Котькудӥзлэн ӝушез аслаз

Удмурт Дунне
By Удмурт Дунне Июнь 4, 2013 09:38

Котькудӥзлэн ӝушез аслаз

Кинлы - шумпотон, кинлы - йыр висён

Кинлы — шумпотон, кинлы — йыр висён

Огезлы — кыед, мукетызлы — пушнер

Июне уйёс шуныт луыны кутско 13-тӥ число котыр, шу сяськаян вакытэ. Соку ини убоосы кышкатэк мерттыны луоз кезьытъёсты чидасьтэм будосъёсты, вариж усьтыны огреч-помидоръёсты.

Туэ тулыс беромыса вуиз. Тае лыдэ басьтыса, вазь кизем будосъёслы юнманы юрттоно. Кызьы? Выжыяськемзы бере соос туж кулэясько фосфорлы. Соин ик кизьыку яке собере ик чуръёс вискы гранулаен суперфосфат пазяно. Озьы кидысъёс ӟечгес выжыясько, умойгес куаръясько. Макем кидыс векчи но куазь салкымгес, сокем та амал пайдаёгес.

Фосфорлы тужгес кулэясько ӵужкушман, гордкушман, кушман, редис, петрушка, сельдерей, салат, укроп. Суперфосфат интые пазяны луоз пенез. Сое вылтӥз сюен шобыртоно. Яке пень вуэн кисьтано. Но пенез ӝыны час ӵоже вуын быректоно.

Толэзь шорын модос но музъемысь емышъёс юнманы кутско. Та вакыт кыстӥське 20 суткаысен 3 толэзёзь. Будосъёс кулэясько ини азотлы. Соин ик, потэмзы бере 2-3 арня ортчыса, соосты азот вуэн (аммиак селитраен яке мочевинаен) киськано яке куаръёссы вылтӥ пызъёно. Удобрениез воштыны луоз вуын чырсатэм пушнерлэн, унябейлэн яке мукет жаг турынлэн ляб суретэныз (10 литр вулы — 1 литр суралтэт).

Инвожо толэзьлэн куинетӥ люкетаз будосъёс йыръяськыны кутско, емышсы кылдэ. Та вакытэ соосты сюдоно-люктано калиен — киськано кыед вуэн. Дась удобрениос но вузасько, кылсярысь, «Буцефал», «Радогор», «Каурый».

Нош емыш сётонзы но будонзы кема дыр ӵоже кыстӥськись будосъёслы — помидорлы, баклажанлы, пӧсьтурынлы, огречлы, кубисталы — калий вӧзы одно ик кулэ азот, фосфор но пӧртэм микроэлементъёс. Со ваньмыз вань «Сударушка» удобрениын.

Бакча сиёнъёс сямен ик, ческыт сиськыны ярато сяськаос, уката ик июньлэн куинетӥ люкетаз. Таосызлы но нимаз удобрениос вузасько, кылсярысь, «Семицветик». Нош узыосты но емышо будосъёсты инвожо толэзе сюдыны луоз кыед вуэн но «Рязаночкаен».

Пусйымон, бакча сиёнъёслэн аппетитсы ог-огзылэсь висъяське. Кылсярысь, салат, шпинат, редис но сугон удобрениослы ӧжыт кулэясько. Та ласянь тужгес кӧттырмостэмесь шоро-куспо но бер вуись кубиста, гордкушман, каун (кабачок), тыква но огреч. Куинь берлоосыз тужгес ярато кыедэз, нош кубиста но гордкушман — минерал удобрениосты. Но соосыз но, таосыз но тужгес удалто пӧртэм удобрениос вылын.

Тодады возе: чырс музъемъёсын кубистаослы уг тырмы бор, соин сэрен йыръёссы уродмыса будо, лябесь луо. Та толэзе удъёсты сюдоно «Маг-Бор» удобрениен.

