Убоысь эксэй ныл

Удмурт Дунне
By Удмурт Дунне Июль 2, 2013 11:16

Убоысь эксэй ныл

 

Убоын кисьма узы

Убоын кисьма узы

Кисьмалоз гужем ӵоже

Июнь-июль — узы (виктория) кисьман вакыт. Ческыт но тазалыклы бадӟым пайда вайись емыш гужем ӵоже мед шумпоттоз шуыса, пӧртэм вакытэ кисьмась выжыосты мерттыны кулэ.

Трос аръёс ӵоже эскеронъёс ортчытыса, монэ узы пудъёсы емышъёсынызы котькуд гужемзэ куинь толэзь пала шумпотто ни. Со понна бакчаям пӧртэм сортъёсты мерттӥ.

Магазинъёсын но рынокъёсын ӵемгес вузало вазь но шоро-куспо вуись выжыосты, соосты уго калык тросгес басьтэ. Таосыз вӧзы одно ик тырше на бер кисьмасьёссэ мерттыны. Жаляса верано, таӵе сортъёс трос ӧвӧл, уката ик туала куронъёслы тупасьёсыз.

Бер вуись узыос пӧлын кемаласьгес тодмо ни «Зенга Зенгана», «Ред Гонтлет», «Холидей», «Золушка». Но выль сортъёсын ӵошатыса, соос ӟечлыксыя берегес кылемын. Нырысетӥез висёнъёслы, зоро куазен сисьмонлы сётске; кыкетӥезлэн шӧмыз сокем ческыт ӧвӧл; куинетӥез кезьыт толъёсы кынмыны шеде; берпуметӥез векчи кыле, висе.

Россиын поттэм бер вуись ӟеч узыос пӧлы туннэ пыро «Боровицкая», «Альфа» но «Царскосельская». Емышъёссы бадӟымесь, тол кезьытъёслы, вошъяськись куазьлы, висёнъёслы уг сётско. Кунгож сьӧрын поттэмъёсыз пӧлысь пусйыны луоз «Богота», «Тотем» сортъёсты, но таоссэ сӥзьыл ворсаны кулэ луоз.

Августэ но сентябре узы сиемды потэ ке, быръе ремонтант выжыосты — кык пол емыш сётӥсьёссэ: «Трубадур», «Женева», «Тристар», «Королева Елизавета». Соос кыкетӥ емыш сёто августэ-сентябре. Но ӟырт кезьытъёсты та сортъёс уг ярато: трос кужым быдто емыш кылдытонлы, пушъетсы ӧжыт луэ, емыш сётонзы ичиёме. Вылӥ верам узыос пӧлысь мыным тужгес кельше нырысетӥез.

Бадӟым емышо узыез будэтэм сяна, дэмласько векчизэ но мерттыны, кылсярысь, «Барон Солимахер», «Золотинка». Соос емышенызы бер сӥзьылозь шумпоттозы.

Куар сюдэ емышез

Узы пудъёслы бадӟым саклык висъяны кулэ емыш сётэмзы бере но.

Одно ик жаг турынзэ уроно — та будос уг яраты бускельёссэ. Удобрениен сюдоно, пӧсь куазен ву кисьтано, выль пушъетъёссэ утялтоно — вӧлмытыны кельтэмъёссэ сяна.

Тросэз юало: кулэ-а ӵышкыны узы куаръёсты? Висёнэн яке нымы-кибыосын зол алямын ке, соку гинэ куаръёсты вандылоно. Но та ужез одно быдэстоно июль пумозь. Будосъёсты гольык кельтыса, емыш кылдонлы дасяськем интые, соослэн вань кужымзы кошкоз выль куар потонлы. Вуоно гужемзэ ӟеч емыш эн возьмалэ. Озьы ик куартэк кельтэм пудъёс толалтэ кынмо. Котьма ке но тодады возе: макем трос будослэн таза куаръёсыз но макем кема соос вож возиськозы, сокем со тросгес емыш сётоз.

Куазь кема дыр ӵоже кӧс но пӧсь улэ ке, узы пудъёсты вотэс лемтэй (паутинный клещ) одоле. Куаръёс изъянмо, куасьмо. Сыӵе дыръя будосъёсты ӝегатскытэк пызъёно ядо суретъёсын. Кык арня ортчыса, нош ик пызъёно. Кутыны луоз «ФАС» таблеткаосты. Та амалэн ик утиськыны луоз кубисталэсь но пӧсьтурынлэсь куаръёссэс сиись нымы-кибыослэсь, вожтэйёслэсь (тля).

Узыез сямен ик, бакчае мерттыны луоз вазь но бер вуись емышо будосъёсты: сутэрпуэз, эмезез, крыжовникез, вишняез…

Венедикт Дадыкин, тодосчи, агроном

Удмурт Дунне
By Удмурт Дунне Июль 2, 2013 11:16