Азвесям чуръёс

Удмурт Дунне
By Удмурт Дунне Июль 16, 2013 13:00

Удмуртиысь ӟуч поэтъёс пӧлын Герасим Иванцов огез адскымонэз. «Запах дождя», «Прямая речь» но мукет сборникъёссэ поттӥз. Удмурт кылбурчиосты, фольклорез но ӟуч кылэ берыкъяз, соос пӧлын — Ф. Кедровлэн «Этой жизни», Н. Байтеряковлэн «Серебряная лодка» бичетъёссы.
Герасим Степановичлэн вань улонэз сӥземын шаерамы ӟуч газетъёсты поттон удыслы. Та нуналъёсы со пусйиз 65 арессэ.

Писпу
Йӧн-йӧн будӥз писпу
вожектыса,
Пырак инме, оло,
учкиз йылыз.
Кужымезлы, вылды,
вожъяськыса,
Погыртӥзы сое пыд
вылысьтыз.

Вандэм бере ӧз чида, гыб! пограз,
Ӝог бызьыкуз усем муртлы кельшиз.
Ӧз пельты тӧл, чалмыт вал котыраз,
Аналтыса озьы
кема кыллиз.

Нош ӵукнаяз егит воргоронъёс
Пуклёкъёслы сое вандылӥзы.
Та интые лёгам
тамак пумъёс
Ӝоген мур лымыен
согиськизы.

Корам, куям силё-сюрно вӧзтӥ
Песянайлы кемдӥз
вамышъяны.
Малпаськыса огзэ
ваез ӝутӥз.
Луоз, пе, бодые
пыкъяськыны.

Инкуазьмылэсь
дышетскыса ӟечлы,
Бен котькудӥз музъем
вылын улӥсь
Мед луысал вӧзысь
адямилы
Сюрес вылын юрттӥсь яке шунтӥсь.

Берыктӥз Семён Перевощиков

* * *
Кызьы-о изъёсты
вераськыто?..
Нырысь ик лэчытэсь синъёс
Пыр-поч учко, вань йӧнозэ соос
Быръё но йырвизьме кельто.

Нош отӥяз ужез —
быгатонлэн…
Улэп выллем ини адске,
Но шып ай со — изысь
вордскем маке.
Ӧвӧл на куараез солэн.

Жальмась тусаз ӝогак учкылозы
Кошкись, лыктӥсь
адямиос.
Лобӟись аръёс — жадись луд ӟазегъёс —
Пельпум вылаз
пуксьылозы.

Пырдылыны кутскиз ке бен бӧрысь —
Ачиз мадёз асьме
вакыт сярысь.
Берыктӥз Вениамин Ившин

* * *
Вакчигес, мӧзмытгес
луылэ ни
Вордӥськем нуналыд. Ӝӧк но буш.
Зӥбытгес луыны, дыр, кулэ ни —
Лӧбыкед потылэ ке
но туж.

Бен, сюлэм дырекъян
быремын ке,
Сяськаед но уг чида — шуя.
Нош йырыд малпаса
пороме ке,
Мылкыдыд но
шукы кадь уя.

Ӝӧк улэ усемын
вуж открытка,
Бускелед но
лыдӟиз ке но — ӵок.
Выль кырӟан малпано ке,
уд быгат.
Вуженыз ке нош…
њиз бӧрдӥськод.

Берыктӥз Татьяна Чернова

* * *
Ӧвӧл на ӵукна, уг сакты,
Пеймыт ай,
мур кыйгу кадь ик.
Нош малы на мыным шунды,
Мон вӧзын тон
ӧвӧл ке чик.
Дырез ӝогомытод малы,
Со озьы но вӧзтӥм ортче.
Мон верало мусоелы:
«Яратонэ ини уртче!»
Мон лякисько бамыд
борды,
Нылпи кадь уг,
ӝипто зэмос.
Серекъяло но, дыр, бӧрдо,
Возьыт уз потэ синвуос.

* * *
Гуртмы кыстӥське
гурезе,
Улын — њонгырась
бусыос.
Бен мар тол вуон толэзе
Музъем на тыныд
кузьмалоз?
Котыр сюресъёс
гылтэмын
Берпум кезьытэсь
зоръёсын.
Вуж трактор но тӥнь «гуньдэмын»,
Ӝуштэ, азьлане чик
уг мын.

Берыктӥз Алексей Ельцов

Удмурт Дунне
By Удмурт Дунне Июль 16, 2013 13:00