Мурӝолын палэзян…

Удмурт Дунне
By Удмурт Дунне Октябрь 22, 2013 17:07

Мурӝолын палэзян…

Туала удмурт крезьгурлы сӥзем «Калленом» фестиваль туэ кыкетӥзэ радъяськиз.Со «Палэзян» калыккуспо ужрадлэн афтэпатиез (уй позыръяськонэз) луоз, шуэмын вал. Таиз ласянь трос юанъёс кылдо. Валтӥсез таӵе: пӧрмиз-а, ӧз-а одӥг ӝыт ӵоже кык пӧртэм крезьгуро культураосты огазеяны?

Мурӝолысь потэм Богдан утыр кузьмаз выль кырӟан

Мурӝолысь потэм Богдан утыр кузьмаз выль кырӟан

15-тӥ коньывуонэ «Бар веселых историй» клубын выль удмурт кырӟасьёсты кылзыны луиз. «Берекет» группалэн рэп-дуннеез, Катя Кенӟалилэн лӧпкытӥсь кырӟанъёсыз, Мускоысь юромо фестивале лыктэм Наталия Дзыгалэн вашкала сюан гуръёсыз, Ксения Евсеевалэн Personal Ashalchi диско-хаус шӧмо проектэз. Татын калык нырысьсэ улэпкын кылӥз Шарканысь Павел Эльлэсь Богдан Анфиногеновлы лэсьтэм трекъёссэ. Азьло Ullapalla Boy тодмо кырӟанъёсты удмурт кылэ выжтэ вал ке, творчествозэ авторской правоосын йырин уретӥзы. Табере азямы выль ним — Мурӝол Underground! Татын но Богдан этнофутуризм ӧрын ужа, калыкез тэтчатэ. Наталия Дзыга — Мускоын улӥсь удмурт нылкышно. Чебер фамилиез украин картэзлэсь сюрем. Шаертӥмы удмурт фольклорез эскеронъя экспедициосы ветлӥз, гуртъёстӥ гуръёс бичаз, нош табере Shoodja-Choodja проектын кырӟа но Мускоын радъяськись курсъёсын удмурт кылэз дышетэ. Тӥни кыӵе паймымон адямиос люкаськемын!

Та фестивальлэсь сямзэ радъясьёсыз «гань-гань» кылын пусъё. Удмуртъёслэн улонзы, сямзы кадь ик, шыпыт, дӥсьтӥсьтэм, каллен но огсыр. Но туала Ижкар шоры учкид ке, озьы уд шуы ни. Паймод удмуртлыклэн узырезлы. «Калленом» фестивалья сое валаны луэ.

«Палэзян» фестивале мукет шаеръёсысь лыктэм куноосмылы удмурт крезьгуро культурамылэн пӧртэм палъёсыз возьматэмын вал. Нош соослы ӧз тырме асьсэ калыкъёссылэн шудонъёссы-эктонъёссы. Соин ик та кык ужрадъёсты нимаз лэсьтыны кулэ вал, дыр. Позыръяськон дыръя мукет калыкъёслэсь кырӟанъёссэс пыртылыны луысал. Огпол диджейёс эстон эктонэз пуктӥзы ик, нош пор нылъёс етӥзэсь бере, туж куризы пор крезьгур. Потэмъя гинэ улон ӧвӧл. Таин сэрен куноослэн мылкыдзы пуксемынгес вал, удмурт бальзам но ӧз юртты ни: султӥзы но кошкизы. Асьме узырлыкенымы ушъяським, нош мукет калыкъёслэн шыкысысьтызы емышъёссэ лыдэ ӧм басьтэ… «Калленом» «Палэзян» фестивальлэн люкетэз вал ке но, мурт шӧмо потӥз.

Кӧня адями, сомында ик малпан но. «Калленомын» концерт бере огшоры oV_cz4m-4GAпозыръяськон кутскиз. «Палэзясьёс» шуак ышизы. Удмурт трекъёс шудыку, кытын ке пеймыт сэрегын эктӥзы барын ужась удмурт кышноос — выж миськисьёс.

Ӝытлэн пумаз, тэтчаса жадьыса, сцена вылэ пукси. Вӧзам эше интыяськиз, мар ке мӧзмыт, пе: пичи но уг кельшы та крезьгур, кытын этно? Ужрад бырем бере огъяулонни пала вамыштӥм. Табере мукет эшелэсь юасько ини: кельшиз-а? Со шуэ: «Мон одӥг дышемъя улӥсько: луонлыкед вань ке, шулдыръяськы. Туж кельшиз».

Мария Векшина

Удмурт Дунне
By Удмурт Дунне Октябрь 22, 2013 17:07