Сюбег, лазег — лул-сюлэмо

Удмурт Дунне
By Удмурт Дунне Сентябрь 17, 2013 11:12

Сюбег, лазег — лул-сюлэмо

Л. Фёдорова

Л. Фёдорова

Нылкышно но воргорон мертэтъёс пӧртэмесь

Любовь Фёдорова тодосчилы 55 арес тырмиз. Туэ литературоведэз Ашальчи Оки нимо премиен пусйизы. Нылкышнолэн литератураын интыез, удмурт нылкышно лирикалэн аспӧртэмлыкъёсыз, пусъёсыз сярысь вераським.

— Любовь Петровна, ма бордысен мытӥды чеберлыко текстэн ужандэс?

— 20-тӥ даурлэн шорысьтыз гожъяськисьёс бордазы кыскизы: Т. Архипов, Г. Красильников, Р. Валишин. Тунсыкъяськи, кызьы вордске чеберлыко текст, кыӵеесь авторъёслэн черновикъёссы. Ужай архивъёсын, библиотекаосын, бугыръяськи блокнотъёсын. Та удыс нимаське текстология. Студентъёсын учкимы-чакламы, кызьы вордске, быгыльме текст. Эскерыны малпам Т. Архиповез, но, жаляса верано, рукописьёсыз музее сётэмын ӧй вал (ӵыжы-выжыосыз доры лыктыса, шкафысьтыз поттыса, ужаны умой ӧз поты). Г. Красильниковлэн гинэ киын гожтэм фондэз рос-прос утялтэмын. Асьмелэн авторъёслэсь рукописьёссэс чаклан культурамы ӧвӧл. Малпаськом: малы кулэ на черновикъёс? Нош литератураез эскерисьёслы соос одно кулэ: возьмато, мае верамез потэ вал авторлэн, мае со гожтыны ӧз дӥсьты, мае воштӥз. Текстология возьматэ писательлэсь азинскемзэ: мар малпа но мае поттэ.

— Кызьы кутскиды нылкышно кылбурет борды?

— Нылкышно литературае вуи 1997-тӥ арын. Соку стажировкае Хельсинки университетэ ветлӥ. Тодматски пӧртэм научной эскеронъёсын: тросэз сӥземын вал нылкышно литератураез эскеронлы. Асьмелэн таӵе изданиос трос ӧй вал. Соосты лыдэ басьтыса, научной тунсыкъяськонэ воштӥськиз. Нылкышно но воргорон учконын уно гинэ пӧртэмлыкъёс вылӥллям. Западын вань феминист литературной критика, со нылкышно гожъяськисьёсты гинэ эскере. Нош гендерной теория эскере нылкышнолыкез но воргоронлыкез быдэс литератураын. Мар пӧртэмлыкез? Кызьы возьматэ, шуом, кышномурт нылкышно образэз? Кызьы сое суреда воргорон? Нырысетӥ эскеронэ сӥземын вал Ашальчи Окилэн но Кузебай Гердлэн кылбуретазы нылкышноез суреданлы.

Берло 20-тӥ даурысь нылкышно гожъяськисьёсты эскерыны малпанэ кылдӥз. Та удыс воксё эскерымтэ уд шуы. А. Зуева но, В. Шибанов но, А. Ермолаев но, В. Ванюшев но чаклаллязы. Соос эскеризы нимаз вакытъёсты, нош мон пумен эскери, кызьы вошъяськиз нылкышно литература 20-тӥ даур ӵоже. Студентъёслы спецкурс нуи, нош соослы дышетскон книга кулэ — озьы «Удмурт нылкышно кылбуретлэн тулкымъёсыз» (2007) учебник кылдӥз.

Шуо, нылкышно но воргорон лирика уг висъяськы. Спецкурсам пи студентъёс но уг валало, малы нылкышно кылбуретэз нимаз кариськом. Мон уг шуиськы: нылкышно умойгес-а яке уродгес-а гожъяське…

Котьма ке но: нылкышно шӧдэ сюлмын. Солэн гожъямез эмоционально-экспрессивнойгес луэ. Висъяське кыл узырлыкез но, темаез но, туж умой шӧдӥське нылкышнолэн воштӥськемез. Дышетскисьёсыным частотной словарь гожтӥмы: кыӵе кылъёс ӵемгес пумисько. Озьы эскерим А. Окиез, Л. Кутяноваез, Т. Черноваез, Л. Тихоноваез. Кыл дуннезы герӟаськемын сюлэмен.

Туж потэ нылкышно гожъясьёслэсь частотной кыллюкамзэс нимаз поттэме.

— Удмурт кылын род пусъемын ӧвӧл ук…

— Туж тунсыко, А. Окилэсь кылбуръёссэ воргорон нимын но берыкъяло шуыса. Туала мурт уг вала, кызьы воргоронэз ӵошатыны луэ возь вылысь сяськаен, кенӟалиен… Мукет культураысь калык, берыктӥсь мукет сямен адӟе нылкышно но воргорон чеберез. «Идеал женственности в поэзии Ашальчи Оки» статьяям та юанэз эскери.

— Нылкышнолэсь гожъямъёссэ нылкышно ик берыктыны кулэ-а?

— Одно ик ӧвӧл. Воргоронъёслэн но пӧрме. Тани К. Герд ик тужгес но ӟеч Окиез берыктӥз. Нош Ф. Васильевлэсь яратон лириказэ, мон малпамъя, тужгес но усто берыктӥз Т. Кузовлева. Куддыр мон студентъёсылы тодмотэм кылбуръёсты сётӥсько: мед авторзэ валалозы. Н. Байтеряковез ӵемысь нылкышно кылбурчи кожало. Йылпумъянъёс лэсьтыны луэ: маиныз ке со нылкышно сюлэмлы матын.

