Ужась муртэ гажан пумтэм

Удмурт Дунне
By Удмурт Дунне Июнь 18, 2013 16:43

Ужась муртэ гажан пумтэм

В. Невоструев

В. Невоструев

Та нуналъёсы ӧсъёссэ вӧлъяз «Огъя Россия» партилэн Удмурт ёзэзлэн азьвыл чаклам XXIII конференциез. Конференциын эскерем ужпумъёс пӧлысь валтӥсез луиз Кун Кенешлы Тӧрое кандидатэз ӵектон. Азьвылэз спикер угось — Александр Соловьёв — туэ 28-тӥ апреле куштӥськиз депутатлэн полномочиосызлэсь, таиз герӟаськемын сое Россиысь Федерацияя Кенеше сенаторе юнматэмен. Озьыен, парламентын одӥг инты — одӥг мандатъем 30 номеро Балезино округъя — бушаз. Отчы быръёнъёс радъяськозы туэ куара сётонъя огъя нуналэ — 8-тӥ сентябре.

Конференцие люкаськемъёс Тӧрое ӵектӥзы кык муртэ: Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссилэсь кивалтӥсьсэ Владимир Невоструевез но Ижысь гурт удысъя академилэсь ректорзэ Александр Любимовез. Лушкем куара сётонын шараяськиз: нырысетӥез понна дурбасьтӥз 157 делегат, кыкетӥезлы куаразэ сётӥз 30 мурт. Владимир Невоструев ӟеч тодэ кивалтон удысэз: гурт удысын огшоры ужась бордысен кутскыса, со ӝутскиз закон кылдытъян удысозь. Котьку но висъяськиз ужез яратэменыз, калыкен огкыл шедьтыны быгатэменыз. Озьыен, парламентысь «Огъя Россия» фракция Владимир Невоструевлэсь кандидатуразэ ӵектоз Кун Кенешлэн матысь сессиосаз.

Владимир Петрович Невоструев вордскиз удмурт семьяын 4-тӥ ноябре 1959-тӥ арын. Дышетскемез вылӥ. Йылпумъяз Ижысь гурт удысъя академиысь гурт хозяйствоез механизировать каронъя факультетэз.

1978-тӥ — 1980-тӥ аръёс — службазэ нуиз Свердловск улосысь Серов городын.
1980-тӥ — 1998-тӥ аръёс — Юкаменск ёросысь «Трактор» колхозын механик, валтӥсь инженер но кивалтӥсь луыса тыршиз.
1998-тӥ — 2000-тӥ аръёсы — Юкаменск ёрослэн йырыз.
2000-тӥ — 2002-тӥ аръёсы — Удмурт Республикаысь Гурт удысъя но сиён-юонъя министр.
2002-тӥ — 2007-тӥ аръёсы — Правительстволэн Тӧроезлэн воштӥсез.
2007-тӥ — 2008-тӥ аръёсы — Кун Кенешысь Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссилэн кивалтӥсез.
2008-тӥ арысен — та вакытозь — Кун Кенешлэн Тӧроезлэн воштӥсез, Гурт удысъя, музъем кусыпъёсъя, инкуазь узырлыкъёсъя но инкуазез утёнъя ялан ужась комиссилэн кивалтӥсез. Кун Кенешлэн ньылетӥ но витетӥ ӧтчамъёсызлэн депутатсы.

Елена Никитина

Удмурт Дунне
By Удмурт Дунне Июнь 18, 2013 16:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*