Сюресъёс воляло, ӧсъёс усьтӥсько

Удмурт Дунне
By Удмурт Дунне Июль 1, 2013 18:21

Сюресъёс воляло, ӧсъёс усьтӥсько

 

О. Корепанова

О. Корепанова

Инвалидъёсты калыке поттонъя пӧртэм ужрадъёс кутӥсько. Соосты быдэстыны инъет луиз элькунамы 2011-тӥ-2015-тӥ аръёслы кутэм «Доступная среда» программа.

Со сярысь вера калыкез улон-вылонын утёнъя министр Ольга Корепанова.

— Ольга Андреевна, малы кулэ вал элькунамы «Доступная среда» программаез кутон?

— Туннэ нуналлы республикаямы инвалидъёслэн лыдзы 119 сюрс 500, со пӧлысь 5 сюрс 130-эз — нылпиос. Котькудӥзлэн семьяез, матысь адямиосыз вань. Соин ик таӵе программа туж кулэ вал. Уката ик 2008-тӥ арын Россия гожтӥськиз инвалидъёслэн правооссыя ООН-эн юнматэм конвенция улэ. 2012-тӥ арын 25-тӥ октябре со улонэ пыӵаз. Инвалидъёслэсь улонзэс капчиятон понна Россия Федерациын кутэмын 2011-тӥ-2015-тӥ аръёслы «Доступная среда» программа.

Программа азьын сылӥсь валтӥсь ужпум — ветлыны курадӟись инвалидъёслы, озьы ик арлыдоослы но нуныоссэс коляскаен нуллӥсь анайёслы пӧртэм интыосы пырыны-потыны луонлыкъёс кылдытон. Озьы калык пӧлын инвалидъёслы юрттон мылкыд но пыӵалоз.

— Программаез улонэ пыӵатон понна мар лэсьтэмын ни кык ар куспын?

— 2011-тӥ-2012-тӥ аръёслы элькун бюджетысь 20 миллион 154 сюрс манет висъямын. Инвалидъёслэн улон-вылоназы тужгес кулэ луись 14 учреждениосы пандусъёс, кутӥськон интыос но машина пуктылон интыос лэсьтэмын. Сукыръёс но кылӥсьтэмъёс понна отын озьы ик нимаз юрттэт чакламын. Калыклы социальной юрттэт сётӥсь но культурая 21 учреждение инвалидъёслы чаклам нимаз оборудование но техника пуктэмын. Синтэмъёслэн элькун библиотекаязы но городысь 2 библиотекаосын компьютер классъёс усьтэмын. Кылӥсьтэмъёслэн огазеяськонэнызы ӵош радъямын 12 сурдопереводчикъёсты но тифлосурдопереводчикъёсты дасянъя курсъёс. Кык ар куспын сурдопереводъёсын 450-лэсь ятыр ивортонъёс дасямын. Республикаысьтымы городъёсын 4 сюрс пала инвалидъёслы юрттэт сётэмын социальной такси пыр.

2012-тӥ арын республикамы пыриськиз медико-социальной экспертизаез но инвалидъёслы юрттэт сётонэз дуннеын кутӥськись куронъёсъя радъян проектэ. Сое улонэ пыӵатон понна шуге-леке усемъёсын ужась министерствоос но ведомствоос юнматӥзы учреждениосты, кудъёсаз радъямын ас понназы ветлыны шугъяськисьёслэн кулэяськонъёссыя нимаз юрттэт. Со учреждениос пӧлын аэропорт, Ижысь куд-ог больницаос но Медико-социальной экспертизая валтӥсь бюролэн юртэз.

— Лыдэ басьтӥсько-а инвалидъёслэн мылкыд каронъёссы?

— Пусъеме потэ, программаен чаклам ужпумъёсъя министерство кенеше инвалидъёслэн огазеяськонъёсынызы. Ӵошен эскериськом инвалидъёслы кулэ луись социальной обьектъёсты, кыӵе юрттэт сётӥське отын. Министерстволэн сайтаз нимысьтыз карта но кылдытэмын. Та дырлы 400 пала сыӵе интыос пусъемын ни. Инвалидъёслэн ӵектонъёссыя карта ялан выльдӥське.

