Вож синъёс

Удмурт Дунне
By Удмурт Дунне Октябрь 21, 2013 12:03

Вож синъёс

57Мон — егит пӧйшурась. Амалы луысал ке, сикысь ӧй но потасал. Тани туннэ но мон кыдёкысен учкыса сылӥ дукъяосты. Кӧня ке пол ыби нурканъёсты, ӧй йӧтты. Машинаме кельтӥ вал бырем гурт пуме, кыдёкын ӧвӧл со. Пеймыт луытозь, дыр вал на, соин ик малпай та куштэм гурт бервылтӥ котырскыны. Тани черклэн йылыз адӟиськиз, липетэз куашкам ни, киросъёсыз сисьмыса усемын музъем вылэ. Котыраз будо ни писпуос. Кыдёкын ик ӧвӧл шай, но пушказ пырыны уг луы, сыӵе ӝужыт пушнер будэ. Малпалод, соос шайвыл возьмасьёс интыын татын сыло. Йыр вадьсам ик ыгы куаретӥз. Малпамтэ шорысь писпуос ӵашетыны кутскизы. Нош али гинэ чал-чал вал, табере векчи зор усьылыны ӧдъяз. Машина доры вуытозям, жаль-жаль кисьтыны кутскиз. Машинаме интыысьтыз вырӟытыны ӧй быгаты. Кӧня курадӟи — машинае воксё гуньдӥз. Гужем уй вакчи, малпай, машинаям ик кӧлыны выдо. Но умме усьыны ӧй быгаты.

Зор дугдӥз ке но, куазь сыӵе ик пеймыт. Котырак чалмыт. Шӧдтэк шорысь кызъёс вискытӥ тыл адӟиськиз. Мон югыт пала вамыштӥ. Корка доры вуыкум, валай: музъем кӧс, татын шапык но зорымтэ. Соку ик пырыны кышкай, малы ке шуоно кылӥськиз ӵашетэм куара, воргорон но нылкышно керето. Мӧйы пиосмурт шуэ: «Калыкъёс ӧз воштӥське, тырмоз анаедлэн курадӟеменыз но. Тодад возь, берен берытскемед уз луы. Мын, усьты, кин ке кынмыса сылэ ӧс сьӧрын». Со куспын ӧс усьтӥськиз, адӟиськиз зӧк, лапег мугоро воргорон, солэн синъёсыз но нырыз кучыранлэн кадь потӥзы мыным.

— Пыр, витьымтэ куно, — шуиз со кызйыса. Воргорон вӧзтӥм ӝог ортчиз но ышиз пеймытэ.

— Мар витиськод, пыр, — чортӥз кышномурт куара.

Пыри. Корка пушкын чылк-чылк, шуныт. Шораз котырес ӝӧк сылэ. Лампа уг адӟиськы, но сыӵе небыт, югыт тыл пиштэ кадь. Ӝӧк дорын сылэ ог 25 аресъем нылаш, кузь йырсиез пеймыт, ачиз чебер. Синъёсыз шоры учкыса, валано — визьмо. Кыӵе ке бордаз кыскись кужымез вань на. Чиньыяз мудрон зундэс — вож синъёсын кионлэн тусыз пуктэмын.

— Ойдо ӝӧк сьӧры, кӧтыд сюма ни, дыр, — мыньпотыса ӧтиз нылаш.

Мынам зэм но кӧт чутыръя ни вал. Сиськеммы бере юаны малпай, кышкыт ӧвӧл-а солы таӵе интыын улыны. Но ымме усьтыса ӧй вуы, нылаш шуэ ни:

— Кышкыт. Мон ведь кышномурт. Но мынам татын уже вань на, соин ик вуылӥсько. — Нылаш шорам сыӵе учкиз, синъёсыз вож тылын ӝуаны ӧдъязы кадь. — Мадё мон тыныд одӥг учыр сярысь. Куке но та гуртын вылэм асьсэлэн школазы, адямиос ужазы фермаын, будэтӥзы бакча сиён, кизьылӥзы чабей но йыды. Озьы ик вал клубзы, почтазы, больницазы. Гурт пумын улӥз лесник, ог куамын аресъем, ӝужыт мугоро, бабыля йырсиё пиосмурт. Туж чебер. Тросэз нылъёс синмаськемын вал солы. Нош со нокинэ ӧз висъя, ваньмыныз одӥг кадь серекъяз, эшъяськиз, умой мадиськись вал. Юртъерзэ зол-зол возиз, трос пудо вордӥз. Огназ вутскылӥз ваньзэ лэсьтыны.