— Асьме нылкышно литература маин висъяське?

— Али выль спецкурс дасяй: «Женское творчество в финно-угорских литературах: сравнительно-типологический аспект». Магистрантъёслы лыдӟисько. Висъяське тани маин: туж кужмо луэ нылкышно лирикамы.

— Эстониысь писатель Арво Валтон но тае пусйиз. Удмурт поэтессаос — кужмо лирикъёс, шуиз.

— Коми литератураын золэсь нылкышно прозаикъёс. Кылсярысь, Елена Габова. Нош мордва литератураын кужмо драматургия. Валентина Мишанина висъяське. Коми-пермякъёслэн (таосыз асьмелы матынгес) туж зол философской лириказы.

Удмуртъёслэн яратон лирика пушъемын. Туж тунсыко мыным потӥз на: ӧжытгес нылкышно гожъяськисьёс пор литератураын, лыдзыя но, бергес но вуэмын литературае. Огъя лыдӟыса-учкыса, малпаськоно: малы милям йыгмытгес лирической ӧр, нош комиослэн — эпической? Коми тодосчиосын кенешыса, таӵе малпанэ вуи: со герӟаськемын фольклорен. Асьмелэн ӧвӧл эпической кырӟанъёсмы. Мукетыз муг: комиос пӧлын туж кужмо философъёс кылдэмын — Каллистрат Жаков но Питирим Сорокин. Со герӟаськемын, дыр, уйпалан улонэн, куке адями пӧйшуран висказ малпаськиз, нюлэскытӥ ветлӥз.

Асьме адями музъем уж борды вазьгес кутскемын. Музъем уж — со ини огазьын уж. Асьме гожъяськонын нылкышно проза азинскыны кутске берло аръёсы. Трос гожъя Галина Романова, но малы ке прозаез палэнэ кошке, сое кылбурчиез сямен тодо. Проза сяськаяны кутске 1990-тӥ аръёсы. Вуоно книгае удмурт нылкышно прозалы сӥземын луоз: Р. Игнатьева, Г. Романова, пӧртэм автобиографической произведениос. Пыртыны турттӥсько выль нимъёсты, кудъёсыз асьмелэн кызьы ке палэнэ кылемын. Вал сыӵе гожъяськись — ӟучомем удмурт Фаина Метелёва. Со татчыозь ноку эскеремын ӧй вал на, но удмурт прозаын солэн аслаз интыез. Вань уго нылкышно но воргорон мертэтъёс. Нылкышнолэн дунне адӟонэз суредаське семья пыр, яратон пыр. Соин ик 20-тӥ дауре кышномуртъёсты янгыше уськытӥзы «сюбег, лазег гожъяськемзы» понна. Кылсярысь, Ашальчи Окиез, Степанида Ивановаез.

Выль книгаям туала авторъёсты но одно ик пырто: кылсярысь, Елена Миннигараеваез, «Мумы» повестеныз. Л. Нянькина выжиз поэзие. Шумпотӥсько Р. Игнатьева понна — сое трос лыдӟо. Вань будӥсь кужымъёс. Витисько Ольга Трониналэсь кылбуръёссэ. Али гожъясько кӧня ке поколениос. Нимаз вераны кулэ Муш Нади сярысь. Солэн ужез пӧртэм ӧръёсъя мынэ. Берыктон ужез туж юрттэ удмурт литератураез эстонъёс доры вуттыны, эстонзэ — удмуртъёс доры. Эстон шӧм шӧдӥське гожъямъёсаз. Чуръёсаз вордӥське гражданской лирика. Аспӧртэмлыкоесь Л. Орехова но Л. Марданова. Азьло котькуд кыл мед жингыртоз, интыяз мед луоз, мед вольыт пуксёз вал. Али егитъёс кылын шудо.

— Посо кылэз…

— Бергато, пуштроссэ усьтыны туртто. Со удмуртъёс пӧлын гинэ алямын ӧвӧл. Кызьы ми дӥськутлэсь акыльтӥськом, озьы ик литератураысь дышем кабъёслэсь но. Кин ке талы пумит луэ. Егитъёс гожъясько. Литература уг сылы. Кылбур шедьтэ ке лыдӟисьсэ, со умой.

— Биографиен герӟаськем прозалы саклык будӥз. Августа Конюховалэн «Шудтэм шуд» тодэ ваёнъёсыз туж зол бугырто.

— Дуннеын тенденция таӵе: нылкышноос тужгес но ӵем гожъясько лирика но автобиография жанрын. Удмурт литература но пӧртэм ӧвӧл. А. Конюховалэн, мон шуысал, тодэ ваёнъёсыз матынгес воргорон учкемлы — улонэз уж пыр возьматэмын. Эмоциосты аръёс волято, шуо. Тани Г. Романова тужгес мур пытьы кельтэм тодэ ваёнъёссэ суреда, М. Пушина-Благининалэн тодэ ваёнъёсыз эпатажноесь, паймытыны выро. А. Конюхова кутске «ми» шуыса, мукетъёсыз нош ӵемгес «мон» шуо. А. Конюховалэн, быдэсак советской нылкышнолэн, нырысетӥ интыын — уж. Нылкышнолэсь нош тросгес возьмало семья сярысь сюлмаськемзэ, пиналъёсын утиськемзэ.

Малы милям сыӵе бер кылдӥз выжыкыл жанр? Асьмелэн Лия Малых гинэ тодмо выжыкылчи луиз. Г. Верещагин малы воргоронъёсты гинэ информантэ басьтӥз? Трос эскерымтэ юанъёс…

Татьяна Чернова
Туспуктӥз Владимир Беломорских

Удмурт Дунне
By Удмурт Дунне Сентябрь 17, 2013 11:12