Курыт чечы

Удмурт Дунне
By Удмурт Дунне Июль 16, 2013 10:44

Курыт чечы

Г. Парфёнов

Г. Парфёнов

Верос

Пересьёслэн юртазы улон огсыр мынэ. Дыраз сюдо, утялто. Нырысетӥ этажын телевизор ужа, радио вераське. Котькуд улӥсьлэн нимаз комнатаез. Ма, скал выдымон кадь гинэ ке но, нимаз. Сиськем бере кин киуж кутэ, кин яратон сярысь книга лыдӟе, кин кроссворд «йыръе», кин телевизор азе пуксе. Одӥг липет улын улыса, кыре-буре потатэк, арлыдоос ог-огзылэсь куддыр кыӵак акыльто-жадё, но кытчы пырод… Уноезлэн нылпиоссы я ӧвӧл, я кулэмын, я юон бекчее выемын. Пенсия басьтон нуналэ кин но со матысьёссы вуо ик. Коньдонлы. Бӧрысь быдэс толэзь пыдзэс уг лёго.

Нунал бӧрсьы нунал… Кенакъёс телевизор азьынгес пуко, нош поръяны быгатӥсь воргоронъёс кин азбаре, кин корказе потэ. Пуко, тамак пурккето. Соос пӧлын ик Ашинькей но. Так-то паспортъя со Арсентий, но гуртаз малы ке Ашинькей шуо вал. Арлыдын пересь ӧвӧл на. Чылкыт, ӝикыт дӥсяськемын. Ӵукна ик электробритва борды кутске — туш лэзьыны вазь ай. Сукыр кылемез бере воргоронэз та юртэ интыязы. Огыр-бугыр вераськонэ со уг пыриськы. Шыпак гинэ сэргын пуке, ӵемысь ас малпаназ выемын. Эк шу, таӵеен-а со малпа вал пересьмон даурзэ?

* * *
— Ой, Ашинькей, мар бон байланӥд ни со мушъёсыд борды? Мед ял карозы, ма, чечымы тырме ук, — лавкаысь вуэм Одоть куаш гинэ каре кышнопалан.

Ашинькей уг вазьы. Всё равно аслэсьтыз каре. Ас дыраз со колхозын усто тракторист вал. Пенсиозь кык ар но ӧз кыль ни вал — колхоззы шальтраз, нимыз но пунэм тыронъёсыз гинэ кылизы на. Ашинькей сялӟиськиз, матькетӥз но ма карод — огшоры трактористлэсь нокин ӧз но юа, ӧз но вера. Ярам, мушъёсыз сюдо. Тани али но мушкась дыртэ. Вазьгес кыскиз-тубиз ке, дуноенгес вузалоз. Азьпалтоно Куӵосысь мушкасьёсты. Гужем шорын чечы дуногес, валамон, дыртоно вузаны, чечы шукы кадь медаз лу. Ашинькеед хитрой: тодэ, чечы рамъёсыд буш ке, мушъёс нош но нош лобо мӧль бичаны. Огез жаль, колхоз кир-пазь луэмен, бусыос жаген, полынен алямын, а ведь кыӵе клевер бусы вал! Отын кӧня гужлазы мушъёс. Ярам ай, беризь чебер сяськая, но со пӧсьтолэзе гинэ усьтӥське. Кыкетӥ кыскемез-тубемез бере воргорон толлы умортое трос чечы уз кельты — сакыр сироп дася.

Ваньмыз умой кадь, но Ашинькейлэн сук сямыз куддыр вань умойзэ ӵуше. Уксёзэ Одотезлы туж уг адӟыты: кышномуртлэн, пе, Ашинькейлы осконо ке, уксёез адӟемез уг лу, одно ик со-та басьтоно кожа. Соингес ик Одоть кузёеныз ӵемысь керетэ. Ёрос пичи бере, Одоть отысь но, татысь но кылэ, вузам чечыды, пе, чырсаны кутскиз. Возьыт ук. Соин ик Одоть кылэмзэ картэзлы верано кожа. А соизлы — дунне: ваньзэ пель сьӧртӥз лэзе.

