Сюанзы курыт ӧй вал

Удмурт Дунне
By Удмурт Дунне Сентябрь 3, 2013 13:52

Сюанзы курыт ӧй вал

Казахъёслэн яратоно сиёнзы - бешбармак

Казахъёслэн яратоно сиёнзы — бешбармак

Удмуртъёс сюан ортчыто, выль ӵыжы-выжыос ог-огенызы мед тодматскозы шуыса. Казахъёс — нылэз келян но кенэз пумитан понна.

Казахстанлэн пӧртэм интыосаз улӥсьёслэн сюан ортчытон сям-йылолъёссы висъясько, но вашкала сэбедъёсты татын юн чаклало. Западно-Казахстанской областьлэн шоркараз — Россилэн кунгож дорысеныз ог 30 иськеме интыяськем Уральскын (казахъёс сямен Орал) — выль кен понна калым уг куро. Лымшор казахъёслэн сыӵе сямзы уйпалъёслы, пе, паласькемын ӧвӧл. Соин ик Уральск котырын нылэз курало гинэ, пилэн бӧлякъёсыз кен луонзылы соку пеллюгыос быртто.

Даурен (нимыз «даур» кылэз возьматэ) эмеспи но Гаухар («бриллиант» кыллэсь) выль кен — кыкназы но Уральскысь. Дауренлы бызьыны малпаса, Казахстанлэн шоркараз, Астанаын, улӥсь Гаухар берытскиз вордскем городаз. Егитъёс улозы Дауренлэн песянаез дӥньын. Угось пияшез воксё пичи дыръяз будэтыны сётӥзы огназы кылем песянай-песятаезлы. Казахъёс пӧлын возиське ай, пе, вашкала сям: ваньмыз пиналъёс дорысьтызы кошко ке, огзэ пизэс сёто анай-атайзылы, со ик бӧрысь учке ини пересьёсты.

Сюанлэн нырысетӥ нуналаз юмшало ныл дӥньын. Ресторанэ люкасько ныллэн матысьёсыз гинэ, эмеспи лыктэ чылкак 3 сюанчиосын — соос но одно ик воргоронъёс луыны кулэ. Озьы ортче ныл йырын люкиськон.

Кыкетӥ нуналаз сиё-юо пилэн родняосыз, эшъёсыз. Келисьёс лыкто 8 кузя — ныллэн атаез дораз кыле. Казахъёс туж гажало ӵыжы-выжыоссэс, ваньмыныз кусып возё, юрттӥсько. Озьы Дауренлэн кышнояськоназ 150 родняосыз лыктӥзы. Ресторанэ пырон ӧсын гожтэмын, кин кытчы пуксе: ӝӧкъёс сьӧры нимаз-нимаз дыртытэк интыяськизы пилэн мумизлэн, бубизлэн выжыосыз, ӵош будэм юлтошъёсыз, валче ужась эшъёсыз… Ӝӧк выл бусьтыр: емышъёс, сӥль… нош ик сӥль. Дыльды шыр вия. Курытэз одӥг шапык но уг адӟиськы.

Куноос чабем улсын пыризы эмеспи но выль кен. Гаухарлэн ымнырыз фатаен ватэмын. Туссэ мед возьматоз шуыса, пилэн матысьёсыз коньдон тыризы тюбетейка выллем бадӟым коробе, юри ӧтем кырӟась, домбраен шудыса, нимысьтыз кырӟан (кюй) кырӟаз со вакытэ — выль кенэз пумен тодматӥз картэзлэн ӵыжы-выжыосыныз.

Казах сюанын туж бадӟым интыез тамадалэн. Со курем, ӧтем улсын зал шоры эктыса нырысь потазы но ӟечкылан, нодъян кылъёссэс веразы пилэн атаез ласянь ӵыжы-выжыосыз, собере — анаез палась, пумен черод вуиз эшъёсыз дорозь но. Кузьым чотын ваньмыз сямен коньдон сётӥзы. Озьы выль кен выль ӵыжы-выжыоссэ тодӥз, соослэсь макем бусьтыр улэмзэс валаз.

