Пересь

Удмурт Дунне
By Удмурт Дунне Сентябрь 17, 2013 12:52

Пересь

23Марайко вагонэзлэсь ӧсъёссэ усьтӥз, тубатсэ лэзиз но васькиз платформа вылэ. Котыр корт юбоос сыло — вокзалэз югдыто. Женя нимо проводница кыштыр гинэ кошкиз вузкаронни пала. Ӝыны час куспын вуттоз ог кык сю метръем платформаез ортчыны но кык чугун сюресъёсты выжыны, собере берен. Зӧк, пичи мугорзэ маялляса, кезьыт тылъёс югдыто нылашлэсь сюрессэ. Котьку сямен, Пеппилэн кадь кык йырси пунэтэз, кудъёсыз нылашез пиналлы пӧрмыто, но тӧдьы гожъёсын сьӧд кофтаез, кудӥз сое эшшо но зӧкгес каре, юртто Женяез котькытысь но котьку тодманы.

Вагонысь васькыкуз ик, Марайко секыт ӟус вылын пукись воргоронэз синйылтӥз. Тылъёс зол ик пишто ке но, ымнырыз уй куазен умой уг адскы. Оглом гинэ вераны луоз: тушо, тӧрнам сюбег синмо, кырсь бамо. Вӧзаз костыль кылле.

— Чырткем, — вазиз со нылашлы.

— Умоесь.

— Кытчы мынкоды?

— Кинешмае.

— Кызьы тынад нимыд?

— Марайко.

— Мынам Александр.

Александров станция. Татчы азьло трос кылзэс верась адямиосты лэзьяло вылэм. Тодмо продюсер Айзеншпис но уксё куронэн шедемез бере та каре лэземын вал: Мускоын, пе, сыӵеослы улыны уг яра. Соин ик, вылды, татын сомында кӧшкемыт адямиос. Муско котырын туж трос каръёс, кытчы адямиосты «малпаськыны» лэзьяло вал…

— Тон туж чебер кышномурт.

— Ы-ы.

Марайко азьын пересь пиосмурт, полтарашкаысь аракы юыса, пуке. Гудырикошкон, соин ик уйёсы кезьытгес ик кариськылэ. Мускоысь Кинешмае мыныку, поезд котьку но кыкетӥ платформае дугдылэ. Пиосмурт нырысетӥ платформаысь паськыт секыт ӟус вылын пуке. Вераськисьёс вискын одӥг чугун сюрес, но нырысетӥ платформа кыкетӥезлэсь ӝужыт. Быдэс метрлы ӝужытгес.

— Кӧня минут ортчыса, кошкиськоды?

Бисерен браслетъёсыз пӧлы ышем часэз шоры учкыса, Марайко вазиз:

— Кызь.

— Мынам часэ платиналэсь лэсьтэмын. Тодӥськоды-а, мар со платина? — ушъяськыны кутскиз воргорон. Но со ушъяськемез пельёсты уг ванды

— кызьы егит калык ассэ умой палысен возьматыны турттэ. Солэн огшоры та иворез верамез потӥз. Солы со туж кулэ луись, верано маке кадь йӧтэ.

— Металл.

— Со зарнилэсь но дуногес. Дядяйлэсь кылемын, ньыльдон куатетӥ арын лэсьтэмын. Валаськод-а?

Марайколэн йыраз малпан чилектӥз: «Та чассэ со ноку но виналы уз вошты, дыр».

— Мынам дядяе «вор в законе» вал. Нош мон алкаш. Мон кошкысал тонэн, но мыным дачаям мыныны кулэ. Тӥляд поездды дачае вӧзы уг дугдылы. Тодӥськод-а, мынам Рублёвкаын квартирае вань, но мон отчы кемалась ӧй вуылы ни. Али мыным дачаен но тырме. Машинаме отчы кельтӥ, соин ик немаин мыныны луоз. Мон азьло олокытчы но машинаосме келлясько вал. Эше весь пыкылэ со понна, али но…

Мукет сюрес кузя поезд ортчиз. Корт питранъёс чугун рельсаос борды шуккисько но пересьлэсь кылъёссэ ньылыса сьӧразы нуо. Егит ныл адӟе, кызьы кузь пурысьтам туш пӧлы выем ымдуръёс усьясько, но мыня. Воргорон огназ кылемын: кызьы Габриель Маркеслэн «Сто лет одиночества» книгаяз Буэндия семья огназ кылён пӧлы выемын вал, озьы ик та пересез но мӧзмон пачкатэ. Со аслаз мӧзмонэныз огкылэ вуэмын ни. Нош вина кулэ дыръя котьку но эш кузьма.

Вераськыны люкетӥсь поезд кошкиз. Нош Пересь весь вераське на. Усыкмем воргоронлэн юанъёсызлы Марайко одӥг-ог «ярам», «ы-ы», «я» лэчыт кылъёссэ чугун сюрес сопала лэзья. Пересьлы соин но тырме.

— Малы тӥ юиськоды? — воргоронэн мытэм вераськонэз куспетӥ карыса, юаз Марайко.

Егит проводница быдэс та вакчи улонэз ӵоже валаны турттэ сыӵе адямиосты. Нош таӵе юан сётэмез бере пельёссэ, валэктон интые, шыпыт тӧл гинэ вешалля. Али но озьы ик, но тӧл вӧзы эшшо гудырикошкон толэзьлэн кот но кезьыт омырез ватсаськиз на.

