Библия — вань книгаослы Книга

Удмурт Дунне
By Удмурт Дунне Сентябрь 20, 2013 14:41

Библия — вань книгаослы Книга

Та виын туй выло удмурт Евангелие быдэс дунне вылын одӥг гинэ. Со возиське удмурт черкын. Берыктӥз М. Атаманов.

Та виын туй выло удмурт Евангелие быдэс дунне вылын одӥг гинэ. Со возиське удмурт черкын. Берыктӥз М. Атаманов.

Мар сётоз со удмурт калыклы?

Лыдӟисьёсмылы ивортӥмы ни, Библияез удмурт кылэ берыктон йылпумъяськиз, та дыре со элькун типографие печатланы сётэмын шуыса. Кема-а печатлан уж кыстӥськиз, ку со калык кие вуоз — та но мукетыз сярысь юалляськимы Михаил Атаманов протодиаконлэсь.

— Отец Михаил, лыдӟисьёсмы пӧлын вань, дыр, сыӵе адямиос, кинъёс уг валало: мар со сыӵе Библия, кӧня люкетлэсь со кылдэмын? Сурало Выль Сӥзёнэз, Вуж Сӥзёнэз но Евангелиез.

— Библия грек кылысь «книгаос» шуыса берыктӥське. Библия кык люкетлэсь: Вуж Сӥзёнлэсь (Ветхий Завет) но Выль Сӥзёнлэсь (Новый Завет). Вуж Сӥзён кылдэмын еврей калык пӧлын. Солэсь люкетъёссэ — нимысьтыз книгаосты — гожъян сюрс арлэсь кема кыстӥськиз. Евангелие грек кылысь удмуртэ «Ӟеч ивор» шуыса берыктӥське. Библиялэн та дунолэсь но дуно люкетэз пыре Выль Сӥзёнэ.

— Библия, пе, дуннеысь тужгес вашкала книга луэ. Озьы-а со? Но мар бордысен лыдӟыны кутсконо Библияез?

— Зэмзэ но, Библия, уката но Вуж Сӥзён люкетэз, туж вашкала книгаос пӧлы пыре. Но Солэсь кулэлыксэ, данлыксэ дунне вылысь одӥг книгаен но ӵошатыны уг луы. Со — вань книгаослы Книга, уго Сое кылдытӥсьёс, Улон Сётӥсь Кузё-Инмар дорысь дэлет (благодать) басьтыса, Сое гожъяны кутскизы. Библияез лыдӟыны кутсконо Выль Сӥзён бордысен. Умой тодоно Ӟеч Иворлэсь (Евангелилэсь) пуштроссэ, озьы ик Апостолъёслэсь ужъёссэс, Апостолъёслэсь ыстэм гожтэтъёссэс. Собере гинэ Вуж Сӥзён борды басьтӥськоно.

— Быдэсыз Библия удмурт кылын азьвыл ӧз печатласькылы. Кӧня дыр кулэ луиз та ужез быдэстыны?

— 22 ар ӵоже кыстӥськиз Библияез берыктон уж. Трос-а, ӧжыт-а со? Ӵошатон понна: мукет фин-угор калыкъёс, уката ик мокшаос, коми-пермякъёс, ог 10 арлы асьмелэсь бере кыльыса мыно. 2011-тӥ арын ӟуч кылын потӥз выль берыктон, со бордын ужазы Москваысь, Санкт-Петербургысь 10 профессоръёс 10 ар ӵоже. Россиын сюлэсь трос калык улэ, Библияез асьсэ кылын поттонын асьмеды азьпалтӥзы чувашъёс, тываос, чеченъёс гинэ, соосызлэн одӥг гинэ берыктӥсьёссы ӧй вал, кӧня ке мурт та ужын тыршиз. Инмар ӟеч эриксэ сётӥз ке, удмуртъёс Россиын витетӥ калык луозы, кинъёслэн анай кылазы быдэс Библия берыктэмын, калык кие вуттэмын.

— Удмурт Элькунын та быдӟым ужлы сӥзем праздник луоз-а? Мар сётэ Библиялэн потонэз калыкмылы?

