Вордскем кыл

Удмурт Дунне
By Удмурт Дунне Июнь 18, 2013 12:56

Анатолий Уваров
Одӥг малпан монэ курадӟытэ —
Вордскем кылмы понна сюлэм висён.
Монэ гинэ-а — ваньмес ранӟытэ
Куанер но ултӥям данэ усён.

Оло кысӥз кылмес яратонмы?
Кыӵе гӧрлэсь дуно кылмы кынме?
Марлы меда жингрес вераськонмы
Садысь уллям уӵы выллем чалме?

Уг ни дӥсьты ас кылыныз удмурт
Калык пӧлын вераськыны пезь-пезь.
Оло ас шаераз луиз со мурт?
Оло кышка мыскыл каремзылэсь?

Вордскем гуртаз со вазьылӥз: «Нэнэ!»
«Яратӥсько!» — шуиз гажанэзлы.
Али Ижын со, кухняяз гинэ
Вераськыны дӥсьтэ удмурт кылын.

Туннэ бырем гуртъёс вералозы,
Кызьы укнооссэс ӵогалляса,
Сыӵе муртъёс каре кошкылӥзы,
Пӧсь синвуэн гадьзэс пылатыса.

Али соос гербер дыре карысь
Гуртъёссылэн бервылазы берто.
Ортчем дырзэс буре ваё сюлмысь —
Вордскем кылын кырӟанъёссэс мыто.

Нылпиоссы мыкыртыло йырзэс,
Ӝожесь ик та бырем гуртысь гуръёс.
Сюлмын кайгу, уг валало кылзэс,
Вордскем кылзэс ӧз дышетэ соос.

Нош кыдёкын — инльӧль. Вуэ ӵук пал.
Ӝужась шунды, тон кисьты выль кужым!
Чалмись кылмес тон улӟыты, нунал,
Сёт юн луон, медаз быр лул-выжы!

Кылбур басьтэмын А. Уваровлэн 1991-тӥ арын потэм «Эхма!» сборникысьтыз

Удмурт Дунне
By Удмурт Дунне Июнь 18, 2013 12:56