Чипы уг вормы ассэ шунтыны

Удмурт Дунне
By Удмурт Дунне Июнь 4, 2013 10:10

Чипы уг вормы ассэ шунтыны

9

Туэ малпаськомы басьтыны бройлер чипы. Ӟеч мед будозы шуыса, маин тылобурдоосты сюдоно? Нимысьтыз лэсьтэм дась сиёнъёс, пӧртэм комбикормъёс туала арын уно вузасько ни. Кызьы соосты шонер быръёно?

Семён М.
Дэри ёрос

Бройлеръёсты будэтыны секыт ӧвӧл. Нырысь ик, та чипыос ӝог тэлеӟо, соин ик тросгес сётъяно пӧртэм минералъёс но витаминъёс. Кыкетӥез, висёнъёслы но стресслы капчиен сётӥсько. Куинетӥез, бройлеръёслэн пыдъёссы медаз быре шуыса, уногес сюдоно кальций.

Ӵогиськемзы бере нырысетӥ нуналъёсаз тылобурдоослэн уг тырмы кужымзы асьсэзыз шунтыны. Соин ик улон интыязы 30-32 градус шуныт луыны кулэ. Кыкетӥ-куинетӥ арняяз температура возиськыны кулэ 18 градус. Со сяна, нырысетӥ дас нуналзэ соос уен-нуналэн улыны кулэ югыт азьын. Собере пумен югыт вакытэз вакчиятоно нуналаз 17 часозь. 120 нуналъем чипыос нуналаз 8 час югыт азьын улыны кулэ.

Кокчаськыны дышытозяз, бройлерлэн мугораз вань на возиськыны чаклам сиёнэз. Но пумен ӟигарыз воксё быроз. Соин ик нырысетӥ нуналъёсаз ик сюдон борды басьтӥськоно. Чипыос, адямиос кадь ик, валало ческыт но кӧш сиёнлэсь шӧмзэ.

Вань йырвисёнъёсыз палэнтыны юрттоз «Солнышко» нимо сурет (премикс). Татын уго вань минералъёсыз но витаминъёсыз тырмыт ни. Сое бурдоослы курдатэк сётъяны яра ӵогиськемзы бере ик. Со ужез быдэстыны быгатозы нылпиос но — кормушкае кисьтӥд но, ужез быриз. Зэм, азязы ву пуктылоно на. Соку тылобурдо сьӧдун уг луы.

Тусе одно ик тыре на пӧзьтэм но векчи пыргытэм курегпуз, кузятэм, картошка, вож турын-куар. Но та тырмыт нокызьы но ӧвӧл. Татын уго туж ӧжыт йодэз, цинкез, кобальтэз, А, В, К, Н витаминъёсыз. Дырын-дырын ке но сётъялэ «Солнышкоез» — тае сиыса, бройлеръёс ӝоггес быгыльскозы.

4 толэзьем чипыослы сётъяно «Рябушка» яке «Фелуцен» сиёнъёсты. Эн курдалэ: огаз но суретын тылобурдолэн тазалыкезлы изъян вайись нокыӵе гормонъёсыз ӧвӧл.

Удмурт Дунне
By Удмурт Дунне Июнь 4, 2013 10:10