Пургалась кузь ныро пиосмурт…

Удмурт Дунне
By Удмурт Дунне Июнь 18, 2013 10:44

Пургалась кузь ныро пиосмурт…

5

Удмурт шӧмо лимерикъёс

Быдэс дуннелы тодмо луэ англичанъёслэн аспӧртэмлыко юморзы. Нош кин уг тоды на, ма со сыӵе — йӧспӧртэм шӧмзэ валаны быгатоз, лимерикъёсты лыдӟыса.

Лимерик — со вить чуръем кылбур, солэн аслаз кабъёсыз. Рифмаос тазьы тупаны кулэ: нырысетӥ чур — кыкетӥ чурен, куинетӥез — ньылетӥен, нош берпуметӥ чурлэн пумыз нырысетӥяз кадь луыны кулэ. Кылбурлэн кутсконаз ӵемысь верамын, кин герой но кыӵе интыысь со луэ. Лимерикын одно ик сюжетэз вань, но ӵемысь нокыӵе малпанэз ӧвӧл, чылкак абсурдной луэ. Озьы ке но, тодосчиос верамъя, 18-тӥ дауре гожтэм но классической луэм лимерикъёс ӟеч возьмато Англиысь калыклэсь та вакытысь улон-вылонзэ, сямъёссэ, малпанъёссэ но шекъёссэ.
Тужгес тодмо Эдвард Лирлэн лимерикъёсыз, солэн «Книга нонсенса» бичетэз берыктэмын дуннеысь трос пӧртэм кылъёсы.

Тани Э. Лирлэн эрико амалэн берыктэм куд-ог лимерикъёсыз:

Пургалась кузь ныро пиосмурт
Шуэм нырызлы:
«Эн ни буд!
Ваньмыз, кинэн вераськисько,
Ныр шорам гинэ учко!» —
Ӝожтӥське нырызлы пиосмурт.

Бигра гуртысь кышномуртлэн
Ангес йылыз вень кадь вылэм.
Со кема малпаськем
Но аслыз крезь басьтэм.
Трос гуръёс ангес йылыныз шудылэм.

Кезысь ляб синмо пересь мурт
Пыдтышсэ, пе, ӧз адӟылы ноку.
Возьмато ке: «Тӥни пыдтышъёс!»
Со вазе: «Пӧяськоды, эшъёс!»
Тӥнь сыӵе оскисьтэм пересь мурт.

Берыктӥз Настя Шумилова

Нош тани куд-ог чылкак удмурт луись лимерикъёс. Соосты гожтӥзы удмурт кылосбуръя факультетысь дышетскисьёс.

Любовь Кремлёва
Можгалась мӧйы пиосмурт
Бакчаяз мерттэм грейпфрут.
Туж умой кисьтам, утем —
Ӵуказеяз будос сисьмем.
Тӥнь сыӵе шудтэм пиосмурт.

Алексей Пикулев
Алина — кырӟасьмы Алнашысь —
Борыез сиылӥз Четкерысь.
Юало ке: «Ческыт-а боры?»
Вазьылэ: «Гордэктэ ымдуры!» —
Борыясь кырӟасьмы Алнашысь.

Кык эшъёс тубиллям Четкере,
Сиёзы ни узы табере.
Пересьёс соосты пыкыло:
«Кӧтады нош йӧтӥз ке, оло…»
Нош узы весь быре но быре.

Анна Лобовикова
Алнашысь тузӥ нылаш
Басьтэм аслыз чильтэр гамаш.
Гурт кышноос вожъяськиллям
Но ваньзы базаре ветлӥллям:
Гамаш дӥсям быдэс Алнаш.

Настя Шумилова

Удмурт Дунне
By Удмурт Дунне Июнь 18, 2013 10:44