Яраез яратэ губи

Удмурт Дунне
By Удмурт Дунне Август 6, 2013 11:17

Яраез яратэ губи

02Сюро таза пудолэн ымпушказ ӵем-а учкылӥськом? Оло, воксё но ум. Но кулэ вылэм арнялы одӥг пол ке но чакланы актиномикоз висёнлэсь выжыяськемзэ адӟытэк кылёнтэм вылысь.

Скалъёсмылы сиён поныкумы но, оло азьтэммы вормыса, оло пудоез робот кожаса, турын я куро пӧлы сюрем чурыт модосо жагез гинэ но ум палэнтӥське. Сыскоз ай, малпаськомы, лэся. Пудо йырйыны выроз ик. Но ымпушсэ тульӟытъялоз-ӵабъялоз. Пумен пиньёсыз но бырыны кутскозы. Нош вӧсь луэм интые туж ӝог лякисько пӧртэм микробъёс но губиос.

Тужгес зол яратэ яраӟектэм ымпушез актиномицет губи, со улэ куро, ю тысь, фураж пушкын. Та губи выжызэ скаллэн кыл вылаз я улаз, аныз улэ лэзьыны кутскоз. Будэмезъя интыяз зӧк лёг кылдыны ӧдъя, котырысьтыз куэз ик пульдэ. Тазэ котькудӥз пудо вордӥсь синйылтыны быгатоз ни.

Куд-ог пудо эмъясьёс киосазы пурт кутыны дырто. Пыктэм бервылэз вандо, пушкысьтыз губизэ йылсо пуньыен конгыръяло, интызэ тазато, йод суретэн сузяло но берен кышъяло.

Мугор чот туж кема сиськыса улэм губи ан улысь куэз куддыръя ачиз ик пася. Куддыръя пилиське но, ур но вир вияса ик, куасьме. Но тазьы висёнлэсь ас кожаз ортчемзэ возьмад ке, пудоед кулоз. Губи уго вераяз но, тӧдьы сэръёсаз (лимфоузел) но кырмиськыны быгатоз. Сыӵе дыръя скаллэн мугорыз ӟырдалоз.

Соин ик кияды йод кутэ, вуэн кизертэ но скаллэсь кылзэ зыраны выре. Нокызьы но уг сётскы ке, растворез ымаз кисьтэ. Ымпумъёсаз солэн пиньёсыз ӧвӧл. Соин ик ымзэ ачиз ӧз усьты ке но, отӥ эмъюм пазьгыны быгатоды.

Со сяна, пыктосаз 4-5 нунал ӵоже пуктылоно пенициллин яке окситетрациклин. Озьы ик антибиотикъёсты пуктылоно таза интыяз но. Скалды йӧналоз.

Артысь гидын парсьёс уло ке, таосты но губи норыны быгатоз. Ыжъёс но кечъёс соин шер черлало. Но чакласькон вылысь таослэсь но ымпушсэс йод суретэн гылтоно. Сода но яралоз.

Пудодэс утемды потэ ке, куроез но кӧс турынэз парыса сётъялэ. Котьку озьы выремды уг поты ке, эмъян вакытады ке но сакгес кариське. Соку ымпушкыз уз ӵабъяськы ни.

Екатерина Михеева,
пудо эмъян наукаосъя кандидат

Туспуктэмез: powerpic.ru

Удмурт Дунне
By Удмурт Дунне Август 6, 2013 11:17