Вуюисез адӟем потэ…

Удмурт Дунне
By Удмурт Дунне Август 16, 2013 10:15

Вуюисез адӟем потэ…

097Ниналэн картэз сярысь удмуртъёс шуысалзы: нюлымтэ кунян. Э-э, Ниналэн ӧвӧл, Нинельлэн. Анай-атаез сое огшоры Нинок, Нинуш ке шуизы, таӵе вазем солы чик уз кельшы. Соин ик, кинэн ке тодматскыкуз, нылкышно ассэ Нинель Леонардовна Обаянцева шуылӥз.

Валамон ини, атаез солэн нокыӵе но Леонард ӧй вал, вордӥськем дырысеныз — Лёня. Но соглаш кариське: Леонард йӧно чузъяське. Нош фамилиез понна тау кароно картэзлы. Бызьытозяз Нинель вал Лизунова. Пичи дыръяз эшъёсыз сое нюлӥськись Нина шуыса исаллязы. Оло соин но нылмурт бызьыны но фамилизэ воштыны дыртӥз.

Табере Нинелез уд тодма ни. Мае воштыны луэ, ваньзэ воштӥз: нимтулзэ, улон интызэ, тусбуйзэ. Ёрмысагес улӥсь анай-атайзэ одӥг-ог чакланы вуылӥз ик, но сюлмыз куремъя ӧз, аслыз кулэ луыкуз гинэ, доразы кожалляз. Школаын но институтын дышетскем эшъёсыныз кусып ӧз возьылы. Мар соосын кушласькоз: кытын Нинель но кытын эшъёсыз?

Обаянцева ассэ туж яратӥз. Дораз но буяськытэк ӧз ветлы, халатъёсыз чик ӧй вал. Ветлӥз кильтро, шоголь. Квартираяз евроремонт лэсьтӥз. Коньдонлы ӧз ёрмы, уго бадӟым компаниын валтӥсь менеджер луыса тыршиз. Ваньмыз Нинельлэн чакламезъя, малпамезъя пӧрмиз кадь, картэз гинэ огъя суредэ тупамысь дугдӥз. Кызьы вал дас тямыс ар талэсь азьло огшоры механик, али но гайкаосты бергатъя. Огкылын вераса, нюлымтэ кунян. Анаез пиезлы юнме Тихон ним понымтэ, Тиша-колоша. Кӧня воштыны выриз Нинель востэм картсэ, кӧня дышетӥз, толыкез ӧйлась. Аръёс ортчемъя Тишалэн сямыз кышноезлэсь уката вожзэ поттыны ӧдъяз. Калык пӧлы уд потты, картэз кильтро дӥсяськыны ӧз яраты, одӥг джинсэ пыре ке, куштыны уг ни вала. Визьмо вераськонъёс мытыны уг быгаты, искусствоез уг вала, экономикаын воксё йыроме. Солэн ваньмыз туж огшоры. Тихонлэн яратоно кылыз: адямилы мар сётэмын ини. Яке эшшо тазьы шуэ: вуюисез адӟемед потэ ке, нырысь зорез чида. Шузи философия! Тӥни сыӵе малпанъёсын улӥз востэм кузпалыз. Ялан маке лэсьтыны выриз, квартирае кыӵе ке кортъёс вуттылӥз.

— Удалтымтэ Кулибин, — вожез потыса, картэз шоры кесяськиз Нинель. — Вань та кортъёстэ гаражад ну!

Картэз озьы ик кариз. Пичияк сад-бакча басьтӥз на, ӵужкушман, сяртчы, огреч будэтӥз. Марлы со ваньмыз кулэ, Нинель ӧз вала. Туала арын котьмае магазинысь басьтыны луэ ук. Нош картэз нылзэс но визьмалляз: асьме будэтэмез умойгес. Виолетта бубизлэсь кылзӥськиз, солы юрттӥськиз.

Нинель калык радъя одӥг нылпи вайиз ик, кыкетӥ пинал солы кулэ ӧй вал. Малы юнме мугорез но тазалыкез быдтонэз! Дыдыезлы ним но ачиз малпаз, картэз пумит вал ке но. Но Виолетта ним дыдыезлы шоголь луыны ӧз юртты. Нылмурт дэрем ӧз дӥсялля, кильтыръяськыны ӧз яраты, калык пќлы ӧз поталля. Малы ке медакадемие вамыштӥз. Табере кӧня ке сюрс манет понна адямиослэсь висёнъёссэс кылзыса улоз ини. Сямыныз но бубиз выжые кошкем, дӥсьтонэз гинэ шат мумизлэсь паласькем.

