Кырӟаса кылбурась

Удмурт Дунне
By Удмурт Дунне Июль 16, 2013 12:49

Тазьы шуыны кулэ Иосиф Бобров сярысь. Инвожо толэзе 70 арессэ пусйиз ни, нош мылкыдыныз котьку егит. Алнаш ёросысь Сизьгуртын вордскем кылбурчи вань улонзэ вордскем палъёсызлы, школалы, комсомоллы сӥзиз. 1983-тӥ арысен кутскыса, поттӥз кӧня ке кылбур бичет: «Пыштурын», «Гужеме выже тулыс», «Ӵук тӧл», «Тулыс мылкыд», «Сизьгурт чуръёс. Сизьгурт гуръёс».

Иосиф Петровичлэсь лэйкыт ӧръяськись чуръёссэ соку ик синйылтӥзы крезьгурчиос. Та дырлы, оло, сю мында кырӟанэз люкаськиз ни. Тужгес тодмоесь ас пал эшъёсызлэн П. Кузнецов но С. Кириллов крезьгурчиослэн гожтэмъёссы.

Иосиф Бобров — Удмуртиысь Писательёслэн огазеяськонзылэн ёзчиез.

Комбайн
Горд шунды инвис
йылтӥ ик
Питырскиз но ватӥськиз.
Нош комбайн ветлӥз, ветлӥз но
Жадьыса, лэся, дугдӥз.

Кускозяз ик выйыса, со
Сюрс котыр лудын лэсьтӥз.
Ӧз, ӧз вутты валаса но —
Аранэз йылпумъяськиз.

Со колоннаын бертоз ни,
Эшъёсыз вӧзы дугдоз.
Вуоно аран дырозь со
Шутэтскоз но выльдӥськоз.

Уз, нокин сое уз валты.
Уз ни тайдыре ужен.
Уйвӧтаз но лулӟылоз ни:
— Ку вуоз выльысь гужем?

Лобе улон
Валъёс лобо, валъёс.
Уг йӧто пыдъёссы.
Дагаосысь — тылъёс,
Тӧлъя изнэсъёссы!

Валъёс лобо, валъёс,
Сюлэм шудэ, кырӟа.
Шулто, вольтчо тӧлъёс,
Ширтэ паймем ульча.

Валъёс лобо, валъёс,
Кылё лудъёс, шуръёс…
Макем умой, эй-эй!
Я, эн кышка, мемей!

Валъёс вортто, валъёс,
Лобо чырткем, пезьгыт.
Аръёс ширто, аръёс…
Улон лобе озьы!

Кыл
Сьӧд кылэз кылыса,
Улон ӧр но ыше,
Малпатэк,
Дыртыса
Кылын эн шуд, эше!

Ӝыны кыл но тырме
Сюлэмез чигыны,
Мылкыдлэсь бурдъёссэ
Дэрие лёганы.

Кыл ӧвӧл пукыӵ ньӧл,
Нош мертче сюлэме.
Кыл эмъюм но ӧвӧл —
Кужмогес, эмогес!

Кыл — со йӧ. Кыл —
со тыл.
Со ӵушка но кынтэ.
Сюлэмысь потэм кыл
Куинь толэзь но
шунтэ.

Уӵы но шушы
Шушы кылоз шат уӵыез?
Толлы уг кыль татчы уӵы.
Кытысь ке но уйпал
шаеръёсысь
Кезьыт куазен лыктэ шушы.
Ӵыжыт улмо выллем шушы гадез
Мед адӟысал огпол ке но уӵы.
Льӧмпу садысь жингрес уӵы гурез
Уз кыл, уз кыл ноку шушы.
Уз эшъяськы уӵы но
шушыен,
Пырак дырлы соос
люкиськемын.
Асьме улон, лэся,
со выжые
Берыктонтэм ик
мынэмын.

Уг маялля ноку
йырсиостэ,
Ымдуръёстэ уг чупалля ноку.
Уйвӧтъёсам гинэ
ветлод тон ӵем,
Шушы доры —
уӵы музэн…

Вунэтӥд ке но…
Льӧль шунды пуксиз ке но,
Тыр толэзь ӝужаз ке но,
Сьӧд пилем лыктӥз ке но —
Возьмало тонэ.

Кытчы ке кожид ке но,
Вожой шур
куасьмиз ке но,
Тон монэ ыштӥд ке но —
Мон шедьто тонэ.

Италмас тӧлӟиз ке но,
Чипчирган чалмиз ке но,
Сюресэд ышиз ке но —
Ярато тонэ!

* * *
Инбамлэн чеберез
Чагыро-чагыро.
Дуннелэн чеберез
Шудбуро, шудбуро.
Шундылэн чеберез —
Та улон, та улон.
Улонлэн чеберез —
Яратон, яратон!

* * *
Дас укмыс аресъем пиос
Султӥзы эзельлы
пумит.
Ышизы-быризы соос:
Гомак!
ньылӥз
пеймыт.

Тросэзлэн шайгузы но ӧвӧл.
Келясьтэк кылизы
нылъёс.
Ой! Шудо-а, шудтэм-а тӥ вал,
Кызь витетӥ
арын
вордскемъёс?!

Кӧл, шаере!
Вылэтӥ, Сямвыр бамтӥ,
Дыртыса сюрес кошке.
Мон уг кӧлы на али,
Вамышто. Толэзь
пиштэ…

Гондыргурт гурезь улын
Чус уммен кӧлэ, вӧта.
Сымвырйыл нош
Четкерен
Каньылля сое ветта.

Казённой, Ушкоп нюлэс
Шунтозы
Гондыргуртэз.
Вожой шур, Тӧдьы
ошмес
Удозы юзмыт вузэс.

Я, бен, кӧл, мусо шаер!
Лу тон котьку но чебер!
Кӧлондэ ми сак утём,
Шундыен ӵош
сайкатом!

Удмурт Дунне
By Удмурт Дунне Июль 16, 2013 12:49