Гогыедлэсь вылэ уд тэтчы

Удмурт Дунне
By Удмурт Дунне Июнь 18, 2013 10:56

Гогыедлэсь вылэ уд тэтчы

А. Лаптев

А. Лаптев

Александр Лаптев вордӥськиз 1958-тӥ арын 28-тӥ июне Алнаш ёросысь Юртошур-Какси гуртын. Веросъёсын но визь-лул быртыкъёсын «Хи-хи», критика удысэн герӟаськем «Тӥ учке ӵемгес ӵукпала…» но «Вы чаще смотрите на рассвет!..» книгаослэн авторзы.

Али дэмласькомы тодматскыны А. Лаптевлэн выль быртыкъёсыныз.

* * *
Нуназеяны сиськонтӥе пыриськод. Сиён-юон басьтыса, коньдон тыремед бере йырдэ амалтэк зӥр! бергатӥськод. «Кытын меда буш ӝӧк вань?» Сое синйылтӥськод ке, соку ик эркынак пуконо интыяд дыртӥськод. Отӥяз капчи мылкыдын сиськыны ӧдъяськод ини, гань-гань кариськиськод.

Пумен выльысь котыр утчаськиськод на. Буш ӝӧкъёс тырмыт дыръя вӧзэ пуксёнзылэсь сокем уд шымыраськы. Буш ӝӧкъёс ке ӧжыт, возьмаськыса но шугъяськыса таман улӥськод ини: «Медаз лыктэ вал дорам, медаз лыктэ!» Инты утчасьёс ке асьсэлы кельшымон муртэ чаль быръё. Витьымтэ шорысь тон доры вуо но ӝӧк сьӧрад шурк! лэзисько. Соку ик кӧт пушкыд улӥе ваське кадь, амалтэк шымырскиськод, аслыд ачид тупамысь дугдӥськод: выросъёстэ син шоры йӧтонтэм кариськод, ас вакытад усем выллем луиськод, йырдэ но уд ӝутъяськы. Вылласянь гань-гань адскиськод ке но, пушласянь пӧзись пуртылы укшаськод. Тани-тани уртчод! Пӧсекъямед дырын-дырын пичильтык шӧдӥськылэ ик: ӧстӥ пырасьёсты-потасьёсты, тэркы вадьсазы мыкырскемъёсты син ултӥд уӵерак учкылӥськод яке сиён пушкад мылыд потытэк, гызмыль конгыръяськиськод — вӧзад пуксемъёслэсь тынэсьтыд азьлогес вырӟемзэс чидатэк витиськод. Ма, кинлэн тодмотэм муртъёсын одӥг ӝӧк сьӧрын сиськемез потоз? Тодмо муртъёсын но ай ӵош пукыны мылкыд сокем ӧвӧл — ваньзы ыме учко кадь, соин ик сиён но иназ уг мыны. Ас кожад кариськыса сиськыны турттон мугор куронэн ик герӟаськем секс порма лушкем ужен уг ӵоша шат?

* * *
Котькуд адями та югыт дунне вылэ синмаськымон ужъёс лэсьтыны, ас пытьызэ кельтыны, калыклэн сюлэмаз кыльыны вордӥське. Нош пӧлысьтымы уноез пӧртэм мугъёсын сэрен асьсэды асьсэос таки уг шедьто, Инмарен сётэм вань луонлыкъёссэс, люкам быгатонлыкъёссэс, малпанъёссэс улоназы йӧназ пыӵатыны уг пӧрмыто. Эшъёссылэсь, тодмооссылэсь азинсконъёссэс адӟыса, вожъяськыны, ӝожъяськыны, йыркуръяськыны, керетыны но ӧдъяло — чылкак вогъяськись пиналлы пӧрмо. Сыӵе дыръя соослы (асьсэос малпамъя, вунэтэм, куштэм муртъёслы) саклык но туж ӧжыт висъяло кадь потэ ини — котькуд пичильтык ужзэс кин ке но одно ик мед синйылтоз, мед пусъёз.