Кык огпаръёс, картэз но нылыз шоры учкыса, йыркурен шуылӥз Нинель. Со валаз ини, таослэсь пайда уд потты. Соин ик кышномурт матысьёсыз вылэ киыныз шонтӥз но синмаськон зарезе быдэсак зымиз. Обаянцевалы кельшиз уж дурысьтызы ик 30 аресъем Кирилл. Ох, кыӵе кылъёс вералляз егит мурт нылкышнолы. Востэм картэз сыӵе кылъёсты уг ик тоды, дыр. Тишаез сое шыпыт ӟыгыртоз, гондыр сямен ӝиптоз вал бордаз. Бен, кышнозэ ӧз обидьылы, но чебер вераськыны ӧз дышы. Одӥг-ог кузьымъёссэ но мултэс кылъёстэк гинэ сётылӥз.

Нинелез визьтэм кышномурт уд шуы, воргоронъёслэн учкемзылы со дышемын. Но Кириллэн уӵы кадь чирдэмез йырзэ поромытӥз. Егит пиосмуртлэн чебер кылъёсыз сое четлыке кырмизы. Кӧня ке толэзь ортчыса, Нинель ассэ дусымезтэк син азяз ӧз ни пуктылы. Кузпалыз сад-бакчаын ужаз, сиён пӧраз, нош кышномурт солы сюръёс будэтӥз.

— Ой, тынад синъёсыд бызись коӵышлэн кадь, соос монэ бордазы кыско но суто. Мынам тонтэк улэме уг луы, — туганзэ ӟыгыръяса, шуылӥз Кирилл.

Егит дусымезлы уката но кельшон вылысь кышномурт начармоно кариськиз. Соин ӵош одӥг-ог курытсэ ӟамыръялляз. Картэз тае адӟытэк ӧз улы:

— Нина, тон маке ӵем вина юыны кутскид кадь. Со диета шуонъёсыд но тонэ погыртозы ини. Астэ уд чакласькы. Инмар кыӵе сётэм, сыӵе вань ини, малы начармыны выриськод, мугорыд тынад сотэк но чебер.

— Мае тон валаськод?! Мон вань пинал дырме, чеберлыкме тыныд быдтӥ! Эн дышеты монэ улыны, эн ёрты! — черекъяз Нинель кузпалыз пумитэ.
Картэз ӧз ёрты ни, кошкиз улыны сад-бакчаяз, сьӧраз ик нылыз но вырӟиз. Нина шумпотӥз гинэ. Табере уго дусымзэ квартирае вайыны луоз. Кошкыкуз Виолетта мумизлы вазиз:

— Атай жаль потэ, малы меда со азьвыл валамтэ, тон астэ гинэ яратӥськод шуыса. Олокин астэ кожаськод. Эн вунэты, йырзэ урдэм мурт ваньмызлэсь ӝужыт уг луы.

Нылызлэн кылъёсыз шырпу выллем бышкалскизы ке но, Нинель матысьёссэ ӧз куты, дораз дусымзэ вайиз. Соиз, валамон ини, дышем сямен чирдӥз:

— Нинель, инкуазь мае ке чеберзэ кылдытэм ке, со одно ик тон гинэ.

Кышномурт гажанэзлы котыр ласянь юрттыны выриз. Солэн бызьылэменыз, Кирла отделэн кивалтыны кутскиз. Но будэтэм уждунэз кытчы ке чиптэм-чаптэм луылӥз. Нинель туганзэ ачиз сюдӥз, дӥсяз, калыке поттаз. Соин уго возьыт ӧй вал визьмо, йӧно адямиос пӧлтӥ ветлыны. Егит, чебер, вераськыны быгатэ, Нинель шоры яратӥсь синъёсын учке. Нылкышно квартираяз но куно ӧтчаны кутскиз. Но синмаськонэз огӝыт туж чаль тӧлӟиз. Куноос дораз дыръя ик Кирла валесазы егит дыдыез выдтэм.

— Возьыттэм, мар дауртӥськод, тон монэ яратӥсько шуид вал ук?! — кеськиз Нинель.

— Усьты синъёстэ, Нинуш, тыныд кӧня арес но мыным кӧня. Тон визьтэм кышномурт ӧвӧл ук, астэ сереме уськытэмед уг поты ке, мын куноос доры, эн люкеты милемлы.

Сыӵе йӧно куноос азьын возьытэ усён — Нинельлы дунне бырон. Соин ик кышномурт пальпотыса адямиос дӥне потӥз. Со учыр бере Кирла сьӧраз ортчиз. Нинельзэ песяй гинэ шуылӥз, улӥз солэн квартираяз ик, сииз-юиз нылкышно чотын. Егит нылъёс шедьымтэ дыръя Нинаез мусояз. Нылкышно малы ке таӵе ултӥямез чидаса улӥз.