Туннэ нуналлы тужгес но шугъяськытӥсь ужпум — улон квартираос, подъездъёс, юртъёс уг тупало инвалидъёслы, тужгес но коляскаен ветлӥсьёсызлы. Кылсярысь, ӧс кусыпъёс сюбегесь, сьӧросъёс но мисьтӥськон комнатаос соослы чакламтэ. Подъездъёсын ӧвӧл коляскаен тубон-васькон пандусъёс. Программаын та ужъёс чакламын, но быдэстыны соосты туж секыт. Тросэз юртъёс пуктэмын уго совето вакытэ. Но 8 улон интыез выльдыны быгатӥмы ни.

— Ольга Андреевна, кытысь но кӧня коньдон висъяське программаез улонэ пыӵатонлы?

— Вить ар куспын 438 миллион манет висъяны чакламын, со пӧлысь 237 миллионэз — элькун бюджетысь. Программаез быдэстонлы федерал бюджетысь коньдон ӧз висъяськы кык ар ӵоже. Асьме республикаен висъямзэ кутӥмы интернат юртъёсты ӟечомытонэ. Туннэ нуналлы Сарапулысь инвалидъёслы колледж сукыръёслэн, кылӥсьтэмъёслэн но ветлыны шугъяськисьёслэн кулэяськонъёссыя тупатэмын.

Туэысен «Доступная среда» программалы 50 процентэз коньдон висъяське Россилэн бюджетысьтыз, 50 процентэз — асьме бюджетысь. Россия 58 миллион манет келяз ни. Юрттэтлэн огъя быдӟалаез туэлы 133 миллион манет чакламын ке, со пӧлысь 57 миллионэз — республикалэн бюджетысьтыз, 17 миллионэз — Ижевск городлэн. Нош вуоно арысен программаез быдэстон борды итӥськозы интыосысь аскивалтон ёзъёс. Котькуд муниципал кылдытэт дасяны кулэ ветлыны курадӟись инвалидъёслэсь улонзэс капчиятонъя программа. Отын пусъёно, кӧня коньдон кутӥськоз та ужъёслы.

«Арлыдоослы, инвалидъёслы но секыт югдуре шедем семьяослы социальной юрттэт сётонъя» трос аръем программазэ улонэ пыӵатон понна туэ Ижевск город администрациен чакламын школалэсь азьло визьноданъя учреждениосты, сюрес вамен выжон интыосты, транспортын ветлонэз инвалидъёслэн кулэяськонъёссыя выльдыны.

— Кыӵе ужрадъёс чакламын на туэлы?

— Инвалидъёслэн но палэнэ потаны шугъяськисьёслэн мынон-ветлонзы капчиятэмын луоз. Тазалыкез утён, культура, спорт, калыклы улон-вылонын юрттэт сётӥсь учреждениосы соос капчиенгес шедьыны мед быгатозы. Кылсярысь, Тазалыкез утёнъя министерстволы висъямын 14 миллион манет. Ижевск городысь 7 номеро больницае, Можга городысь эмъян юртэ, син эмъянъя элькун больницае пандусъёс, тубатъёс лэсьтоно. Нош пыктос висёнъёсъя больницалы кылиз на сьӧросъёс, чылкытатскон комнатаос но машина пуктылон инты лэсьтыны.
30 миллион манет висъяськоз Мугорез кыдатон культурая, спортъя но туризмъя министерстволы. Та коньдонэн выльдӥськозы Кулакова, Демидов нимо, «Чекерил» спорт комплексъёс, «Ижсталь» йӧ дворец. Пӧртэм категориосысь инвалидъёс нокыӵе шугъяськонъёстэк пырыны-потыны, шутэтскыны мед быгатозы отын.

Шуге-леке усемъёсты калыке поттон понна кӧня ке ужрадъёсын гинэ тырмыт ӧвӧл, со — нуналысь нуналэ быдэстоно уж. Котькуд учреждение котькуд адямиен ужаны дась медло.

Сергей Захаров

Удмурт Дунне
By Удмурт Дунне Июль 1, 2013 18:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*