— Инмарлэн ӟеч эрикез луиз ке, праздник одно ик ортчоз. Библиялэн потонэз котькуд адямилэн улоназ бадӟым инты басьтэ, вань калыкъёс та нуналэз быдӟым святой праздник шуыса пусъё. Библия калыкез туж вылӥе ӝутэ: одӥг ласянь, со Инмарлы ярамон уж — Солэсь кылзэ, дышетонзэ-нодъянзэ котькудӥз адями валамон, анай кылыныз лыдӟыны быгатэ но аслэсьтыз улон-вылонзэ Вылысь Инмарлэн, Кузё-Инмарлэн курон-косонъёсызъя (заповедьёсызъя) тупатыны, шонертыны кутске. Одӥг адями гинэ ӧвӧл, быдэс калык Священной Гожтэмез — Библияез — кабыл басьтэ ке, со югытсэ, Дунне Кутӥсь Улон Сётӥсь Инмар дорысь дэлет (благодать), берекет, улыны-ужаны азинлык, кужым басьтэ. Шудо калык, кинлэн Библиез берыктэмын ни, кин Инмарез, Кузё-Инмарез данъяса, Солы тэрытскыса, Солэн курон-косонъёсызъя улэ. Таӵе шудоос пӧлы пыро Европаын, Америкаын, Австралиын улӥсь калыкъёс, нош озьы ик армянъёс, грузинъёс. Язычникъёс Библиез ас кылынызы лыдӟыны кутскем бере вылӥ азинскем цивилизациез кылдытӥсьёс луизы, кылзэс, культуразэс ӝуто, экономиказы азинске, соослэн кунъёсазы трос калыкъёс, уката ик мусульманъёс, улыны интыясько.

Мукет ласянь, асьмеос но, Библиямы луиз ке, дунне вылысь самой азинскем калыкъёс пӧлы пыромы. Христиан калык тодоз удмуртъёс сярысь, та калыклэн но кылаз Библияез берыктыны луэ бере, та калык вылӥе ӝутӥське, со бырыны кулэ ӧвӧл. Глобализация (вань калыкъёсты, кылъёсты огъя карон) политикаез нуисьёс, ЮНЕСКО-ын пукись йыръёс, удмурт кылэз бырись кылъёс пӧлы пыртӥзы ни вал. Нош удмурт калык чылкыт лулыныз-сюлмыныз Дунне Кутӥсь Кузё-Инмар пала берыктӥськиз ке, котькуд коркан Библияез лыдӟисьёс луизы ке, нылпиоссэс удмурт кыллы дышетӥзы ке, асьмелэн сюрс аръёсын улэм дунолэсь но дуно, мусо, чебер, вашкала анай кылмы уз быры, улоз, сое быдтыны тыршись шайтан кужымъёслы со уз сётӥськы.

Та понна мон, уйме но, нуналме но жалятэк, 22 ар ӵоже ужай, тырши Священной Гожтэмез — Библияез — берыктон бордын. Тыршо на сое удмурт калыке пӧлы вӧлмытыны. Библияысь мадьёс, пӧртэм сюжетъёс писательёслы, суредасьёслы, крезьгур гожъясьёслы туж узыр, дуно материал сёто. Школаосын али дыре православной культураез дышетыны кутско бере, удмурт классъёсын удмурт кылын печатлам «Нылпи Библияез», али печатласькисьсэ бадӟымзэ Библияез но уже мед кутозы вал. Удмурт пинал, Библияез санэ басьтыса, быдэ вуиз ке, солэсь визьмо, йӧно, ужась мурт пӧрмоз. Библиялэн кужымез туж бадӟым, со уродлы уг, ӟечлы гинэ дышетэ.

— Тодады вае ай Библияез берыктон борды басьтӥськемды сярысь. Кызьы тодматскиды Финляндиысь Библияез берыктонъя институтын ужасьёсын?

— «Библия» кылэз мон пичи дыръям чик дышетскымтэ анаелэсь кылӥ, собере сое ӧй ни вунэты. Берыктон сярысь, эшшо ке со ужез быдэстыны мон мед басьтӥськом, тодам но ӧй вал. Эстониын аспирантураын дышетскыкум, тодосъя кивалтӥсе П. Аристэ академик, Инмарлы оскись мурт, шуэ вал, котькуд азинскем калыклэн аслаз кылаз берыктэм Библияез, пе, мед луоз. Та веран сюлмам пыриз.