Одӥг пол тулыс сикысь со шедьтӥз лябомем кионпиез. Та пӧйшуръёс трос ик ӧй вал тапалан. Дораз вайиз. Гурт калык шуиз: «Уродлы со, кионэз гуртэ вайыны уг яра». Серекъяса лесник вералляз: «Кион ӧвӧл со». Утялтӥз, будэтӥз. Калык но дышиз. арлэсь ятыр возиз лесник кионпизэ. Пӧйшур ваньмыз доры мынэ ни вал. Но токма уг верало вылэм: котькӧня кионэз сюд, со ялан сик пала учке. Кошкиз таиз но. Отчы, кытчы сое ялан сюлэмыз кыскиз.

Ортчиз кӧня ке ар, вунэтӥзы ни гуртоос кион сярысь. Огнуналэ лесник бертэ вал сикысь. Толалтэ, кезьыт. Йӧвылэсултон азьын. Лымы пушкысь коркаос но уг адӟисько кадь, сомында пелляз-люказ тӧдьы мамыкез. Нюлэсчилэн тодаз лыктӥз мукет егерьлэн верамез, асьме палан, пе, быдэс уллёен ветло кионъёс. Соку кылэм-адӟем ӧз кары. Али шыпыт тэлез кылзыны кутскиз. Пересьмыны кутскем валэз гань-гань вамышъя.

Шӧдтэк шорысь потӥзы кионъёс. Нюлэсчи нырысь ӧз оскы на ай, со кионъёс шуыса. Сыло гурезь йылын, мышказы пиштэ пуксьыны дасяськем шунды. Кышкыт адӟиське. Куазь кезьыт ке но, лесниклэн ымнырыз кузя пӧсям ву васькыны ӧдъяз. Оло, 20 пала вал кионъёс, кык толэзьем кунян быдӟаесь.

Вал, кышкытлыкез шӧдыса, султӥз кык пыд вылаз но шузимыса ворттыны ӧдъяз. Сьӧсьёс сое гинэ витизы, лэся, омырскыса ик гурезь йылысь васькыны кутскизы. Котыртыны туртто гуртэ нуись сюресэз. Тани гуртысь ӵынъёс адӟисько ни. Мынэ кӧшкемыт пӧйшуран, адями вылэ пӧйшуран. Пиосмурт биньгозызэ куштӥз, вал сюресэз ачиз тодэ ни шуыса. Кутӥз карабинзэ, нош патронэз кык сяна ӧвӧл. Улонын ваньмыз мукет сямен луэ, киноын кадь ӧвӧл: ыбиз, одӥгезлы но ӧз йӧтты, кионъёс озьы ик уйисько сьӧраз. Вал жадиз. Сьӧсьёс сюресэз пытсазы. Вал дугдӥз но сыӵе учкиз кузёез шоры, синмысьтыз синвуос вияло. Кионъёс оп! шуытозь вал вылэ тэтчизы но син куспын кесязы. Тӧдь-тӧдь лымы вылын горд-горд вир бервыл гинэ кылиз. Дӧдьы вылэ лесник доры одӥгез мумы кион тэтчиз. Лесник валаз, сое виыны тазэ кионэз бырйиллям шуыса. Пуртсэ поттыны ӧз вуы, сьӧсь вылаз тэтчиз, погыртӥз но соку ик чырты бордаз вуиз.

Кион бадӟым ымзэ усьтӥз но сылэ лесниклэн мӧля вылаз, малпалод, маке но верамез потэ шуыса. Та зын туж тодмо, номырин сурантэм… Кионлэн йырыз поромиз, лэся. Пуксиз пуны сямен но шумпотыса учке лесник шоры. Бен, самой утем кионпиез вал со. Сьӧсьлэн тодаз лыктӥз, луоз, кызьы сое утялтӥзы, будэтӥзы. Кионъёс номыре но уг вунэто. Пӧйшур нюлыштӥз пиосмуртлэсь бамзэ. Шуиз кадь: эн кышка. Пӧйшур келяз лесникез гурт дорозь ик, бӧрысь уллёяз кошкиз.

Со учыр бере кионъёс гурт котырысь кошкизы. Но вуиз нылаш, ку но кытысь, нокин уг тоды. Сыӵе чебер но визьмо вал со, кузь сьӧд йырсиё, кызь вить аресъем, мугорыз вӧлэм кадь веськрес. Гуртысь егит пияшъёс сьӧраз быж сямен ветлыны кутскизы. Нылаш шоразы ӧз но учкылы. Нылмурт синмаськемын вал лесниклы. Воргоронлэсь кынмем сюлэмзэ со вырӟытӥз. Оло, нюлэсчи но витьыса улӥз, возьмаз та яратонзэ. Егитъёс сюан ортчытӥзы. Пиосмуртлы кышноен удалтӥз. Бакчаын ваньмыз будэ. Тылобурдоос мусокай нылкышнолы кырӟанъёссэс кузьмало. Пудо бусые лэземын, но кыдёке уг кошкы. Сисько, кӧтсы тыре ке, асьсэос берто. Лесник вунэтӥз ни сиён пӧран сярысь но, кышноез сое ческыт сюдэ. Выль кенэз гуртын яратӥзы, калыкен туж каньыл вераськылӥз, маин быгатӥз — юрттылӥз уго. Но куд-огез, мышкыз ышыса но уг вуы, сое ведӥн шуылӥзы. Арлы быдэ губи но уг лу, емыш но. Нош та нылкышно сикысь ноку но тырттэм ӧз бертылы.