…Нырысь кыскем чечызэ Ашинькей пу тэркые понӥз, алюминь посудаын шӧмыз, пе, воштӥське. Одоть ас понназ вуӵкетӥз ке но, самоварзэ быректӥз ик. Вӧй но поттӥз, тӧдьы нянь но шормаз: кадырлано выль чечыез. Нырысь веръяз кузё, собере — кышноез. Но ма ай та? Выль чечызы — курыт, полынь шӧм. Ашинькей ма карыны ик паймиз, эсьма, пуньыез кияз лякиськиз кадь. От лешак ке лешак. Ма, табере кароно та кузял, курыт шӧмо чечыен? Ярам коть, ляб муш семьяосты-палэпъёсты ӧз иса, соизлы тау. Оццы-таццы шаплы-шаплы вузалоз ай. Соиз ласянь Ашинькей мастак ни, дышемын вуз карыны.

Нош ишанзы вылэм ай азьпалан… Ашинькей далайгес шӧдӥз ни вал, огез синмыз бус пыр адӟыны кутске шуыса. Нырысь арлыд вылэ чӧлскиз, бӧрысь вунӥз но вунӥз. Одотез кӧня вераз: мын да мын ни першал доры. Кузёлэн пигонэз но ӧз вырӟы. Бер сӥзьыл, мушсэс мурӝолэ утялтэм бере, дыр шедьтӥз ик больницае ветлыны. Першал катаракта шуиз. Мае возьмаса, пе, улӥды.

— Дак, уж уг быры, — ма но со нукыртӥз воргорон.

Операция но ӧз ни юртты: бер вазиськиз уга. Со куспын висён каллен-каллен бур синмаз но лякиськиз.

…Одоть арлыдын кузпалызлэсь бадӟымгес. Ашинькей доры куинь аресъем «пирданэн» лыктӥз. Одотьлэсь нылзэ Ашинькей аслэсьтыззэ кадь ик будэтӥз, но кудӟем дыръяз Одотезлы сьӧлыкамзэ тодаз вайытылӥз. Бӧрысь кышноез пи вайиз, ну, эркияз ини Ашинькей пиёксэ. Во, мушкась луоз, трактор, машина басьтоз, пе. Пиезлы соиз но, таиз но кулэ ӧз лу. Укмысэтћ класс бере ик Иж заводэ кӧчиз, гуртэ пилем улысь шунды кадь шер возьматскылӥз. Ярам коть, нылзы умой семьяе бызиз. Сьӧр гуртын ке но, ӵем вуылэ анай-атаез доры.

Оло фермаын секыт ужамез, оло вирзӥбетэз шуак гинэ погыртӥзы Одотез. Син куспын куасьмиз, ява. Ашинькей шып гинэ бӧрдӥз корос вӧзын. Яратӥз-а, ӧз-а кышнозэ — уд тоды. Улӥзы-вылӥзы огпорма.

Кышноезлэн арез но ортчиз меда, ӧз меда — Ашинькейлэн кыкетӥ синмыз но бусаськиз. Адӟон огназ уг ветлы вылэм. Толйись муш семьяос чалмизы: оло шыръёс пыриллям, оло висён алям. Конешно, мурӝолэ Ашинькей огназ ӧз ни васька — бускелез учкиз-чаклаз. Всё, пе, пумыз. Сакыр сиропен ӟеч толъёд шат?