Гурт улонэз тодыса, нылаш туж трос тордосъёсты адӟылэмын ини. Соос нылашлэн сюлмаз жалян уг сайкато ни. Огшоры кезьыт но лэчыт синъёсын учке со кемалась вошъямтэ дӥськутэ бинялскем мугорзы шоры. Гуртын пиосмуртъёс пичи дырысенызы ик виналы дышетэмын. Анайёс, пӧзьтэм самогонэн сектаса, пиоссэс калгыны лэзьяло. Мар юнме калык пӧлти юон утчаса ветлод?

— Мон огнам ӧвӧл. Мынам пичи пие Германиын улэ но дораз ӧте: атай, кушты вань ужъёстэ, лыкты ми доры. Нош мон пенсиын ини. Пенсия 37 сюрс басьтӥсько. Татчыозь тырме со мыным, — курмем бадӟым чиньыеныз чырты кузяз лэзиз воргорон. — Мон ожгарчи вал, Афганистанын тӥни…

Пересь вера но вера, трос дыр луысал ке, быдэс улонзэ вераса куштысал, дыр, Марайколэн пыдъёсыз улэ. Но пересьлэн зулемез, пель сьӧртӥз кошкыса, Марайколэн йырвизьмаз чечыен вӧлдӥське. Нылаш трос марлы ӧз оскы. Воргорон мувӧй бизнесэн но вырем ни. Пересь вераськыку, нылаш аслаз малпанъёсаз уяз: «Сием потэ ни мар ке но. Ку меда бурмозы та пинъёсы, нерад луиськиз ни. Эшшо дас вить минут кылиз на. Мукет отрядысь нылаш пиньёсыныз йырин гуртаз берытскиз ук, эмчиос шуизы, пиньёсыз усьыны быгатозы. Мынам пиньёсыным коть озьы медаз луы вал. Кык арня тани гуртозь кылиз на. Эх, кыӵе пинь лулсэръёс лӧптэмын. Имбирен но лимонэн пӧсь ву юоно луоз, дыр. Умой ук».

— Мон тон доры вуо, кык нунал ортчыса. Москвае Ярославской вокзалэ. Мынам отын машинае кельтэмын, «Мерседес». Мон тонэн али мынысал, но поезд дачаям уг дугдылы.. Мон тонэ, кык нунал ортчыса, басьто. Туннэ уг быгаты, юэмын ни тросгес, машинае отчы кельтэмын. Тон быгаткод-а машинаез нуллыны?

— Ы-ы.

— Мон тонэ обожаю. Мон вуо, кык нунал ортчыса, только машинаез ачид нуод, нош мон вӧзад пуко. Тон мыным пи пияд ке, мон тонэ ки вылам нулло. Тамирчик нималом, дядяйме кадь. Мон юэмысь дугдо.

— Тӥляд вань ни ук пиосты.

— Ма, соос немецъёс. Огез тӥни улэ Франкфурт-на-Майне карын. Кышное но отын ик.

Пиосмурт огдырлы чалмиз. Полтарашказэ ӝутћз но «асьмеос понна» шуыса нош ик ӟузиз нап-ӵуж вуэз.

— Кызьы тӥляд нимды? — юаз нылаш.

— Александр, верай ни ук вал, — куараяз куатаськон сямлэн одӥг шапыкез но ӧз кылӥськы.
Нылаш тодаз вайиз, воргорон нимзэ вазенгес вераз шуыса. Соин мылкыдыз кӧня ке пожаськиз. Пересь соин сомында вераське ини, нош со нимзэ но йыраз ӧз поны. Тӥни озьы адямиос кылзӥсько ог-огзэс…

— Тон беризь кадь.

— Ы-ы.

— Мон тонэ Путинэн тодмато.

— Я.

Динамикъёсысь тодмо куара чузъяськиз: поезд, 5 минут ортчыса, сюрессэ азьланьтоз. Дыр вуиз платформаысь тамбуре тубыны но пересен огӝужда луыны. Вузкаронние уксё воштыны кошкем проводница аслаз вагоназ бызьыса берен вуиз. Ныллэсь векчи куараен нёръямзэ кылыса но кык йырси керттэтлэсь лэйкамзэ адӟыса, пиосмурт мынектӥз.

— Эх! Пичи нылаш бызьылэ.

— Со проводница.

— Со? Со нылаш. Кызьы проводница? Со пичи нылаш, — оскытэк аслэсьтыз вера пересь воргорон. Солэн аслаз синъёсызлы, аслаз малпанъёсызлы оскемез потэ. Марайколэн ӧз поты ни солэсь оскемзэ быдтэмез.

— Ӟеч луэ ни!

— Мон тонэ Мускоын пумитало, одно ик. Яратко тонэ.

Кык огназы кылем адямиосты висъясь чугун сюрестӥ поезд матэктыны кутскиз. Тани-тани со кык пӧртэм дуннеын улӥсьёсты люкоз. Воргорон, поездлэсь матэктэмзэ адӟыса, чиньыоссэ ымдураз йӧттӥз, чупасько тонэ, шуиз кадь нылашлы. Поезд секыт вагонъёсыныз нырысетӥ платформаез ватӥз. Марайко вагонъёс вискытӥ гинэ адӟылӥз на пересь мугорез, ӟусэз но кенер сьӧрысь вить этажъем коркаосты. Тани ӝоген нылашлэн поездэз но вырӟиз. Александров станция но воргорон ӵошен кылизы пумитаны выль составъёсты, нош Кинешмае мынӥсь поезд, омырез вандыса, нуиз Марайкоез азьлане.

Мария Векшина
Суредаз Вера Штыкова

Удмурт Дунне
By Удмурт Дунне Сентябрь 17, 2013 12:52