Юмал йӧлпыд — ческыт

Удмурт Дунне
By Удмурт Дунне Август 20, 2013 10:14

Юмал йӧлпыд — ческыт

Туала егитъёс - мукетэсь

Туала егитъёс — мукетэсь

Алигес, книга ӝажыме бугыръякум, син шорам йӧтӥз Григорий Даниловлэн «Пинал мылкыд — юмал йӧлпыд» книгаез. Ӧй чида — выльысь лыдӟоно кариськи.

Куинетӥзэ-а, ньыле-тӥзэ-а лыдӟисько ини та книгаез — ялан аслым мар ке выльзэ усьтӥсько. Котьку со мынэсьтым мылкыдме бугыртэ, малпаськонэ уськытэ, гор-гор серекъятэ.

Нырысьсэ та повесть киям сюриз, школаын дышетскыкум. Та дырозь одӥг удмурт книгаез но таӵе ӝог, пушказ ик выйыса, лыдӟеме ӧй вал на. Школаысь удмурт литературая дышетскон программае пыртэм проза огвыллемгес, соин ик мӧзмыт потэ вал, нош Григорий Даниловлэн повестез сюлмам пыриз. Валамон ини: мыным, 16 аресъем нылашлы, тунсыкогес вал лыдӟыны егитъёсты сюлэмшугъятӥсь ужпумъёс сярысь, нош колхоз ӝутон матын ӧй вал. Дыр ортчыса, удмурт классика шоры учконэ воштӥськиз ик — но, «Пинал мылкыдэз…» сямен, одӥг книгаез но сокем ӧй яраты.

Мадись герой — егит нылаш, солэн синмыныз возьматэмын педучилищеын кыкетӥ курсын дышетскисьёслэн улонзы: дышетскемзы, эшъяськемзы, ченгешемзы, ог-огзэс валаны, гажаны тыршемзы, маскаръяськемзы, янгышамзы, ӧч каремзы, дышетӥсьлэсь ужзэ ас вылазы мертамзы… Паймоно, кызьы автор сыӵе мур но оскымон быгатӥз возьматыны ас пуш дуннеяз выем егит нылашлэсь психологизэ. Оля Зараевалэн малпаськон сямаз — со быгатэ ачиз но эшъёсыз шоры палэнысен учкыны — шӧдыны луэ аслэсьтыз писательлэсь куаразэ. Озьы арлыдо адями тодаз вае егит дырзэ, аслыз ачиз дунъет сётэ: кытын со шонер ужаз, кытын янгышаз. Но со куара пичи но уг люкеты лыдӟисьлы син азяз егит нылашлэсь образзэ пуктыны. Олялэн образэз книгаын туж бадӟым инты басьтэ ке но, со мыным повестьлэн валтӥсь героез уг поты. Со ке ӧвӧл, кин меда?

Али ӵем кылӥськом: туала егитъёс, пе, азьло кадесь ӧвӧл ни. Зэм, мукетэсь. Но со урод ӧвӧл ук: дыр ортче, улон воштӥське, нош воштӥськон — со улэп луэмлэн тодметэз. Котькуд вакытысь егитъёс азьвылэзлэсь висъясько улон шоры учкеменызы, сямъёсынызы. Но вань егитъёсты, туалаоссэ-а басьтом, дас, сю, оло, сюрс ар талэсь азьло улэмъёссэ, огазеясь маке вань — со пинал мылкыд. Ӵапак та мылкыд — юмал йӧлпыд — Даниловлэн повестяз валтӥсь герой луэ.

Егитъёс но ог-огзылэсь висъясько: вань шаплыез но востэмез, шыпытэз но алякез, шулдыръяськыны яратӥсез но ас пуш дуннеяз выемез. Г. Данилов быгатӥз кылдытыны зэмос галерея: котькудӥз лыдӟись, ӵош дышетскем эшъёссэ тодаз вайыса, быгатоз ӵошатыны соосты книгаысь геройёсын но шедьтыны огпаръёсты. Котькинлэн классаз вал, дыр, визьмо но лэчыт кыло Тамаша Пашаез, ваньмыз понна кыл кутӥсь Марина Журавинаез, востэм Клара Константиноваез, лӧптэм Слава Олеговез, чебер Люся Серёгинаез… Котькудзэ соос пӧлысь мон, кема адӟымтэ эшъёсме сямен, шумпотыса пумитасько книга бамъёс вылысь.

Егитъёслы егитъёс сярысь нылашлэн нимыныз гожтэм книга — тазьы шуыны луоз та повесть сярысь. Озьы ке но тунсыко луоз сое лыдӟыны арлыдоослы но — юмал вакытсэc тодазы вайыны нокинлы мултэс уз луы.

Анастасия Шумилова
Туспуктэмез: voljskiy.bezformata.ru

Удмурт Дунне
By Удмурт Дунне Август 20, 2013 10:14