Нош мар-о паймымонзэ лэсьтӥзы меда асьсэды шедьтымтэос улонзы ӵоже? Йӧн-йӧн чаклано ке, песьтэразы тӧл шула, шуыны луоз. Кытчы-о пырод, кытчы-о кариськод: мар лэсьтӥзы — лэсьтӥзы ини. Калыкын верамъя, гогыедлэсь вылэ уд тэтчы. Улонзы озьы радъяськыны кулэ вал, дыр, адӟонзы сыӵе. Киоссэс ал вылазы тырыса, воксё ӧз улэ ук: кыӵе ке сыӵе пытьы но кельтӥзы, вылды. Нош уноез малпанъёссы ӧз быдэсме ке но, астэ ачид юнматыса, буйгатыса, котькуд пичильтык вормон понна шумпотыса улыны ик умойгес, дыр. Югыт дунне вылэ вордӥськем понна гинэ но шумпотыны кулэ ини.

Адямиос чыры-пыры сюлмаськонъёсынызы сэрен, кӧтсы вылэ, ляльчиос выллем, ялан ужаменызы но асьсэды асьсэос таки уг шедьто: адямилы нокыӵе маза ӧвӧл. Сыӵе пачкаса, ӝикаса улонэз юн сямо но пинё муртъёс гинэ амалтыны пӧрмыто.

* * *
Адямиос но, изьверъёс кадь ик, ог-огзэс вормыны, сиыны турттыса, весь уло. Тон ке ӧд сиы, астэ ыльын ньылозы. Гумыльтыны ке ӧз пӧрмытэ, ялан йырйыса, палэс кельтозы. Сюлэмез тыкисьёс пумитъяськыны быгатӥсьтэм муртлэсь тазалыксэ пумен лябӟыто, сопал дуннее вутто.

Сьӧськабъёслэн соку тодазы но уг лыкты ултӥям адямизылэн пыр пӧсекъяса, ас дуннеяз кӧтӝожаса улэмез. Ӵап соин сэрен но пыдул лёгетлы кельтэмъёслэн сюлэмзы путэ, сыӵеосты пери шукке, пыктос висёнъёс погырто. Нош сьӧд йыро кыйёслэн мылкыдзы ке со вадес гань-гань луэ — синазькыль кароно муртсэс вормизы ук. Куддыръя мыдланес выремзылэн тулкымез, бумеранг выллем, ас вылазы но вуэ. Озьы ке но соос изьвер сямзэс воштыны уз ни быгатэ: кызьы-о, пе, вир юытэк, улод?

* * *
Бичатыса возись быдэстоно малпанэд, ужед я кытчы ке ветлонэд пумысен огдырзэ сюлэмшуген улӥськод, возьмаськиськод но собере соосыд син куспын шурк! гинэ ӝогак быдэсмо, ортчо. Мазэ-созэ валаса ик, уд вуттӥськы. Сыӵе дыръя пельпумысьтыд секыт из усем порма луиськод, капчияк шокчиськод. Оло нош сюлмыд но кӧня ке буш кыле, быдэстэм ужед но нокыӵе кадь уг йӧты ни. Мылкыдыд, котьма ке но, буйга, гань-гань кариське.

«Вал-а со, ӧй вал-а? Ветлӥ-а отчы, ӧй-а?» Ма, вал ик но… ортчемзэ валатэк воксё кылиськод. Ваньмыз уго огви куспын лобыштэ, толло нуналлы утыр пӧрме. Соин но асьмеос азьвылэз пумысен укыр паймиськом, лулӟылӥськом: «Али гинэ вал кадь но… Уть ай, кӧня дыр ортчем ни!»

* * *
Сал ке сал, озьы карысал, тазьы лэсьтысал… Мар меда, пери шуккемъёс выллем, лулӟылыса, ныр улад вуӵыртыса, астэ ачид йырйыса, тазалыктэ быдтыса улонэз? Котькинлэн кыӵе ке но йыр висёнэз вань. Сюлмаськонъёслэн ноку но пумзы уз луы. Муртлэн гинэ со ваньмыз умой, синмаськымон потэ. Вырӟосэд ке уг тырмы, сямыд ке пезьгыт ӧвӧл, турттон мылкыдыд ке лябыт, марлы сокем вожъяськонэз, мукетъёс вылэ чӧлтӥськыса, сал карыса улонэз? Ужа, тыршы, пӧся — соку, оло, тон но маке со пӧрмытод.

Нош пырак верано ке, сал понна луонлык но кыӵе ке коть быгатонлык кулэ.

Удмурт Дунне
By Удмурт Дунне Июнь 18, 2013 10:56