Нугылиен шыд

Удмурт Дунне
By Удмурт Дунне Август 20, 2013 10:27

Нугылиен шыд

75Семьяме паймытэме потӥз. Шуозы: тямыс арес гинэ ай, нош со шыд пӧзьтыны быгатэм ни. Эх, ушъялозы ук! Нугылиен пӧрам, кылдэ ньылод, шуозы. Мон ачим туж яратӥсько нугылиен шыдэз. Пересь нэнэлы но со туж кельше. Оло пиньёсыз ӧвӧлэн, оло мукет муген тазэ со ӵемгес пӧзьтэ но, ымпушказ мугылляса-мугылляса, кема-кема сиыны выре. Со мугыллямез туж мусо адӟиське! Мон ноку озьы уг сиськиськы. Кытысь ке кылэме вань: котькуд ымтыр сиёнэз 36 пол кушано, собере гинэ ньылоно, соку ӝушед умой ужалоз, пе. Нырысетӥ пуньы сиёнме рос-прос сыскыны вырисько ик ай, нош отӥяз чидан чиге но, кушатэк ик быдэс тусьтыме ньылӥсько. Шудыны потыны уг вуы ни кожасько, лэся.

Нош туннэ ачим шыд пӧзьто. Бакчаын бычыяськись вож кальчаез юдыса поно. Уг вунэты лавр куарез! Нэнэ сое адӟемпотостэм каре ик: кузял шӧмыз, пе, вань. Но туннэ мон пӧраськись ук. Мынам шыдам лавр уз кузялӟы!

Но кытын пӧзьтом ай? Огаз кострюльын — толон ӝыт сиыса быдтымтэ картошка пунем. Анай сое бушатыны вунэтэм. Нэнэ но почтае пенсиез дуре кошкиз. Отысь олоку вуоз ай. Нош со анайлы индылӥз вал: пунемдэ эн кисьты — парсьпиослы сюдо, пе. Ма, анайлэн посуда бушатыны дырыз но ӧй вал. Быдэс ӝытсэ нылпиослэсь дорысь ужзэс эскериз. Нош ӵукна вазь ик кошкиз, совещание, пе, райцентре люкало. Сыӵе дыръя со воксё катьтэммыса бертэ. Сютэм вуиз ке, шыдэлы туж шумпотоз!

Пичи мискаез кутоно шат? Нош атай но сютэм вуиз ке, кинлэн гинэ кӧтыз тыроз? Шкап пыдэсын одӥг чебер кострюль кемалась улэ ни. Таӵе бадӟым нунал дыръя — мон пӧрасько ук — сое кутыны сьӧлык уз луы, вылды!

Быдэс йырыным кылтыр-колтыр ик зыми шкапе. Шедьтӥ со кострюлез. Ӵуж-ӵуж чиля, ӵабтӥськем интыез ик ӧвӧл! Бордаз кыӵе ке бумагаез но вань на. Зэм, со ӵужектэмын ни — гожтэмзэ лыдӟыны уг луы. Кытын но ку поттэмын шуыса, верамын вал, дыр.

Со бумагаез ӵабъяса ик ву улын гылтӥ. Миска тыр кезьыт ву лэзи но плита вылэ пуктӥ. Ачим холодильник доры дыртӥ. Со куспын асме индылӥ: сӥльзэ ву быректэм бере пононо, шуэ анай, озьы, пе, шӧмыз ческытгес луэ.

Курег макесъёсты миськи но ни. Кальчаез но, бакчаысь пыртыса, вандылӥ, нош вуэ ялан уг быректы. Возьмаку дыр туж кема кыстӥське вылэм. Быректы ни, собере картошез паланы кутско, шуи вулы. Нош солы номыр кадь ӧвӧл. Миска пыдэс кольыртыны кутскиз, вупульыос лӧптыны ӧдъязы гинэ, мон сӥлез вуэ куштӥ ни. Ачим картошка палан борды басьтӥськи. Тани мисько, юдо но нугыли лэсьтыны кутско. Кеносысь пызь пырто, курегпуз шукко, сылал поно — адӟоды ай, кылдэс ньылоды!

Шӧдтэк шорысь нэнэ бертӥз. Сумказэ, вормыса но вормытэк, гур азь пала нуэ. Тросаз басьяськем таид. Котьку сямен одно ик пряник-печення, мороженой вайиз, луоз. Эх, шулдыр нунал — зэмос праздник.

— Нэнэ, тон кырын поръя на. Шыдэ пӧзиз ке, пырыны косо, — вази мон, шыдме огнам пӧраме потэмен — пересьмы одно юрттӥськоно кожалоз ук, монэ пичи на карыса.

Нош нэнэ, та кылъёсме кылыса, куалектӥз, лобась папа кадь, чабкиськиз. Миска шоры синъёсыз усем бере быдэс ымнырыз, кузял пот сием бере кадь, кузялэс луиз. Пичиесь синъёсыз солань-талань бызьылыны кутскизы. Ымыз усьяське, нош куараез уг поты. Интыысьтыз ишкалскиз, кострюль борды, пӧсез шӧдылытэк, гольык киын кырмиськиз но шыдме парсь сиён ведрае кымалтӥз. Ӧб-ӧб-ӧб шуыса, кострюльзэ кана вылэ пуктӥз. Сутӥськем киоссэ пелля ук, пелля. Кранысь бызись кезьыт ву улэ донгыны турттэ ни вал соосты. Вузэ но лэзиз. Но шуак кранзэ бералтӥз но выльысь бызьыса дыртӥз кострюлез доры.

