь югдуре вуэмын. Та пумысен учредительмылы — Дышетонъя но наукая министерстволы — огпол гинэ ӧм вазиське ни, милемлы саклык бадӟымгес мед висъялозы шуыса. Валало но кадь сое, но со кыл вылын гинэ кыле. Юрттэмзэс ум шӧдӥське. 18 ар колледжен кивалтӥсько ни. Та аръёс ӵоже весь ужпум ӝутӥсько, юртмы 1925-тӥ арын пуктэмын ни, сое одно ик тупатъяно шуыса. Ми асьмеос уксё поттыны ум быгатӥське ук. Быгатысалмы ке, оло, маке со лэсьтысалмы ни. Уката ик та быдӟа юбилеймы азьын. Пусъёмы сое 6-тӥ декабре. Но юртмы туэ но республикалэн тупатъян ужъёсъя планаз пыртэмын ӧвӧл.

— Коллективады тросгес нылкышноос. Соосын кивалтыны капчи-а яке куараез но будэтоно луэ?

— Котькыӵе мукет ужын кадь ик, котькыӵе вакытъёс луо: умоез но, аламаез но. Но мон кивалтонлэсь шорзэ котьку утчаны вырисько: мултэс вӧсь но медам кары, медаз но лябӟе. Быгатэ ке дышетӥсь ужаны, быгатэ ке студент дышетскыны, сое одно ик пусйисько. Адями мед шӧдоз: сое адӟо, со понна висё, татын котькудӥз сярысь сюлмасько.

Елена Сараматова
Туспуктӥз Владимир Беломорских

Удмурт Дунне
By Удмурт Дунне Ноябрь 1, 2013 14:08