Мумы ыжез сайкатон

Удмурт Дунне
By Удмурт Дунне Июнь 4, 2013 09:48

Мумы ыжез сайкатон

Пудо тэлеӟе гужем

Пудо тэлеӟе гужем

Ӵемысь кылӥське: ыже кыкто вайиз, но огзэ пизэ матаз но уг лэзьы. Иське, бӧксӥсьлэн сайкамтэ ассэ анаен шӧдонэз.

Котькуд мумы ыжез сайкатыны луоно. Зэм, вань пудоос пӧлысь таиз тужгес ваменэсэз но чурытэз, лекез. Но воксё измем сюлэм но шунаны быгатэ.

Ыж пиоссэ мултэс медаз кары шуыса, кӧто дыръяз сое ӵукна но ӝыт сюдоно турынэн, силосэн, комбикормен но кыдэн (жмыхен). Огез но пурысьтамын медаз луы. 5-8 грамм сылал, 10-15 грамм пыргытэм мел уй-нунал куспын сётъяно. Люктано нуналаз кык пол шуныт вуэн. Гидысь тӧл шулась интыосты ӵоксано, борддоръёсты избурен буяно, кыедэз поттоно — пӧртэм микробъёсты озьы улляно. Шораз кесяськыны, курдатыны, тышканы, берпуметӥ арняосаз пастуке поттаны уг яра — куалектэменыз кылдэм ыжпизэ я воксё куштыны быгатоз, я туж шуген ваёз. Курадӟыса вайиз ке, пизэ уз учкы ни.

Пиямезлэсь 1-3 нуналлы азьвыл ыжлэн вераез тордэм кадь луэ, кӧтыз уллань зол лэзиське, берпалыз усьтӥськыны ӧдъя. Ачиз ыж гань-гань интыяз сылыны уг чида ни: я султэ, я выдэ. Кӧс турынэз улаз люка, мукет ыжъёслэсь палэнынгес возиське, ӵем бӧксэ.

Таӵе тодметъёсты адӟыса, кияды качы кутэ. Вера котырысьтыз кыедэсь гонзэ ӵышконо. Сотэк пиосыз, ноныоссэ утчакузы, со кыедэз но сюпсёзы — кӧтазы йӧтоз. Гонзэ утялтоно мумы ыжлэн син дурысьтыз но, макес выжыезлэн пушпалысьтыз но, берпал котырысьтыз но.

Ыж ӝог но капчи пия. Уг курадӟы ке, котыраз эн ик ветлэ. Пиоссэ таланы турттӥськоды шуыса, кышканы быгатоз. Таин сэрен югдурез воксё уродмытоды. Гогы но ачиз ик чигиськоз. Зэм, микроб медаз сюры шуыса, сое йодэн коттэм сӥньысэн думылоно ик, гогы котырзэ но йодэн зырано.
Ыжъёс ӵемысь кыкто я куиньмо ваё. Мумы огзэ поттэмез бере выльысь выдэ ке, возьмалэ на эшшо мукетызлэсь потэмзэ. Таиз вордскыны кулэ, 10-15 минут ортчыса. Жобез (послед) ачиз ик усьыны кулэ, 1,5-3 час ортчыса — кужмысь эн кыске.

Пиез нокызьы потыны уг вала ке, пыдъёсыз нырысь мычисько ке, соку учкыса сылоно ӧвӧл ни. Асьтэ кужымдылы но тодон-валамдылы уд оскиське ке, пудо эмъясез ӧте. Киосты рос-прос миськыса, ыж пушкы пыроно луоз пизэ шонер берыктон вылысь.

Вордскем пиез уг шока ке, ым но ныр котыръёссэ соку ик тазатоно дыльклэсь, пушказ шокчоно. Ыжпиез тыбыр вылаз выдтоно, азь пыдъёссэ выллань кысконо, собере соосты гадь вылаз куасалтоно но каллен зӥбоно. Гадяз, кӧтурдэсъёсаз каллен гинэ чабкылоно.

Ыжпи «дэремен» вордскемын ке, жобзэ ӝегатскытэк кесяно но бӧксӥсез поттоно, сотэк ӝокаса кулоз. Гогыез ишкалскемын ӧвӧл ке, кӧт дорысеныз 4-5 сантиметр кузьда кельтыса, сое вандоно, йодэн зырано.