Мон интыысьтым вырӟыны ик ӧй дӥсьты ни. Асме парсь сиён ведрае донгоз кадь йӧтӥз. Юай ик: тон мар дауртӥськод? Но нэнэ монэ воксё ӧз кылы кадь. Синвуаськиз. Кострюльзэ, пичи пиналэз музэн, бордаз ӝиптӥз но музэ ланьыраз. Эх, маялля ук посудазэ. Бӧрдӥсь пиналэз буйгатыны выре, кожалод. Шораз пелляса но утча. Маке кыла-бура. Нош маялтэ, нош чупа.

— Нэнэ, тон ӧд шузимы-а? Мон нугылиен шыд пӧзьтӥсько вал!

Та кылъёсы вырњытӥзы сое — шорам, йырзэ сэзъяса, кӧтӝожен учкиз. Собере мырдэм кылымон сипыртӥз: кинлэсь юад тон, яра-а сое йӧтылыны шуыса?

— Шузимемед кадь тон, нэнэ, — вази мон, — шыдэз арам карид. Нош мон тэркы пыдэсам сугонъёсты кельтӥсько ке, йыркуръяськонэдлы пумыз ӧвӧл: тазьы сиськид ке, ванез ноку уд адӟы, шуиськод. Нош ачид курег макесъёсты но ӧд жаля.

Тазьы куаретэмме нэнэ воксё но уг возьма вал кадь. Гуньдӥз. Огдырлы шокамысь ик дугдӥз кадь. Бератаз гинэ мур-мур лулӟиз:

— Тон монэ али уд вала, нылы.

— Мае мон валаны кулэ? — йыркуре нокызьы буйганы уг вала.

— Та мискаез Ерофей кузьмаз вал ай. Вордӥськем нуналам. Шумпотто кожаз. Нош мынам малы ке кӧты ӝож луиз: тынад интыед гур азьын шуэмез потэм кадь. Дэрем я басма кузьмамзэ возьмасько вал соку. Воштӥськон дӥсе умой ӧй вал ни. Егит дыръя дӥсяськем потэ на ук. Оло кунэрскемме адӟыса, оло малпанъёсме лыдӟыса, Ерофей каньылак вазиз: вуж кострюльмылэн пыдэсыз усе ни, соин ик басьтӥ выльзэ, нош дэрем дуре ӵошен мыном. Базарозь пыдмы ӧз сузьы. Ерофеез ферма гидысь мозмытскем ош лекаса, пыд улаз лёгаса, вииз. Нош адӟемпотостэм кострюлез самой дуно арберилы пӧрмиз, — синвуаськиз пересь. — Сое киям кутӥсько ке, туннэ ке но Ерофее тодам лыктэ: мынясь, таза, чебер. Валтӥсь зоотехникын ӧй ужасалыз ке, оло, туннэ ке но ӵошеннамы со кострюльысьтыз шыдэз ӟузьылысалмы на.

— Шузимемед ик кадь тон, нэнэ. Кулэм карттэ мискаен ӵошаты ай…

Йырме сэзъяса ик, кошки соку дорысьтыз. Кострюльзэ шкапысь бератаз ӧй адӟы ни — пыдло ватэм, лэся. Кулон азяз гинэ кытысь ке поттӥз сое. Соку нэнэме пичи йыр визьмыным валаны ӧй пӧрмыты. Солэн шӧдонэз, солэн вӧсез дорозь сузьтӥськыны ӧй вормы.

* * *
Алигес куать аресъем нылы зыретэн табань пыжыны куриз. Шкапысь посудаос пӧлын кылтыр-колтыр бугыръяськыны кутскиз. Кытысь-марысь шедьтӥз ни ӵыж-выль табаез. Дораз вуытозям, пыдэсаз кӧсвӧй но кисьтыса вуттӥз. Нош мон куалектӥ. Табаез лыптыр-лоптыр киям кутӥ но бордам юн-юн ӟыгыртӥ. Вӧесь луэмме ик ӧй шӧдылы. Вордэм нылылы сётыны кыӵе ке таба жаль потӥз! Ачим но жалясько ай сое кутылыны. Пилиськоз кадь — сокем утьыса возисько. Со табаез кузьмаз вал картэ мукет кышно доры кошкемезлэсь азьвыл. Ачиз кошкиз, нош табаез туннэ но дуно. Синпеле со мынам. Пукон вылэ кечырскыса ик, сое пыдло-пыдло ватӥ. Нёжто пересь нэнэе кадь, со табаез кулытозям утьыса возё?

Елена Сараматова
Суредаз Вера Штыкова

Удмурт Дунне
By Удмурт Дунне Август 20, 2013 10:27