Анае, Ижкарын мон дорын улыкуз, черке мынэ но бертэмез бере шуэ вал: «Черкын кыӵе умой! Малы меда чирдэмзэс, мар верамзэс уг валаськы?» Ӟуч кылэз со уг тоды вал. Анаелэн но верамъёсыз сюлмам пыризы. Ас поннам малпасько вал: «Эк, кин ке но Библияез удмурт кылэ мед берыктысал, кыӵе шумпотысал калык».

1980-тӥ аръёсы лушкемен кыдёкысь Прибалтикаысь, Украинаысь, Белоруссиысь монастырьёсын отпускъёсме ортчытъяны кутски (со виын Россиын одӥг монастырь но усьтэмын ӧй вал на). Куд-ог монахъёсын но тодматскыса вуи: Сергиев Посадысь отец Наум, Псковской Печераысь отец Тихон монэ бакель каризы кудзэ ке но Евангелиез берыктыны. Соку мон УдНИИ-ын ужасько вал, Удмурт обкомлэн идеологияя шорсюлмаз. Котькуд ужлэн кутсконэз секыт, нош кутски но черк визьнодчиослэсь (старецъёслэсь) бакель каремзэс быдэстӥ: ӵукна вазь ик институтэ лыктӥсько, ӧсме тунгонасько но шып-шып берыктон ужме нуисько вал, машинкаен печатласько сое. Озьы ышыг интыын ватӥськыса кӧня ке ар улӥз «Марклэн гожтэм Евангелиез». Странаен коммунистъёс-атеистъёс кивалтӥзы, КГБ котькытчы но нырзэ чуртна вал. Тодысалзы ке, идеология шорсюлмын Евангелиосты берыкто шуыса, монэ но, институтлэсь директорзэ К. Куликовез но ужысь туздырысалзы, дыр. Но Инмар утиз шугадӟонлэсь.

1990-тӥ аръёсы СССР куашказ. Религиен-осконэн нюръяськон дугдӥз. 1991-тӥ арын Финляндиысь Библияез берыктонъя институтын ужасьёс тодӥллям, Ижкарын вань, пе, удмурт кылэз ӟеч тодӥсь диакон, филология наукаосъя кандидат, сое, пе, луысал удмурт кылэ Библияез берыктон бордын ужатыны. Со виын СССР-ысь вань кылъёсы берыктон ужез нуыны кутскизы, но берыктӥсьёсты шедьтыны капчи ӧй вал: кин ке но кышказ, я возьдаськиз, дырзэ «кулэтэм» ужен вырыны жаляз, уго егит калык ваньмыз сямен я комсомолец, я коммунист, атеист вал.

Нош мон, обросъёсы азе пыдесъяськыса, арлэсь кема тэльмырыса куриськи: Кузё-Инмаре монэ бакель мед карысал Библияез удмурт кылэ берыктыны, черке кошконэлэн одӥгез бадӟымез мугез вал Библияез берыктон.

Хельсинкиысь вуиз гожтэт. Туж шумпотыса, Москвае лушкемен пумиськонэ мынӥ. Татысен тодматски институтлэн директореныз Анита Лаксоен но Марья Картаноен — удмурт кылын кӧня ке но вераськыны йӧндырисен. Соос кыл сётӥзы Алексий II Св. Патриархлы куронэн вазиськыны. Ваньмыз ӝог быдэсмиз: Патриарх ужме бакель кариз! Со самой шумпотон нуналэ вал, дыр, быдэс улонам.

Табере монэ Финляндие ӧтизы. Сьӧрам кутӥ «Марклэсь гожтэм Евангелизэ». Со бордын кӧня ке ужаммы бере, толэзь-кык ортчыса, печате сётӥзы. Чебер бумагае печатласа поттэм книга лыдӟисьёслы сётъяны дась вал ини. Нырысьёсыз лыдӟисьёсмы луизы Нырысетӥ удмурт съездэ люкаськемъёс. Туж-туж ӝог быриз таиз Вӧсь книгамы. Ар ортчыса, ньылез ик Евангелиос печатламын вал — 10 сюрс тиражен. Таосыз но книгаосмы калык пӧлы ӝог вӧлмизы. Собере потӥзы Псалтирь, Апостолъёслэн ужъёссы, Выль Сӥзён (Новый Завет). Та быдӟым книгалы сӥзьыса, сӥё-дано праздникъёс-презентациос ортчизы Ижкарын, Пичи Пургалан, Алнашын, нош озьы ик Хельсинкиын, Стокгольмын. Озьы Инмарлэн ӟечлыкеныз сӥлы каремын вал Библиялэн одӥгез тужгес но ӵем лыдӟиськись люкетэз, удмурт кылын печатлам Выль Сӥзён.