Керӟегъяськемез тазалыкез вылын шӧдӥськытэк ӧз кыльы. Нинель больницае шедиз. Висёнзэ ӝог шараязы, язва, пе. Кирла больницае лыктӥз, юрттон вылысь ӧз, Нина дорысь кошке шуыса вераны.

Ӝытаз кышномуртлы эшшо урод луиз. Сое инсульт шуккиз. Табере Нинаез утялтыны кулэ, аслаз ӟигарыз ӧвӧл, мугорыз уг кылзӥськы. Нош кинлы со кулэ? Картэныз, нылыныз кусып уг возьы. Ӵош ужась эшъёсыз огпол вуизы. Валесысь кор кадь кыллись Нинаез адӟизы, кышказы но кошкизы. Эшъёсыз кышномуртлэн ӧвӧл. Озьы быдэс нуналъёсын кышномурт больница койкаын, улонзэ малпаса, кыллиз. Тодаз вайиз нылызлэсь кылъёссэ, мытылӥсьтэм но востэм Тишазэ. Уйвӧтаз ӵем адӟылӥз анаен атайзэ. Соос шып учкыса уло но, нылзылы номыр вератэк, кошко кадь, нош синъёсазы сомында курлан…

Нина бӧрдыса сайкалляз. Ведь со анайзэ но ватыны ӧз берта, ужысь ӧз мозмытӥськы. Нош бубиз улонысь кошкем бере вордскем юртсэс вузаз но азьвыл улонэз сярысь тодэ ваёнъёссэ тып-тып ватӥз.

Кылем уе Нина анайзэ адӟиз. Мумиз шуиз:

— Нылы, Тишадэ ӧть, со тонэ пыд йылад султытоз.

Капчи вераны: ӧть, ас понназ малпаське нылкышно. Оло, Тихонэз кыӵе ке кышномуртэ шедьтӥз ини. Озьы ке но, уйёсы изьыны луымтэ дыръяз, ачиз валатэк но, со картэзлэсь нимзэ шара вералляз: Тихон, Тиша…

Тишаез кылӥз. Кышноезлэсь ӧтемзэ ӧз. Нылызлэн эшез со больницаын ик практиказэ ортче вылэм, со ик вераз, Нинаен мар луэмын.
Картсэ но нылзэ валес дорысьтыз адӟыса, Нина ас синъёсызлы нырысь ӧз оскы. Макем со мӧзмем дуннеысь тужгес матысь но дуно адямиосызлэсь. Соос бордысь кыӵе ке гань-гань мылкыд лыктэ.

— Мар, сокем кышкыт луиськем-а? — шыпыт юаз Нина.

Картэз но нылыз чус сыло. Зэм но, кышномуртлэн ымнырыз огпалыз кырыжамын, ымдуръёсыз уг кылзӥсько, ӝыны мугорыз уг выры. Синъёсыз воштӥськемын: йӧнъяськон интые отчы дӥсьтӥсьтэм луон каръяськем кадь.

— Мар тон озьы вераськиськод, асьмеос тани сад-бакчае мыном, атаен џош тонэ бурмытом, — анаезлэсь йырсиоссэ маялляз Виолетта.

Нина вуиз пичигес коркае. Тиша сое парем турын-куаръёсын секталляз. Люкам кортъёслэсь кыӵе ке мудрон валес лэсьтӥз. Со пери шуккем муртъёслы малпамын. Та бордын Тиша кемалась выре ни вылэм. Виолетта но мумизэ эмъяз, табере ведь со врач ини. Озьы, куазь кезьыт луытозь, соос бакчаын улӥзы. Нина бодыен ветлыны кутскиз. Толалтэлы бертӥзы городысь квартираязы. Нылкышно чидатэк тулысэз витиз, сюлмыз пичи сад-бакчаяз куриськиз.

— Тиша, кыӵе мон шузи вылӥськем, инкуазьлэсь чебер луэмзэ ноку но ӧй адӟылы кадь. Тонэ нюлымтэ кунян, удалтымтэ Кулибин шуылӥ, нош тон тӥни кыӵе вылэмед, мон со визьтэм, — картэзлэн пельпум вылаз йырзэ поныса, лулӟиз Нина.

Нош соиз, азьло сямен ик, гондыр кадь ӝиптӥз бордаз кышнозэ но шыпытак шуиз:

— Вуюисез адӟемед потэ ке, нырысь зорез чида.

Ирина Коурова.
Яр посёлок
Ӟуч кылысь берыктӥз Галина Семёнова.
Суредаз Вера Штыкова

Удмурт Дунне
By Удмурт Дунне Август 16, 2013 10:15