Селянка сиыны пыралэ!

Удмурт Дунне
By Удмурт Дунне Август 6, 2013 10:51

Селянка сиыны пыралэ!

Селянкаез чугун горшокын пӧзьтоно

Селянкаез чугун горшокын пӧзьтоно

Шаерамы улӥсь мордваос 2009-тӥ арын кылдытӥзы «Умарина» огазеяськонзэс. Солэн кивалтӥсезлэн воштӥсез Татьяна Шкляева маде:

— Мукет выжы калыкъёсын ӵошатыса, Удмуртие ми йыромем туриос выллем шедемын. Ваньмы сямен направлениосъя ужаны ыстэмын. Кылсярысь, Удмуртиын пор но бигер гуртъёс вань ке, мордваос сярысь озьы вераны уг луы. Сояз я таяз ёросын дэмен улӥсьёс но ӧжыт. Берло ортчем лыдъян-чотан возьматӥз, Удмуртиын улӥсь мордваос ваньмыз-ӧвӧлэз 1 сюрс пала люкасько, нош быдэс Россиын — 800 сюрс мында.

Мордваос эрзя но мокша кылын верасько. Татьяна Шкляева эрзя сямен бӧтьыртэ. Удмуртъёс сямен ик, мордва калык но шулдыръяськыны яратэ. Арлы быдэ июнь толэзе Ижысь Кызьпу арамаын «Балтай» калык праздниксэс ортчыто. Та нуналэ мордваос данъяло Виряву нюлэс кузёез но Гондырез. Соин ик куноос пӧлысь кинэ ке бырйыса, Гондырлы пӧрмыто, быдэсак бадяр куаръёсын шобыртыса. Бӧрысь со котыртӥ вань калыксы шулдыръяське.

Сиён-юон сярысь ке верано, эрзяослэн тужгес яратоно сиёнзы селянка, лапшенник, арям, поза но мукетъёсыз.

Чапомо ловцо (быректэм йӧл)
Йӧлэз 3-4 час пӧсь гурын пӧзьтоно, куренялэс тус пыӵатозяз. Сӥямез бере кӧня ке пуньы йӧлвыл ватсаса, эшшо 2 час пукетоно на. Быректэм йӧл дась.

Селянка
Кулэ: быгыт сӥль — 100 грамм, мус — 70 грамм, сюлэм — 100 грамм, пекля — 100 грамм, ты — 90 грамм, 1 йыр сугон, 1 ӵужкушман, сылал.
Сиёнэз умойгес луоз чугунын пӧзьтыны. Быгыт сӥлез юдоно тазагес, пекляез (со пинал пудолэн ке — нимаз пӧзьтоно ӧвӧл), сюлэмез, тыэз, мусэз — векчигес. Ватсано на сугон, ӵужкушман, лавр куар но пӧсьтурын. Пӧзьтоно пытсэттэк, лым вылысь шукызэ октыса. Ӝӧк вылэ пуктоно пыжем яке пӧзьтэм картошкаен но сылалтэм огречен ӵош.

Лапшенник
Кулэ: 10 курегпуз, йӧл, крахмал, сылал, вӧй.
Крахмалэн мильым пыжоно. Сое векчи юдыса, пыжиськон корт лист яке таба вылэ вӧлдоно. Курегпузэз йӧлын шукконо но, мильым вылэ кисьтыса, выльысь пӧсь гуре пыжыны пуктоно, зарни тус пыӵатозяз.

Чечы кисаль
Кулэ: ӝыны литр ву, 100-150 грамм чечы, 1 пуньы крахмал, ӝыны стакан (яра тросгес но) нюрмульы (клюква) яке ягмульы (брусника), 2-3 пилет сакыр но 2-3 чечы пуньы сакыр песок.
Чечыез, пӧсь вуэн сураса, быректытоно, вылысьтыз шукызэ басьтоно. Отчы ватсано вуэн суралтэм крахмал но ӝог сурано, сакыр ватсано. Кисаль напчыны кутскиз ке, емыш йылтыса, эшшо 2-3 минут пӧзьтоно.

Удмурт Дунне
By Удмурт Дунне Август 6, 2013 10:51