Ма со Родина?

Удмурт Дунне
By Удмурт Дунне Июнь 21, 2013 16:12

22-тӥ июне ӵукна 4 часысен Ижысь Ялан ӝуась тыл доры сяська керттэтъёс понозы егитъёс. Быдӟым ожын геройлыко быремъёсты буре вайыса, Вормон Нуналэз кузьмасьёслы тау карыса, татын нуназеозь радъямын луоз «Ма со Родина?» ужрад.

Егитъёсын ужанъя, Нациосын ужан политикая министерствоос, Иж город администрация, «Огъя Россия» партилэн Удмуртиысь ёзэз но мукет огазеяськонъёс юрттэмен валче татын чузъяськозы войналы сӥзем кырӟанъёс но кылбуръёс. Со сяна, котькуд мылкыд карись быгатоз аслаз фронтэ бырем я ышем ӵыжы-выжыез сярысь ивор шедьтыны. Со понна радъямын луоз Интернет вотэсысь военной архиве пырон площадка.

Тыложын быремъёсты утчанэ пыриськись «Долг» огазеяськон ортчытоз «Бессмертный полк» ужрад. Быремъёслэсь туспуктэмъёссэс кутыса, соос строен ортчозы Ялан ӝуась тыл котыртӥ. Татчы пыриськыны быгато городын улӥсьёс но. Курон одӥг: туспуктэмлэн быдӟалаез 30×45 сантиметр луыны кулэ. Тӧдьы рамкае пононо. Паллян палыз но вылӥ люкетэз 1,5 сантиметрлы буш мед кылёз, улӥыз — 9 сантиметрлы. Ӵапак улӥяз ик печатлано солдатлэсь быдэс нимтулзэ, тодмо ке, войнаын сётэм званизэ. Та бумага ужез лэсьтыны быгатымтэос сокем медаз кайгыре. Национальной музей азьын юрттыны дась луозы. Отын туспуктэмъёстэс компьютеразы, сканер пыр поттыса, кельтозы, «Бессмертный полк» сайтэ но пыртозы.

«Огъя Россия» партилэн «Егит гвардия» огазеяськонэз возьматоз на война аръёсысь сюжетъёсты. Воксё пичиослэн киосазы сётозы пӧртэм буёло мелъёсты. Соос асфальт вылын суредаськозы. Озьы ик котькуд мылкыд карись бумагалэсь лэсьтоз тури но думылоз сое пельтэм шар борды. Ӵапак со шаръёсты 12 часын инме лэзёзы. Озьы ик карозы Глазовын, Воткаын, Балезиноын, Уваын но мукет райцентръёсын.

Сергей Захаров

Удмурт Дунне
By Удмурт Дунне Июнь 21, 2013 16:12