Нымы-кибыослы — «коктейль»

Куазь йӧспӧртэмъясь-кемен, берло дыре трос вӧлмизы изъянтӥсь нымы-кибыос, нош пайдаёосыз ӧжыт луизы, тылобурдоос но ичиёмизы. Яблокпулэн одӥгез тужгес но вӧлмем тушмонэз — емыш сиись нумыр (плодожорка). Нуналъёс шуныт карисько ке — тӧдьы акация сяськаян вакыт — лобаны кутско курень бубылиос.

Соос пузало пинал куаръёсы но емыш кылдон интыосы. Нумыръёс кылдэмлэсь азьло яблокпуосты пазяно помидор куаръёслэн, горчицалэн, муштурынлэн (мелисса), курытпотлэн (полынь), кӧлтурынлэн (пижма) паросэнызы. Бубылиос тужгес но уг ярато берло кык будосъёслэсь зынзэс. Соосты мерттыны луоз яблокпу улэ яке котыраз.

Нялтас вераса, курытпотлэсь, кӧлтурынлэсь, помидор куарлэсь суретъёс юртто нюръяськыны крыжовникез но сутэрпуосты изъянтӥсь тылбубылилэн (огнёвка) нумыръёсыныз. Дасяно тазьы: 100 грамм векчиятэм помидор куаръёсты куинь час ӵоже пукетоно 1 литр пӧсь вуын, собере ӝыны час ляб тыл вылын быректоно. Сӥямез бере сӥсъяно. Пызъён азьын вуэн суралтоно (1 люкет вулы — 3 люкет парос).

Озьы ке но та амал вань изъянтӥсьёсты уг быдты, 30-40 процентэз улэп кылё. Соин ик пайдаё луоз пӧртэм турын-куаръёслэн суретъёсынызы ньыль-вить пол пызйыны. Кылсярысь, кутыны быгатоды тамак пызез, майталтурынэз но вылӥ верам будосъёсты (1 ведра вулы — 1,2 килограмм парос).
Таӵе «коктейль» быдтэ троссэ куартэйёсты (тля), будосъёсты изъянтӥсь векчи нымы-кибыосты но нумыръёсты. Пызйыны луоз огречез, пӧсьтурынэз, баклажанэз, кубистаез но емышо писпуосты. Изъянтӥсьёс кӧня ке кылё ке но, соос сокем ӝог уг ни вӧлмо.

Но будосъёслэсь суретъёс пайдаё нымы-кибыос кылдон вакытэ. Изъянтӥсьёс туж трос вӧлмемын ке, соку ини кутытэк уз луы ядо суретъёсты, магазинъёсын соос трос пӧртэм вузасько.

Йыбыртты музъемлы

Ӟеч емыш басьтон понна мыкыръяськытэк уг луы. Жаг турынэз дыраз ӧд ке утялты, солэн кидысэз убое кисьтӥськоз. Соку дась сиисьёсын уката секытгес луоз нюръяськыны.

Тужгес пайдаёез — музъемез саникен копан. Озьы мерттэм будосъёслэн выжыоссы уз изъянме. Но жаг турынлэсь выжыоссэ тазьы утялтыны капчи ӧвӧл. Кытӥ луэ, кидысъёс кылдэмлэсь азьло турнано яке плоскорезэн вандоно музъем вылысь люкетсэ. Кӧня ке пол тазьы лэсьтыса, жаг турынлэн кужымез лябӟе.

Быдэсак жаг турынэн басьтэм интыосты шунды сиослэсь ворсаны луоз чильпырасьтэм материалэн: сьӧд плёнкаен, брезентэн, рубероидэн, картонэн, кӧс турынэн…

Тросэз сад-бакча возисьёс жаг турынэн нюръясько ядо суретъёсын. Макем со изъян вае асьме тазалыкмылы но инкуазьлы, таиз сярысь споръяськыны луоз. Мон уже кутӥсько калык амалъёсты. Кылсярысь, курытпотлэсь пароссэ. Соку гинэ лэсьтэм зол суретэз уг ярато ваньмыз сямен жаг турынъёс — выжызы лябӟе.

Венедикт Дадыкин
тодосчи, агроном

Удмурт Дунне
By Удмурт Дунне Июнь 4, 2013 09:38