Казахъёслэн кылзы кузь, котькудӥз вераське мылысь-кыдысь, бумагае-открыткае учкылытэк. Егитъёс ваньзэс кылзӥсько сылыса, туж востэм. Озьы быдэс сюанзэс ик сылыса ортчытӥзы кадь, ӝӧк сьӧрысь ик ӧз поталэ. Куноос но гань-гань пукизы, шыпыт вераськыса, дырын-дырын тодазы вайылӥзы салатъёс но бешбармак сярысь — ӟечкыласьёсты, пе, кылытэк медам кыле. «Курыт!» шуыса кесяськисьёс но ӧй вал: сомында калык азьын выль кенлы но эмеспилы чупаськыны возьыт! Тамада огпол гинэ тодэ вайытӥз, ӝӧк сьӧрын куараез будэтъяно ӧвӧл шуыса.

Кытысь кылӥз ини со куашетӥсьёсты? Официант лэзьямъя гинэ юись куноос пӧлын кудӟемъёс ӧй вал. Ваньмыз кулэ дыръя эктӥзы, кырӟасьёсты кылзӥзы, брейк-данс но калык эктон эктӥсьёсты учкизы… Домбра чузъяськем улсын нош ик кылӥськиз кюй — таяз радэ выль кенлэсь ӵыжы-выжыоссэ данъяса: кыӵе соос умоесь, городын тодмо адямиос, лякыт, чебер ныл будэтӥллям… Тыро улэменыд ушъяськон но выль ӵыжы-выжыостэ ушъян понна сюан.

Бешбармак
Казахъёслэн ӝӧк выл сиёнзы — бешбармак. Кӧчылыса улӥсь калык вилка-пуньыез тодылымтэ, соин бешбармакез киын сиё вылэм. Нимыз но «вить чиньы» шуэмез возьматэ.

Уральск палъёс ӵемгес сое пӧрало вал сӥлен. Асьмелы яралозы парсь сӥль но, курег-ӟазег но.

Сӥлез кема пӧзьтоно. Со вакытэ пельняньлы сямен колӟаськоно. Колӟоез векчи бугортоно но бадӟымесь ромбъёслы яке ньыльсэргоослы вандылоно, лапшаез сямен.

Супыр-супыр пӧзем сӥлез киын пичи юдэсъёслы люкылоно. Нош лымаз лапшаез пӧзьтоно. Лымысь поттэм бере ог-огзы борды медаз лякылӥське шуыса, ньыльсэргоосты сурано вӧйын пырсатэм сугонэн. Казахъёс ярато сугонэз. Бешбармаказы сое кырымен-кырымен тыро, но солэсь азьвыл пӧзись вуэ веттыло курытсэ быдтон понна.

Табере кылиз на ваньзэ тырыны паськыт чебер тэркые: шораз — лапша, котырак — сӥль, вылаз — сугон. Луэ на пӧзьтэм картошка юдэсъёс поныны, векчи юдэм укропен, вож сугонэн чеберманы.

Кинлэн колӟоен выремез уг поты, соос понна асьме магазинъёсын но вузаське «Бешбармак» нимаськись лапша. Эшшо: пӧзись вуэ веттылыса небӟем сугон уг яра ке, кулэ вань дасям сугонэз пырсатыны.

Казы
Казы тодэ вайытэ асьме виртыремез, но лэсьтӥське валлэн урдлы котырысьтыз сӥлен, малы ке шуоно сыӵе сӥль кӧйгес, ческытгес.
Вал сюлэз сылалэн пызьнано, шуныт вуэн кӧня ке пол миськоно. Урдлылэсь люкем сӥль юдэсъёсты зырано сылалэн, изэм пќсьтурынэн, тминэн, шобыртоно марляен но 2-3 часлы пуктоно пеймыт, салкым интые — маринад пушказ мед пыӵалоз. Собере сюлэ со сӥлез туйнано, пумъёссэ сӥньысэн керттоно.

Казыез пӧзьтоно бадӟым кастрюляын (казахъёс пӧзьто казанын), ческыт шӧм понна вуэ сылыл, ӵужкушман, сугон, специос пононо. Ву быректэм бере казыосты венен кык-куинь пол бышкалтоно — сюл медаз пасяськы шуыса.

Сӥям казыосты колбасаез сямен вандылоно, тэркые бакча емышъёсын тыроно. Яра бешбармаке но поныны, сӥль интые.

Ольга Вахитова

Удмурт Дунне
By Удмурт Дунне Сентябрь 3, 2013 13:52