Туж тупаса улӥзы кузпалъёс. Вордӥськиз пичи нылзы, быдэсак бубиз кадь. Шумпотонзы кема ӧз кыстӥськы. Вазь тулыс сяськаос ӝужаны кутскон дыръя лесник ышиз. Утчаса ни шедьтӥзы сикысь, кыдёкын ик вылымтэ гуртлэсь. Синъёсыз инбаме учко. Мышкытӥз сое ыбиллям. Пуля пырак сюлмаз шедем.

Лесниклэсь кулэмзэ тодыса, ваньмыз бӧрдо, быдэс гурт жаля. Кышноез ӧз, ӧз бӧрды, кӧсэктӥз но усиз яратонэзлэн йыр дораз, озьы кыллиз, кулэм мурт кадь. Ватыку каллен гинэ вузӥз, нылызлэсь йырзэ маялляса.
Лесникез ватӥзы. Буре вайыса сябась каризы но кошкизы гуртъёссы пала. Зол куректӥз кышноез, уй куспын пересьмиз, сьӧд-чилясь йырсиез лымы кадь луиз. «Зӥбиз сое куректон, быриз чеберез», — вераськизы гуртын.
Ӵуказеяз гуртэ вуизы кионъёс, вузыса ветлӥзы уйёсы. Пуныос но ӧз утэ ни, калык коркасьтыз потаны ӧз дӥсьтылы. Маке но уродзэ витьыны кутскиз. Сизьым уй тырмон нуналэ быдэс гурт ӝуаз, кылизы ульчалэн пумысьтыз кыкнапалаз пуксем коркаос гинэ. Собере зол сильтӧл потӥз. Корка бервылъёсысь кылем пенез тӧлъя-буръя нуиз. Озьы кинлэн ке но нюлэсчиез вӧсь каремез, вожъяськемез бырон калэ вуттӥз быдэс гуртэз. Ӵуказеяз зорыны ӧдъяз, собере син куспын кадь быдэс гуртэз жуг-жаг но пушнер басьтӥз. Нокин но татчы корка пуктыны мылкыд ӧз кар ни.

Со учыр бере лесниклэн кышноез но нылыз ышизы. Вераллязы, лапег мугоро воргоронэз адӟылӥллям, со ик сьќраз нуэм, дыр. Лесниклэн 40 уяз кӧня ке кышноос шайвылэ мынӥзы. Но ӧз вуэ, интыязы бурмизы кадь. Лесниклэн шайгу вылаз кылле кулэм мумы кион. Котырысьтыз лобаса, бубылиос сямен, тӧдьыалэс тылсиос вылӥе ӝутӥськизы. Берло гинэ кышноос валатскизы, кионлэн гонэз тӧдьы луыны кулэ ӧвӧл шуыса. Кышкатскыса кошкизы отысь. Ӝытазе калык кин саникен, кин лопатаен мынӥзы шайгу вылэ. Отысь нокинэ но ӧз шедьтэ. Бӧрысь татчы нокинэ ӧз ни ватылэ, шайвылэз басьтӥз жуг-жаг. Паймоно кадь: нош лесниклэн гу вылаз быдэс гужем сылӥзы сяськаос.

Тапала нош ик вуиз кион. Чебер сьӧд гоно, бадӟым мугоро кион, синъёсыз изумруд кадесь…

Мон каллен гинэ сайкай — котырак нюлэс. Оло уйвӧт вал со, оло ишан. Котырак утчаськи — коркалэн бервылыз но ӧвӧл, тодмо нылаш но уг адскы. Сисьмыны кутскем бадӟым лӥял вылысь адӟи бышкалтэм бадӟым пуртэз. Солэн кутонэз лэсьтэмын кион йыр выллем, нош пӧйшурлэн синъёсыз интыын кык вож изъёс чиляло. Туж тодмо синъёс.

Галина Эшова
Суредаз Вера Штыкова

Удмурт Дунне
By Удмурт Дунне Октябрь 21, 2013 12:03