Изъянтӥсьлэн сайкан дырыз

Удмурт Дунне
By Удмурт Дунне Август 6, 2013 11:25

Изъянтӥсьлэн сайкан дырыз

Фитофторозлы шокчыны маза ӧвӧл сётоно

Фитофторозлы шокчыны маза ӧвӧл сётоно

Август толэзьлэн ӝыныез июле берытскемын, ӝыныез сентябрь пала учке ни. Валтӥсь ужъёс та вакытэ герӟаськемын бакча сиёнэз утялтонэн но сое толлы дасянэн.

Таяз гужем ваньмыз кисьма, вуэ дырызлэсь вазь. Шунытэз яратӥсь будосъёслы туж удалтӥз, соос пӧлын — помидорлы. Но август толэзь та бакча сиёнлы кышкытлык вае. Фитофтороз вӧлмемен валче, шӧдтэк шорысь вань емышъёс бырыны шедё. Арысь аре висён пыдлогес но пыдлогес пыре. Соин ик помидорлы одно бадӟым саклык висъяно.

Берло эскеронъёс возьматӥзы, та бакча сиён котыр ласянь туж пайдаё шуыса. Со узыр пӧртэм витаминъёсын. Кылсярысь, ӵужектӥсь яке гордэктӥсь помидорын С витаминэз кӧнялы ке гинэ ӧжытгес цитрус выжыысь емышъёслэсь. Помидор уте сюлэм но пыктос висёнъёслэсь, юнматэ лулсэръёсты, сюлэм быгытъёсты, юрттэ нюръяськыны паласькись висёнъёсын. Соин ик та ческыт емышез тросгес сиыны тырше.

Нош кызьы утьыны луоз будосэз кышкыт висёнлэсь? Помидорез изъянтӥсь вань висёнъёс пӧлысь фитофтороз тужгес кышкытэз но паськыт вӧлмемез. Солэн адскисьтэм губиосыз котькуд бакчаын вань. Тулыс, озьы ик июне-июле висён ассэ номырин уг шӧдыты, умме усьыса сямен улэ музъемын, кылем-мылем будосъёсын.

Августлэн нырысетӥ нуналъёсаз куазь шуак воштӥське: уйёсы 10 градусозь шуныт возиське, омыр но музъем мускытало зоръёслэсь но лысвулэсь. Тӥни соку ик сайка изись висён. Солэсь вӧлмемзэ соку ик шӧдыны уг луы. Вуж куаръёс но модосъёс шобырско курень но пурысь виштыосын, собере сьӧдэкто но куасьмо сяська потонъёс, отӥяз сисьмыны ӧдъяло соку гинэ кылдэм но будыны вуэм емышъёс.

Одӥгез, кыкетӥез модос аля висёнэн, собере со туж ӝог палаське мукет пудъёсы. Дас аръёс талэсь азьло бырыны шедьылӥз ке куиньмосэз будэтэм емыш, али ваньмыз сямен уродмыны быгатозы. Будосъёсты утён борды туж вазь басьтӥськыса но, куддыр пайдаез трос уг луы. Соин ик фитофторозлы шокчыны маза ӧвӧл сётоно, котыр ласянь нюръяськоно. Вераме потэ аслэсьтым утиськон амалъёсме.

* * *
Берло дыре будэтӥсько вазь вуись но гибрид выжы помидоръёсты. Соос емышсэс сёто ни июль пумозь, висён вӧлмемлэсь азьло. Августлэн нырысетӥ нуналъёсаз берпуметӥ вож помидоръёсты бичасько. Пусйымон, берло дыре пӧртэм фирмаос басьтӥськизы вазь вуись выжыосты кылдытон борды. Тросэзлы, удъёс потэм дырысен емышсы кисьматозь, 85 нунал гинэ кулэ!