Кынмыса дыгыр-р-р куалекъясь ыжпиез йырозяз 37 градусъем шуныт вуэ пононо. Шуназ ке, рос-прос ӵушылоно но ӝоггес выдтоно мумиз доры, ноныны дышетоно. Яралоз шуныт бинялтыны но.

* * *
Таза ыжпи, вордскемез бере 15-20 минут ортчыса, пыд йылаз султэ но анаезлэсь нонызэ утчаны кутске. Соин ик ыжлэсь веразэ миськоно, йӧлзэ пичи гинэ пызъялтоно, отӥяз пиезлы капчигес сюпсьыны мед луоз шуыса.

Котыраз кыктоос тэтчало ке, кыксэс ик одӥг дыре вера дуре вуттоно, огдыре ноныны дышетоно. Нырысь одӥгзэ пизэ котыраз вуттӥды ке, собере мукетсэ, мумы берлозэ мурт карыны быгатоз. Нырысьсэ нонтон, пиосызлэсь жобзэ нюлон сямен уго мумы ыжпиосызлэсь зынзэс, куаразэс тодаз кельтыны выре. Соин ик 1 час но ӝыны дыр ӵоже семьязы котыртӥ туж ик ветлыны уг яра — мурт зынъёсын ыжлэн йырыз поромоз. Музон ыжъёсты но котыраз лэзёно ӧвӧл. Ыжпиосызлэсь но та дыр ӵоже люкыны нокызьы но уг яра! Соку гинэ ыж ассэ рос-прос анаен шӧдоз.

Пиямез бере 1 час ортчыса, ыжлэн юэмез потыны кутскоз. Одно люкталэ, сиён но сётэ. Зэм, туж трос ву соку ик азяз пуктыны уг яра — тордоз. Кык часлы быдэ 1-1,5 литр гинэ шуныт ву сётэ. Сютэм возиды ке, мумы малпалоз: асме мырдэм сюдыны вормисько ай, кыксэс ик нонтыны ӟигары уз тырмы. Озьы со юнзэ гинэ сюдоз, лябзэгес бордысьтыз улляны кутскоз. Ӵемысь уго огез ыжпи, музонэныз ӵошатыса, кык поллы пичигес вордӥське. Пичиез пи вордэм мумыезлы весяклы мурт кылёз.

Мар кароно мултэс луэм ыжпиен? Возьмано, ку пиялоз мукетыз ыж. Романовской выжыысь ыжъёс мурт ыжпиосты капчиен асьсэлэн каро. Но со понна кӧня ке пӧсяно. Мултэс луэм ыжпиез зырано соку гинэ вордскемез борды, жобзэ мугораз лякылоно. Озьы соос огзынъемесь луозы. Кыксэс но пызъялтэ на ыжлэн йӧлыныз. Соку мумы сураськоз но кыксэ но аслаз карыны быгатоз. Мултэс ыжпи таӵе учыръёсын ӵемысь шедьтэ на ас шудзэ.

* * *
Ыжпиос мумыоссы борды бурмемын 3,5-4 толэзь ӵоже. Нырысетӥ толэзьзэ соос вань витаминъёсты но минералъёсты басьто мумызылэн йӧлысьтыз. Кыкетӥ толэзьысен йӧл борды сётъяно ни нимысьтыз сиён. Талы дышетыны кутсконо 50 граммысен кыкетӥ арняысен ик. Тужгес ӟеч етӥн кыд, сезьы комбикорм. Со дыре ик сётъяны кутсконо ни небыт турын, клевер, люцерна. 5 граммен сётъяно мел, сылал. Пӧзьтэм гордкушман, кешыр, картошка кадьёсты сётъяны яра кык толэзьысен гинэ. Минерал веществоос мугоразы уг тырмо ке, ыжпиос сиыны кутско сюй, гон, кыед. Таин сэрен кӧтазы йӧтэ, куло.

Ӟеч сюдыку, ыжпи уй-нунал куспын 200 граммлы будэ. Уг висьы ке, анаезлэсь сое люкыны яра 4 толэзьысен.

Екатерина Михеева,
пудо эмъян наукаосъя кандидат
Туспуктэмез: udmfoto.ru

Удмурт Дунне
By Удмурт Дунне Июнь 4, 2013 09:48