Коман мелна — куинь полэс кыстыбей

Удмурт Дунне
By Удмурт Дунне Июль 2, 2013 10:39

Коман мелна — куинь полэс кыстыбей

Н. Телицина

Н. Телицина

Шаерамы 10 сюрс пала поръёс уло, «Одо Мари Ушем» огазеяськонзы кылдытэмын 1996-тӥ арын. Солэн кивалтӥсезлэн воштӥсез Нина Телицина сям-йылолъёссы но пӧраськон амалъёссы сярысь мадиз.

Та вакытэ поръёс тросэн уло Грак, Алнаш, Каракулино но Сарапул ёросъёсын, озьы ик пумиськыло Вотка, Сюмси но Пичи Пурга ёросъёсын. Каракулино ёросысь Ныргында но Усть-Сакла, Гракысь Пор Вожой (Мари-Возжай) гуртъёсысь школаосын пор кылэз дышето.

— Ачим мон Каракулино ёросысь Ныргында гуртын вордски, туж шулдыр вакытэ будӥ, — вера Нина Телицина. — Гуртамы пӧртэм шулдыръяськонъёс ортчытъязы. Туннэ кадь ик тодам возисько январь толэзе радъяськись Шорчол шулдыръяськонэз. Чидатэк витиськомы вал со нуналъёсты, 7-тӥ январёзь нылпиос понна шулдыръяськонъёс ортчылӥзы, 14-тӥ январёзь — бадӟымъёс понна. Праздник дыръя котькуд ульчаысь одӥг коркаез кузёез лэземъя одӥг ӝытлы быдэсак бушато но котыр ӟусъёс пуктыло вал. Со юртэ быдэс ульчаен шулдыръяськыны люкаськылӥмы, кырӟаса-вераса мукет ульчаысь корка потылӥмы.

Со сяна, арлы быдэ котькуд пор гурт кыӵе ке бадӟым юмшан радъя. Кылсярысь, Ныргындаын — Окра шудон, Быргындаын — Петрол нунал, Мари-Возжайын — Казанское. Озьы ар ӵоже быдэс шаерысь поръёс со гуртъёсы ветло, вашкала йылол-сямъёсты чакласа, пересьёссылы йыбыртто. Праздникъёс дыръя коркаосты куэм но пужъятэм ӵушконъёсын чеберъяло. Со возьматэ корка кузёлэсь узыр луэмзэ.

Одӥг шулдыръяськон но ческыт сиён-юонъёстэк уг ортчы. Удмуртъёс сямен ик, поръёс но пыжиськыны ярато. Тужгес гажало кыстывеез (асьмеос кыстыбей шуиськомы) но коман мелнаез — со куинь полэс кыстыбей шуэмез возьматэ. Ыльняньзэ кыстыбейлы сямен дасяло. Векчи кыстыбейёсты гур азьын пыжо. Дасяло кузятэмлэсь пушкес: кузятэм, йӧлвыл, кӧня ке нӧкы вӧй. Ваньзэ курегпузэн шуккыса, пыжем кыстыбейёс вылэ векчи зырано но нош ик гур азе пуктоно. Кыстыбеез, гур азьын парем йӧлэ веттылыса, сиё.

Удмуртъёс сямен ик, поръёс но пудо вандэмзы бере виртырем — шокты — лэсьто. Пушкеслы басьто: вир, векчи чабей кеньыр, пудолэсь пуш кӧйзэ, сылал но чеснок. Гажало гурын пыжем курегпуз шуккемез — моноварчик, со омлет выллем. Вирлэсь лэсьтэм котлетъёссэс бюрказла шуо. Нош сюзэс юзмато пураен, полан торыген (сюкась выллем юонъёс). Шолтэкензы (аракызы) но вань.

Пура (сюкась)
5 литр сюкасьлы кулэ: 300 грамм куасьтэм гордкушман, 10 грамм туг, 10 грамм маял, 100 грамм сакыр, 100 грамм ӵужъем, кырым мында изюм.
Гордкушманэз, векчи юдыса, гуре 5-6 часлы парыны пуктоно, посудаяз кӧня ке ву ватсано. Емышез гурын возёно куасьмытозяз, ӧжытак мед куаштыртоз. Бӧрысь со гордкушманэз толэзьёсын возьыны луоз.
Дасяно ӟег пызьлэсь ӵужъем. Ӟегез удатоно, 3-5 сантиметр ӝужда будэтоно. Удам ӟегез пызьыртоно но изоно. Куасьтыса дасям гордкушманэз, пӧсь ву ватсаса, 2-3 час пӧзьтоно. Парем гордкушманэ ӵужъем, туг ватсано но эшшо 20-30 минут пӧзьтоно. Суретэз сӥсъяса сӥятоно но маял, сакыр но изюм ватсано. Одӥг нунал сылэмез бере сюэз юзматӥсь юон дась луоз.

Шӧран ковышта (йӧлэн кубистаен шыд)
Кулэ: 200 грамм кубиста, 90 грамм картошка, 330 грамм йӧл, курегпуз, сылал.
Плита вылэ пӧзьтыны пуктоно йӧл. Кубистаез но картошкаез юдоно. Быректэм йӧлэ нырысь ик ватсано кубиста, 2-3 минут ортчыса — картошка. Шыдэз пӧзьтоно 15-20 минут, плита вылысь басьтон азьын ватсано шуккем курегпуз но шӧмызъя сылал.

Бюрказла (вирен котлет)
Кулэ: кӧй, вир, пызь, пичильтык сылал но сода, 1-2 курегпуз.
Ваньзэ, тусьтые поныса, суралтоно но котлетъёс лэсьтоно. Соосты пӧзьтоно шыд лымын.

Шуэн шыд
Мискае пононо чылкыт сузям шу, сакыр кушман, ӟег пызь, сылал, ву ватсаса, гуре пуктоно. Та шыдэз пӧсьгес дыръяз сиё пыжиськемен.

Паренге мелна (картошлэсь оладьи)
Кулэ: 280 грамм картошка, 1 бадӟым пуньы тӧдьы пызь, 5 курегпуз, 1 чечы пуньы сода, 10 грамм шунтэм нӧкы вӧй, сылал. Ӝӧк вылэ пуктон понна — 25 грамм йӧлвыл, 20 грамм чечы яке нӧкы вӧй.
Картошкаез векчи вуштоно, пызь, шуккем курегпуз но сода ватсано. Ваньзэ суралтыса, сьӧдэктыны кутскемезлэсь азьло таба вылын пырсатоно.

Валентина Емельянова

Удмурт Дунне
By Удмурт Дунне Июль 2, 2013 10:39