Арлы быдэ вуылӥ Финляндие, отын, нокин но люкетытэк, берыктон бордын ужалляй. Ужелэсь ӟечлыксэ вашкала грек оригиналъя эскерылӥз Марья Картано. Арлы быдэ кык пол Удмуртие вуылӥз со. Котьку ӵош ужамы, субботае но арнянуналэ гинэ мыным черке служба нуонэ пыриськоно луылӥз. Берыктон ужлы дышетон семинаръёс ортчылӥзы Россиын, Финляндиын, нош одӥгез тужгес дуноез но вунонтэмез ортчиз Израильын, кык арня дышетскимы Иерусалимын, святой интыосын тодматскылӥмы. Берыктон ужлы та ужрадъёс туж юрттӥзы. Вань командировкаосы понна Хельсинкиысь институт уксё тырылӥз.

— Тӥ мукет вӧсь черк книгаосты но удмурт кылэ берыктыса поттӥды но удмурт службаослы кутскон сётӥды.

— Озьы. Библияез сяна, калыклэсь кулэяськонъёссэ лыдэ басьтыса, «Данъяса кырӟан гуръёс» (Акафистник) нимысьтыз книгаосын потӥзы, «Часэн-часэн вӧсяськонъёс, кырӟанъёс» книга 11 пол печатласькиз ини. Нырысьсэ со «Вӧсяськонъёс» (Молитваос) нимын 10 сюрс тиражен потӥз вал, нош бӧрысь коньдон люкаськемъя 500, 1000 тиражен гинэ потылӥз ни. Православной книгаосты поттонэ финъёс ӧз ни пыриське, коньдонзэ но ачим ик утчасько, калык пӧлы но ачим ик вӧлмытӥсько.

Черке лыктэм дырысеным мур сюлэмшугъяськонэ вал: луэ меда, уг меда литургиез (черк службаез) удмурт кылын нуыны? Туж потэ вал, удмурт музъем вылын, удмурт калык пӧлын, православной черкъёсын анай кылмы мед чузъяськоз. Мар ватонэз, черке ветлымтэ адями нырысьсэ вӧсь корка пыре ке, номырзэ но уг вала — служба мынэ туала калыклы валантэм черк-славян кылын. Та кылын вераськизы ог 1000-1500 аръёс талэсь азьвыл Дунай, Балкан котырын улӥсь славян выжыос. Одӥг гинэ пичи пример верало: диакон яке иерей литургилэн шораз ялэ, тазьы куре: «Елицы оглашеннии, изыдите; оглашеннии изыдите…». Черк пушкын чус, потӥсь-пырись ӧвӧл… Та куриськонэз табере кылзэ удмурт кылын: «Черке пыртоноос (пылатымтэос, чукынымтэос), ваньды потэлэ; черке пыртоноос, ваньды потэлэ…»

Черке пыртоноослы, кинъёс пылатскыны (чукынӥськыны, крашинэ пырыны) дасясько, литургилэн та куриськон дорозяз, шор вадесозяз, гинэ службаын сылыны яра, собере соослы черк пушкысь потоно ни — кутске зэм оскисьёслэн (пылатэмъёслэн) службазы.

Библияез берыктон вискам ик, научной ужъёсме гожъякум ик, выри литургиез берыктонэн. Черкын ужасько бере, мар но со валасько ини: службаын кутӥськись кырӟанъёсты удмурт кылэ берыктӥсько но ачим ик кырӟаса утчасько: кырӟасьёс медаз курадӟе, берыктэм уже капчиен мед кырӟаськоз. Мар веранэз, туж секыт, секытлэсь но секыт черк-славян кылысь удмурт кылэ берыктон. Нокин но, Инмар сяна, юрттӥсе ӧй вал. Кыллюкамъёсын трос пуки.