Убо вылын но парникын пӧртэм выжы помидоръёсты будэтыса оскалтӥ. Тужгес но яратӥ таӵеоссэ: «Афродита», «Капитан», «Маршал», «Легионер» но «Розана». Соос тупалозы Россиысь вакчи гужемен вань улосъёслы. Вазь вуэм сяна, емышъёслэн шӧмзы но ческыт.

Помидоръёсты вожен но октыны луэ, висёнлэсь вӧлмемзэ возьмаса улоно ӧвӧл. Вазь вуисьёссэ тырше 5-тӥ-10-тӥ августозь утялтыны. Та дырлы мон вань пудъёсты ишкасько ни, ӧжытак куасьтыса, сутӥсько: висён зол алямын ӧвӧл ке но, азьланяз со улӟыны быгатоз. Вераны кулэ, губи тэчкыос аръёсын возисько музъемын, теплицаослэн, парникъёслэн борддоръёсазы. Соин ик бакча сиёнэз утялтэм бере, вань ӧсъёсты но укноосты ворсаса, теплицаосты, парникъёсты ӵынатоно «ФАС» шашкаен.

Луонлык вань ке, котькуд аре вошъялэ помидор убоез. Азьвыл интыяз мерттыны луоз, куинь ар ортчыса. Озьы ик картошка вӧзы интыяны уг яра — та будосъёслэн висёнъёссы одӥг выллемесь. Теплицаосын та ласянь шуггес, интыысь интые соосты котькуд аре уд выжты.

Гужемлэн кыкетӥ ӝыныяз, будосъёсты калий но фосфор удобрениосын сюдыса, емыш ӟечгес удалтэ, висён но ӝега. Суретэз кисьтано выжыосы. Азот удобрениосты (пень, суперфосфат, сернокислой калий) та вакытэ палэнтоно. Нош куаръёсты пызйыны луоз суперфосфатлэн 5 процентъем суретэныз: 50 грамм тыр гранулаосты 1 литр пӧсь вуэн кисьтоно, одӥг сутка пукетыса, 10 литр вуэн суралтоно.

Висён вӧлмыны кутске вужмем улӥ куаръёс бордысен. Озьы ик куар пӧлы ышем будос но тӧлатэк ӝог уродме. Соин ик июльлэн пумаз улӥ куаръёсты вандылӥсько. Но одӥг кутскемен куинь куарлэсь тросгес уг яра шератыны.

Июльлэн шораз будосъёслэсь йылъёссэс емыш ваёзь вандӥсько, вылӥяз кык-куинь куар кельтыса. Нош июль пумын помидор пудъёсысь вань урдэс вайёссэс (пасынокъёсты), озьы ик сяська потонъёсты но сяськаосты утялтӥсько. Озьы емышъёс трослы вазьгес кисьмало.

Июльлэн пумаз, августлэн кутсконаз будосъёсты кык-куинь пол пызйисько чесноклэн но марганцовкалэн суретэныз. Чеснок пилетъёсты яке гумыоссэ векчиятӥсько. 10 литр вулы кулэ 1,5 ӝыны стакан чеснок. Эмъюм уката ӟечгес пӧрме, отчы 1 пуньы мисьтаськон порошок яке виртурынлэсь нап суретсэ йылтыса. Пызйыны луоз таӵе суретэн но: 10 литр вулы кулэ 40 шапык йод но 30 грамм хлористой калий.

Гужем ӵоже куинь-вить пол пызйыны луоз ыргон (медь) суретъёсын (медной купорос, бордосской сурет, картоцид, «Ордан», «Хорус»).
Висён алям бере бичам помидорез но сисьмонлэсь утьыны луэ. 2 минут ӵоже возёно 60 градус пӧсь вуын, собере куасьтоно. Яке емышъёсты 4-5 минутлы интыяно 40 градусъем пӧсь духовкае.

Венедикт Дадыкин,
тодосчи, агроном
Туспуктэмез: udmfoto.ru

Удмурт Дунне
By Удмурт Дунне Август 6, 2013 11:25