Анайзы кулэм бере Ашинькеез чакланы нылыз-пиез, ма, эмеспиез но вуылӥзы ик. Нылыз дораз Якшуре ӧте вал. Атайзы ӧз вырӟы, улон интызы ӟоскытгес уго. Пиез но городэ чортэ вал. Юрттэ вузаса, квартирамес бадӟыматом, шуиз. Тодэ: атаезлэн уксёез но трос люкамын. Ашинькейлы та вераськон ӧз кельшы. Юртэз но ӝик-ӝик, садэз но емыш сётэ, бакчаез но кыедамын. Уг, уг вуза юртме — аслэсьтыз кариз Ашинькей. Ас понназ малпаз: оло, кин ке но кышномурт со доры улыны лыктоз. Гуртсэс пичи уд шу, ма, карттэк кылемъёс вань гинэ. Только туала арын кышноослэн ляльчи чотын улэмзы уг пот ни. Куанер Одоть чидаз ке, чидаз ни. Выль дӥськут но басьтыны ӧз дӥсьтылы, лавкае но шер-тур гинэ кожалляз. Кур ай Ашинькеедлэсь уксёзэ — беда, даллашон ӝутоз. Шып гинэ улӥз но кулӥз Одоть, эсьма, коньдон но кулэ ӧвӧл ни…

Родной пиез картошка октэм бере пыдзэ но ӧз ни лёга атаез дӥне. Улод ке, улод ас коркаяд, шуиз. Городэ Ашинькеез бӧрысь чортӥсь ӧз ни лу. Ачиз но янгыш, дыр, сыӵеосты акырӟан ӝуш юнме уг шуо.

Толэзь но, кык но улэ Ашинькей ас корказ. Ярам ай, кузпалызлэн ӵыжы-выжыез учке-чакла. Воргорон газ плита борды уг ни кутскы: курда, тылпу-мар потоз шуыса. Сукыр адями электроплиткаен чай но мар быректэ-дася ик. Юрттыны социальной ужась юнматӥзы. Но соиз кема ик ӧз чида. Ашинькей уг оскы, сиён-юонлы, тыллы, эмъюмлы, телефонлы сомында коньдон кошке шуыса. Юрттӥськись таӵе вогъяськись, тэкшерись адямиен ужаны соглаш ӧз ни лу.

* * *
Ой, шуген дыше та улонлы Ашинькей. Ярам коть, толэзь пала ини солэн пичи висъетаз Зоя нимо кышномурт пыралля. Удмурт адями со, тожо алигес вуэмын, мӧзме гуртэзлэсь, бускельёсызлэсь. Картэз кулэм, нылпизы вылымтэ. Нош арлыд, висён уг юало.

Ашинькейдэ табере уд ни тодма. Ымныраз кемалась вунэм пальпотон пыриз. Ӧс усьтӥськемъя ик воргорон тодма: Зоя вуиз.

— Арсень, мон тыныд пӧсь чай вайи, пыштурынэн, — либытак гинэ вазе куноез.

— Тӥледыз кышнояно ини, — шоккето бускельёссы, — ато шампань юэм вунӥз ни.

Ашинькей соглаш. Палтури сямен огнад уд улы ук. Шер-тур чакланы вуылӥсь нылыз-пиез но соглаш. Ма, ог-огзылы юртто ке, ӵошен умой, капчи ке — мед улозы. Только Зоялэсь ӧз на юалэ ай. Пумит уз луы, дыр. Дыртонэз ӧвӧл — улон кузь.

…Пересьёслэн юртазы вуэмез бере Ашинькейлы чечы веръяны ӧз ни кылды. Ӵектӥсь-вузась пыраз вал, но воргорон кылэм но ӧз кары. Улоназ со трос чечы сииз ни. Ческытсэ но, курытсэ но… Оло, со уйвӧт гинэ вал?

Ӧсэ каллен йыгаськись луиз. Зоя, дыр. Вунэтоно ни со кузял чечы сярысь. Йыгасько. Куанӥз Ашинькей, уске, сое уг вунэто. Ма, озьы ик мед луоз ни, улон гумыр кузь ай.

Геннадий Парфёнов

Удмурт Дунне
By Удмурт Дунне Июль 16, 2013 10:44