Ярам, ужан-вырон сямен св. Иоанн Златоустлэн чинэзъя литургиез, часословез, черк кырӟанъёсты берыктӥ. Нош кытын службаез ортчытод? Арлэсь кема бызьылӥ кузёос дортӥ, черк пуктыны инты мед сётозы шуыса, трос гожтэтъёс гожтоно луи, трос пол жингыръяй пӧртэм учреждениосы. Дыр вуиз но, элькунысь архитекторъёслэн кенешазы карлэн соку йырыз В. Балакин лек кылын шуиз: «Удмуртъёс эшшо ке черк пуктыны малпаллям?! Уз луы!» Мусульманъёслы та кенешын ик инты сётӥзы, со мечеть сылэ ни Ижлэн шораз.

Лулы-сюлмы вирын орсмиз, но малпай: озьы гинэ уг сётскы ай! Куиньзэ шаплыгес удмурт кышномуртъёсты кури Москвае Патриарх доры мыныны. Уксё люкамы но, та визьмо, ас калыксэс гажась муртъёс сюрес вылэ потӥзы. Патриарх доры соос ӧз сюре, но гожтэт кельтӥзы. Ижкаре Св.-Михайловской соборез вӧсяны вуылыкуз, Алексий II Патриарх та ужпумез ӝутэм — ӵуказеяз бакель карон сётӥзы удмурт кылын службаос нуыны.

Та вакытлы ми арлэсь кема ини службамес ортчытъямы пичи гинэ Крестик — Кирос Ӝутон — черкын. Паймымон вал нырысетӥез служба: калык черке пачылак люкаськиз, чик дугдылытэк туж шулдыр служба мынӥз. Татысен кылдӥз ог 50 муртлэсь удмурт православной семья. Табере удмурт службаос мыно Ижысь Казанской оброслы сӥзем черкын.

Службаез быгатыса нуэ отец Павел Григорьев, сое мон ачим ик кивалтӥсь архиереймылы ӵектӥ вал священнике пуктыны. Чирдӥсьёсмы но чебер чирдо, шулдыр кырӟало. Жаляса верано, калык сокем ик трос ӧвӧл, ог 40-50 мурт. Удмуртъёс пӧлын ик вань удмурт кылын службаез нуонлы пумитъяськисьёс. Интеллигенцилэсь нокыӵе юрттэт ӧвӧл. Соиз шумпотымон: мукет фин-угор калыкъёсын ӵошатыса (финъёсты, эстонъёсты, мадьяръёсты вератэк ини), удмуртъёс гинэ ас кылынызы литургиез служить каро.

— Инмарлы оскисьёс пӧлын вань веран: визь сынаськонэ сюрыны. Кызьы сое валано? Вал-а ни тӥледын визь сынаськон?

— Котькудӥз но Инмар пала берытскем мурт тодэ, мар со визь сынаськон, ӟуч сямен вераса, искушение. Сьӧд кужымъёслэн, ведӥнъёслэн, перияськем муртъёслэн кузёйырзы — шайтан (со ик диавол) — пиньзэ йырйыса улэ Инмар пала берытскем муртъёс вылэ, соослэн матысь муртъёссы (ӵыжы-выжыоссы) вылэ, уката ик кинъёс азьвыл, Инмарез тодытэк, пӧртэм сьӧлыкъёс лэсьтыса, улӥзы, нош табере Улон Сётӥсь Кузё-Инмарез данъяса, вӧсяськыса, ӟеч ужъёс лэсьтыса, улыны кутскизы ке. Таӵе адямиос сярысь алама муртъёс урод кыл вӧлдо, малпамтэ шорысь соос доры шугадӟонъёс, висёнъёс вуо. Но тае ваньзэ чиданы кулэ. «Чидан пыр лулдэс уте», — шуэ Кузё-Инмармы. Уго чик сьӧлыктэм Инмар Пиез Иисус Христосэз сьӧлыко дуннелэн адямиосыз жугизы, ултӥязы, кортӵогаса виизы, нош Со ваньзэ чидаз, Инмысь Атайлэсь куриз, та йыромем адямиосты вӧсь медаз кары шуыса, уго шайтанлэн ки улаз шедем муртъёс уг тодо мар лэсьтэмзэс.

