Уваысь воргорон Уватын но тодмо

Удмурт Дунне
By Удмурт Дунне Август 6, 2013 11:34

Уваысь воргорон Уватын но тодмо

В. Яковлев

В. Яковлев

Уваысь кибашлыез Виктор Яковлевез, асьме шаерын сяна, ӟеч тодо Тюмень улосысь Уват черкогуртын улӥсьёс. Удмурт воргорон 2009-тӥ арын отын ортчем калыккуспо ӵошатсконэ пыриськиз. Солэн «Торомлэн пиез» куинь метр ӝуждалаем пу скульптураез вань ужъёс пӧлысь тужгес но учкисьёслы кельшиз.

— Та уже лэсьтэмын ханты но манси калыклэн эпосэзъя, — вера Виктор Егорович. — Гондыр, валтӥсь инмарлэн пиез, кияз возе адямилэсь пиналзэ, пельпумаз пуке кырныж. Калык мадемъя, та тылобурдо каньыл ивор вае. Уйпалан улӥсьёс солэсь лымшорысь вуэмзэ кыӵе ке но умой воштӥськонъёсын герӟало.

— Кытысь потэмын чеберлыкез валанды, киужлы дышемды?

— Мон вордскемын Пичи Пурга ёросын. Удмурт кун университетэз йылпумъяса, сюри татчы, Увае. Туж яратӥсько инкуазез. Кытчы ке потӥсько ке, ялан суредасько вал. Пичи дыръям ик лусйиськон, вӧлӥськон тӥрлыкен выри ни. Атай сьӧры весь ветлӥ, корка ӝутыкуз но, юрттӥськыны выри. Но бадӟымгес вамыш лэсьтӥ университетын. Отын пластилинэн, горд сюен ужаны дыши, пӧртэм пумо арбериос, животъёс, адямиос лякылӥ. Собере ини пу борды басьтӥськи. Со бордысь дугдэме ӧз луы ни.

— Уно адӟытонъёсы пыриськыса, котькудаз выль уж возьматӥськоды, нош асьтэлы маке выльзэ басьтӥськоды-а?

— Одно ик. Одӥг пол адӟыса, весь мынэм потэ. Куинь пол ветлӥ ини Мордовие, Салехардын ужме возьматӥ, туэ тани куинетӥзэ ӧтё ни Тюмень улосэ. Мукет кибашлыосын тодматскисько, соослэсь маке выльзэ тодӥсько. Котькуд быгатӥсьлэн аслаз ужан амалэз. Сыӵе адӟытонъёс выль кужым сёто, оскыто: тон огнад ӧвӧл, лэсьтэм ужед уз быры. Тодон-валан басьтонлэсь ноку но кепыраны кулэ ӧвӧл.

— Суредъёслы дыр шедьтӥськоды-а?

— Одно ик. Мон пыремын ӧвӧл ай суредасьёслэн огазеяськоназы. Озьы ке но ужъёсме возьматылӥзы ни «Большая Волга» адӟытонын, Уваын сяна, выставкаосы ортчылӥзы Ижын, Казаньын но мукет интыосын. Тужгес но сюлэмыя луэ графика. Берло дыре туж кельше ужаны скульптураосын. Тани берлозэ ветлӥ Сыктывкаре, калыккуспо симпозиумын излэсь ужме возьматӥ. Изэн кема выроно, со пырдэ, тузон пурӟе, соин ик очкиен, респираторен, наушникен ужано луэ. Из, пуэн ӵошатыса, скульптуралы матынгес. Малы? Пулэн сиосыз вань, соос люкето вӧлыны, нош ӟеч сизэ шедьтӥськод ке, со юрттэ ужаны. Соку малпан куинь поллы чебергес пӧрме. Нош изэн ужаса, валаськод, кызьы пырдытыны, малпанэд син азьын вордӥське. Пулэн вань аслаз шунытэз, аслаз чеберез. Куд-огез корка пуктэ но сое буя, мон малпасько, озьы солэн чеберез ыше. Из чурыт, кие кутӥськод ке, кезьыт. Но быгатыса ужад ке, пушкысьтыз шунытсэ поттыны луэ.

— Котькуд суредасьлэн аслаз темаез. Мар тӥледлы матын?

— Мыным кельше семья, пинал, анай, яратон сярысь ужъёс кылдытыны. Аръёс ортчемъя юнгес валаны кутскиськод ни та кылъёслэсь дунзэс. Тани Саранске ветлыкум, ужме сӥзи атаелы, «Гондыр воршуд» нимаськиз со. Паспортэзъя буби Егор вал, нош вань гурт калык Гондыр шуиз, нош милемыз, солэсь пиналъёссэ, гондырпиос.

— Кылем толэзе тӥ пыриськиды Лудорвайын ортчем пу скульптураосъя вожвылъяськонэ. Огаз номинациын вӧрмиды.

— Фестивальлы быръем инты туж кельшиз. Лэсьтэм ужъёс ӵапак интыяз пуксизы. Ӵошатскон ортчем бере мон нылыным юри отчы ветлӥ на. Отын ужаку, тыпыр-тапыр лэсьтӥськод, дырез но, уждэ но уд чакласькы ни кадь. Соин ик гань-гань кариськыса ветлӥ.

Шумпотӥ дунъямзылы. Нырысетӥ инты сётӥзы Удмуртиын парк скульптураез азинтонъя номинациын. Ужме-композициме мон сӥзи анаелы. Со удмурт песянай, айшетэн, кышетэн, капка азяз потэм но учке, пиосы ку бертозы ни шуыса.

Со малпан кемалась йырам пуке ни вал. Ми мемиелэн куать кузя. Куинез гуртын уг уло бере, анай сюлэм возьма соосты котьку но.

Иван Аркашев
Туспуктӥз Владимир Беломорских

Удмурт Дунне
By Удмурт Дунне Август 6, 2013 11:34