Ин пыдэскы ӝутӥськыса…

Удмурт Дунне
By Удмурт Дунне Сентябрь 17, 2013 12:31

Ин пыдэскы ӝутӥськыса…

Zemanta Related Posts ThumbnailШу тылпуос
Та музъем
вашкала дырысен
Сӥзьылэз пумита
ужъёсын:
Сусекъёс пачылмо
ю-нянен,
Емышъёс жингырто
садъёсын.
Ай ӧз вунэ
турнан нуналъёс —
Зуродъёс ай
ӧвӧл лапкамын.
Лушкемак ӵужекто кызьпуос,
Куажыез но шергес
кыломы.
Кӧлонзэ вунэтэм губиясь
Вазь ӵукна ик ышоз
бус пӧлы —
Медло трос губиез
кудыяз,
Мед паймоз со
шупу тылпулы!
Ах, гома ук, гома ук
шупу —
Со ужась гужемлэн ӟырдытэз.
Ортчемзэ малпалод тон
соку,
Шудбуред но луоз
пачылгес.
Малпалод на
шупу югытын
Сюан гур мытонлэсь
вуэмзэ,
Со сярысь верасько ни гуртын,
Дасяло ни
ческыт мусурзэс.
Нылэныз люкиськоз атай юрт,
Нош бусы мӧзмылоз
нылызлэсь.
Келякуз но оске
вордскем гурт:
Ныл уз люкиськы,
уз музъемлэсь.

* * *
Сильтӧл азьын,
Сильзор азьын
Чалме тылобурдо куара.
Соку сьӧд сизь но
нюлэскын
Быръем кыззэ уг ни кора.

Соку турын но лаптӥське,
Майсы но кытчы ке пегӟе.
Нош кин со
кырӟан гур кисьтэ?
Тон кылзы ай.
Усто ук, ӟеч!

Ин пыдэскы ӝутӥськыса,
Жильдэ оскон сётӥсь
гурзэ.
Кышкан сярысь
вунэтыса,
Сое ӝужась ю-нянь
кылзэ.

Тодмай тюргетӥсез, тодмай,
Сюлмаськонэз мыным матын.
Мынам лулы но
тюрагай,
Кырӟан гурзэ бурдъя лудын.

Улон чик пилемтэк уз лу,
Лыктоз йӧзор, сабоз тудву.
Сюлмы нош,
луд крезьчи музэн,
Уз лэзьылы оскон бурдзэ.

* * *
Умой валам
выльзэ кивалтӥсьмес:
Сое нокин
уз шуы кибашлы.
Озьы ке но
солэн но вань ӟечез:
Ноку уг люкеты
ужасьёслы.

* * *
Сюлмам-визьмам
таӵе кышкан кугӟаз:
Медам шедьы солэн юбилеяз.
Шӧдтэк шорысь
сьӧдзэ тӧдьы шуод,
Мынам нош
чик алдаськеме уг пот.

* * *
Курыт гумы али но мон
Тулыс куазен тӥяллясько.
Огзэ нош ӟеч ни валасько:
Курыт гумы вылэ кылён
Курыт синкылилэсь курыт!

* * *
Квартира сёто ке улысь этаже,
Урод со, конечно,
кулэ вылэгес!
Квартира уг шедь ке 15 ар ӵоже,
Соиз ни эшшо уродгес.

* * *
Кытчы усид, отын ик тон бырод,
Юг мугордэ
басьтоз-ньылоз музъем,
Инмаредлэсь марзэ меда курод,
Куке сюлмад
мукет инмар ӝужъе…

Сике пырон азьын ассэ ветта
Ненег гинэ, чиед гинэ турын…
Мынам песятае ческыт вӧта,
Вунэтылы вал,
мар со пӧсьтурын…

* * *
Мед тэлялоз на
сэрегпум,
Берпум пуклёк
мед эгырӟоз.
Нош улон пум,
нош улон пум
Мед улонэ выллем
уртчоз.

Коркаысьтым
мумыкоре
Мон шуккыло
уно коньдон,
Вакытылэн
пӧсь йыркурез,
Медад чиля бурчин кадь тон…

Ачим ик медло
со коньдон,
Ачим ик медло
со буртчин.
Мед пилисько яке гуньдо,
Мон пиньёсме ини
куртчи.

Эшшо кушто на
кӧс писъёс,
Таиз аре кадь пӧсь гуре.
Сьӧд муръётӥ
лобись ӵынъёс
Монэ вуттылозы
лыз инсьӧре…

Уг, мон уг ӝуа,
пис сямен,
Укыр троссэ тон
куриськод.

Владимир Романов

Удмурт Дунне
By Удмурт Дунне Сентябрь 17, 2013 12:31