Ачим сярысь ке верано, соос пумтэм трос вал ини. Котькуд Вӧсь книга потыку, тушмон кужым погыртыны турттэ пӧртэм визь сынаськонъёс пыр. Кылсярысь, бӧрсьысь бӧрсе туж кулэ луись Псалтирь но Выль Сӥзён книгаос потэм бере вить матысь ӵыжы-выжыосы кулӥзы, ачим но больницае сюри. Со арын ик пурӟиз Инмар кыллы пумит ожмаськон. Партийной ужасьёслэн, коммунистъёслэн семьяязы быдэсмем, Инмар кылэз кылылымтэ мурт, историк, удмуртлыкез яратӥсьтэм адями, кыӵе ке но амалэн черке сюре (вазен та выллем муртъёсты КГБ юри черке келя вал) но кескич амалэн кутске удмурт кылын Вӧсь книгаослы, тужгес но Инмар кыллы пумит нюръяськыны. Та адями удмурт вӧсяськисьёслы куспазы люкиськыны муг сётӥз. Удмурт калыклэсь святойлэсь но святой Инмар кылзэ Эксэй кылын воштэ. Но со чик но шонер ӧвӧл, эксэй — со царь, Кузё-Инмарлэн одӥгез синонимез гинэ луэ.

Быдэс Библия потӥз ке, тодӥсько ни, лушкемен гомаса улӥсь тылӝу нош ик пурӟоз: шайтан-диавол аслаз адямиосыз пыр кутскоз нош ик удмурт калыклэсь визьзэ туганы, сынаны. Нош тӥ, гажано агай-вынъёсы, сузэр-апайёсы, йыромем, визь тугась оринаослэсь эн кылзӥське, уго Ачиз Кузё-Инмармы Иисус Христос Аслаз дышетскисьёсызлы курон-косон сётӥз дуннеысь вань калыкъёс доры мыныны но соослэн анай кылынызы Священной Гожтэмез тодытыны. Святой Павел апостол шуэ: «Агай-вынъёсы, мон, тӥ доры лыктыса, тодмотэм кылъёсын вераськыны кутски ке, соку тӥледлы кыӵе пайда мон ваё?..»; «пӧртэм кылъёсын вераськыны но эн люкетэ» (1 Кор. 14:6; 39).

— Библияез печатланы кутскизы-а ни? Ку сое киямы кутыны быгатом?

— Визь сынаськон бордысен ик кутско. Библияез берыктон бордын ужакум ик, вераськонъёс пото вал коньдон пумысен. Фин эшъёсы шуо вал, эн, пе, сюлмаськы, удмурт проектлы коньдон люкамын ни. Нош дыр вуиз но, мукет сямен пӧрмиз: Финляндиысь Библияез вӧлмытонъя эштосэн (обществоен) кивалтӥсьёс шуизы, тӥ дорын печатлан дуно усе, ми, пе, печатлаломы Белоруссиын. Соос протестантъёс бере, печатлалозы асьсэлы тупась бумага вылэ, пичи форматэн, векчи бумага вылэ, векчи букваосын. Мон шуи: «Ми — православнойёс, милемлы кулэ православной книгаослы укшась Библия, удмурт Библияез печатлаломы Ижкарын». Ярам коть, Библияез берыктонъя институт 800 сюрс манет келяз Ижкар типографие. Элькун типографилэн кивалтӥсез Виктор Рыдкин, удмурт калыкез яратӥсь мурт (Ю. Кедров журналистлэн эмеспиез), удмурт Библияез Ижкарын поттон вылысь юри Германие ветлӥз печатлан машина басьтон понна. Солэсь-а ӟеч мылкыдзэ уд гажа? Мон али нуналлы быдэ типографие вуылӥсько, Виктор Михайловичен капчи ужаны, ужасьёсыз но ачиз кадь ик лякытэсь.

Библияез печатлан уж кутскиз ини. Со ог 2 толэзь кыстӥськоз на. Ноябрьлэн шор вадесаз, малпаськомы, ог 2500 книга печатьысь потоз ини шуыса, эшшо 2500-эз — ноябрь пумын.

— Коньдонэн кыӵе югдур? Калык юрттэ-а?

