Ӟузьылэ милемын ӵош!

Удмурт Дунне
By Удмурт Дунне Июнь 4, 2013 10:20

Ӟузьылэ милемын ӵош!

Т. Шкляева

Т. Шкляева

Татьяна Шкляева пӧртэм проектъёс бордын ужа — со кичӧлтэм улсын шаерамы ортчытэмын удмурт эстрадая «Ӝужась кизилиос» ӵошатскон, Удмуртиын улӥсьёслэн нырысетӥ конгрессы, улосъёс куспын фин-угор калыкъёслэн «Воршуд» фестивальзы но трос мукет. Берло аръёссэ Татьяна Геннадьевна кивалтэ Лудорвай музей-заповедникен. 18-тӥ июне йӧно но чебер нылкышно пусъёз вордскем нуналзэ.

— Татьяна Геннадьевна, семьядэс кыӵе сиёнъёсын шумпоттӥськоды?

— Пичи дырме тодам вайисько ке, номыр сыӵе-таӵезэ вераны уг быгатӥськы, гуртын ваньмыз улӥсьёс сямен ик сиськимы кадь. Анай-атайлэн ми куинь кузя пиналъёссы вал. Асьсэос соос вазь ӵукна ик колхоз уже дыртылӥзы. Тодӥсько на, мама шаньги пыжемез бере гуре пуктэ вал бадӟым горшокен моклок сӥль, понэ картошка, сугон, пӧлаз лавровой лист, пӧсьтурын, укроп но чеснок. Ми палан, Эгра ёросысь Сэпын, сое гурын пукытэм шыд шуо. Со сыӵе ческыт луэ, супыр-супыр париське. Шыдэ пӧсьтурын но пызьнаса туж умой луэ. Соку ческыт зын быдэс корка тыр вӧлске. Собере быдэс семьяен со шыдэз сиылӥмы. Сыӵе ческыт потыса ӟузьылӥськомы вал. Вылаз вӧй пуке, ачиз шыд туж пӧсь, сое пелляса-пелляса сиёно. Озьы ӵошен сиськеммы мыным туж яралляз. Ми гинэ ум, вазен ваньмыз семьяос одӥг тусьтыысь ӵош сисько вал ук. Мон но сыӵе ик шыд пӧзьтыны юри духовка басьтӥ, но отын пӧзьтэм шыд гурысь кадь ӧвӧл ни. Озьы ке но семьяенымы ми сыӵе шыдэз туж яратыса сииськомы. Пичи дыръям, ма, али но, мама доры бертӥськом ке, со милемлы гурын сяртчылэсь паронка пӧзьтэ. Туж ческыт.

— Тӥ Пичи Пурга ёросэ быземын. Татын ини лымшор палъёслэсь пӧртэм пӧрамъёссэс веръяно луиз, дыр?

— Озьы. Ми палан табань но, перепеч но мукет сямен пыжо. Табаньмы милям зыреттэк луэ. Сое сиён понна нимаз тусьтые пукто губи, картошка кисаль, кынтэм йӧл но мукет. Туж ческыт потыса сииськомы вирын перепечез. Бызем интыям сиымтэ сиёнэз веръяно луиз ини. Туж ческыт пӧра картэлэн анаез Галина Николаевна, со марлэсь гинэ перепеч уг пыжы. Туж ческыт пӧрме кӧжылэсь кокрокез, озьы ик туж кельше виртыремез. Сугонэн табань пыже ке, со зыретэн укыр ческыт кошке.

— Даниил пидылэн кыӵе яратоно сиёнэз?

— Со макарон гинэ сиыса улысал, дыр. Туэ тани нырысетӥ классэ мыноз ини, сьӧраз но макаронзэ гинэ нуллысал, дыр. Котькызьы сое пӧра, ой, ческыт, мама, лэсьтэмед шуыса, сие. Вӧзаз, конечно, гуляш яке котлет понӥсько на, подлив кисьтӥсько. Сыӵе сиён асьмелы но кельше. Но сое нуналлы быдэ уд сиы, вӧзаз шыд кулэ.

— Нош музеяды куноостэс кыӵе пӧрамъёсын паймытъяськоды? Асьтэлэн нимысьтыз малпам сиёнды ӧвӧл на-а?

— Кема аръёс ӵоже куноосмес куноятӥмы кубистаен перепечен, зыретэн табанен, нош уйпал удмуртъёслэсь корказэс усьтэммы бере пӧрамы сяртчынянь но пушнерен шыд. Со сяна, туж ческыт луэ гурын пыжем чорыг.

Котькыӵе ужрадэ одно ик пӧзьтоно сӥльын ӝук. Асьмелэн, удмуртъёслэн, сотэк одӥг Гербермы но уг ортчы.

Аръянэн окрошка

Кулэ: 1 литр аръян, 2 курегпуз, 1 помидор, 1 огреч, ӝыны ческыт пӧсьтурын, укроп, вож сугон, 2 пилет чеснок, кирень, сылал.
Вандылоно огречез, помидорез, ческыт пќсьтурынэз, юдоно курегпузэз.

Ваньзэ бадӟым мискае тыроно, вылтӥз аръянэн кисьтоно. Умой-умой сурано. Вуштон пыр кӧня ке кирень поттоно но 2 пилет чеснокез пуртэн векчиятоно. Шӧмызъя сылал ватсано.

Вань яратоно вож турын-куаръёстэс, векчи юдыса, пќлаз сурано но ог 15 минутлы кельтоно, шӧмъёс мед сураськозы шуыса.

Гур шыд

Кулэ: 0,3 килограмм парсь сӥль, 0,5 килограмм картошка, 3 йыр сугон, 2 лавр куар, 1 пичи пуньы сылал, чепыльтык пӧртэм изэм перецъёс.
Парсь сӥлез векчи юдоно. Картошкаез озьы ик векчи вандылоно, пӧлаз кульчоосын вандылэм векчи сугон пононо, ваньзэ тае сюй горшоке тыроно.

Вылаз лавр лист, сылал но пӧсьтурын пызьнано. Ваньзэ тае киын кырмано. Вылаз одӥг литр пала ву кисьтоно. Горшокез ворсаса, одӥг час но ӝынылы бадӟым гуре яке духовкае пуктоно.

Чырстурынэн шыд

Кулэ: скал яке кунян сӥль, 600 грамм чырстурын, 1 йыр бадӟым сугон, пуньы мында йӧлвыл, изэм сьӧд пӧсьтурын, 200 грамм картошка, 150 грамм ӵужкушман, 1 бадњым пуньы нӧкы вӧй яке семавӧй, шӧмызъя сылал, 2 курегпуз.

Ваньзэ тае огинын пӧзьыса, туж ческыт шыд пӧрме. Сое луоз сӥльтэк но пӧзьтыны, соку шыддэс кезьытэн сиыны быгатоды.

Любовь Тихонова
Туспуктӥз Владимир Беломорских

Удмурт Дунне
By Удмурт Дунне Июнь 4, 2013 10:20