— Коньдон люканэн но тунсыко ужъёс мыно: лякыт сюлэмоос, Инмарез яратӥсьёс, Солэсь кышканэн улӥсьёс жалятэк сёто, чурыт сюлэмоос шуо: «Атаманов митэк но шедьтоз ай». Инмарлы тау, Солэн ӟечлыкеныз, бакель каременыз 1 миллион 600 сюрс манет люкай ни, эшшо 600 сюрс люкано на. Инмаре уз кушты, тазэ но люканы Со Аслэсьтыз ӟеч муртъёсызлэсь мылкыдзэс ӝутоз.

Сюлэмме шумпоттӥсь кӧня ке учыръёс сярысь вераме потэ тӥледлы но. Туж пичи гинэ фирмаен кивалтӥсь, ачиз ик вань секытэсь ужъёссэ быдэсъясь удмурт воргорон, ӝыны миллионзэ сётӥз но шуиз: «Удмурт кылын Библияез поттон понна мон дась фирмаме вузаны но коньдонме та ужлы сётыны». Мукетыз эше кунгож сьӧрысь 250 сюрс манетсэ келяз ни. Кык ӟуч ужбергатӥсьёс быдэн 100 сюрсэн сётӥзы ни. Таизлы паймоно но, шумпотоно но: 80 ареслэсь ортчем кык удмурт песяйёс, одӥгез 150 сюрс, мукетыз 100 сюрс сётӥзы. Соос тодо, сюлмынызы шӧдо уго Библия поттонлэсь святойлэсь но святой уж луэмзэ. Та муген ик одӥг ӟуч кышномурт (выж миськись) 50 сюрс манет сётӥз: со удмурт кылэз уг тоды, удмурт кылын Библияез но уз лыдӟы, но Вылысь Инмар азьын ӟеч уж лэсьтон понна табыдӟа салам-мамаля вайиз удмурт кылын Библияез печатланы. Ӟеч лэсьтӥсьёслы, Инмаре, ӟеч кар! Украин кышномурт но, ӟеч кылъёс вераса, 10 сюрс манетсэ сётӥз. Удмурт черке ветлӥсьёс тросэз 10-15-20 сюрсэн сётылӥзы ни. Шумпотӥськомы 100-500 манетэн сётэмзы понна но. Алнаш ёросысь Сыръезь гуртысь калык удмурт черке вуылӥз но 5000 манет сётӥз. Дэри-Чудья (Завьялово) черкогуртысь ог 3 сюрс манет вуттӥзы ни. Пичи Пурга ёросысь пичигес гинэ Чутожмон гуртысь али 10 сюрс манет пала вайизы, быдэн 4000 манет сётӥллям татысь Пельга Нина апай но Оника Матӥ апай. Ӟеч сюлэмоослы оскон понна, удмуртлыкез утён понна сюлмаськисьёслы, Инмаре, Ӟеч Адӟонэ, Ӟеч Оскиськонэ, дэлето-берекето кема улон аръёстэ сёт. Шумпотӥсько Грак ёросысь вордскем Вуж Эгра гуртысьтым но 60 сюрс манет вуттэмзы понна. Та нуналъёсы Кукмор ёросысь 70 сюрс вуттӥзы. Ужазы, улоназы ӟеч лэсьтӥсьёслы азинлык, тазалык сёт, Инмаре.

Та дыре мукет гуртъёсын но коньдон люкало ни шуыса, кылӥське. Библиын вань таӵе чуръёс: «Куанерлы ӟеч лэсьтӥсь мурт Кузё-Инмарлы пунэмен сётэ, но Со солэн ӟеч ужез понна пунэмзэ берыктоз» (Соломонлэн мадёнъёсыз 19:17).

Огшоры калык пӧлысь кин 10 сюрс, ужбергатӥсьёс пӧлысь кин 100 сюрс сётӥз ке, соослэн христиан нимзы Буре ваён книгае гожтэмын луоз, со листок Библия пушкы понэмын луоз. Отын тазьы гожтэмез вань: «Кузё-Инмаре, удмурт кылын Библияез поттонын ужась-тыршисьёслы, коньдонэн-мамаляен юрттӥськисьёслы ӟеч кар, дэлето улон аръёс сёт. Дыр вуиз ке, та ляльчиосыдлэсь Викторлэсь, Ниналэсь, Ксениялэсь, Антониналэсь, Раисалэсь… лулзэс Аслад Инмысь Эксэйлыкад пырты».

Галина Семёнова

Удмурт Дунне
By Удмурт Дунне Сентябрь 20, 2013 14:41