«Быгатонэ жаль ӧвӧл…»

Удмурт Дунне
By Удмурт Дунне Июнь 4, 2013 11:23

«Быгатонэ жаль ӧвӧл…»

Кибашлы В. Елышев

Кибашлы В. Елышев

Вавож ёросысь Ӟамбай гуртысь Владимир Елышев — кибашлыос пӧлысь кибашлы. Солэн верамезъя, гуртын улӥсь, пе, 21 специальностез тодыны кулэ.

— Вордскемын мон Ӟамбай гуртын ик 1957-тӥ арын. Татын ик весь улӥ. Атае Евгений Николаевич ужаз гаражын. Мама Зоя Кирилловна весьсэ ужаз фермаын, пичи дырысен солы юрттыны ветлӥсько вал. Умой ужамез понна солы орден но сётӥзы. Будӥм ми 5 кузя пиналъёс. Ческыт сиён вдоволь ӧз сюрылы: бадӟым комокен сакыр, плиткаен чай. Асьме хозяйство котырын, бакчаын уж трос вал. Азьло пызь уг сюры вал бере, трос картошка мерттылӥм — 25 сотка пала луылӥз. Туж пӧсь куазен но уриськиськомы вал. Тятя шуылӥз: тани тыныд куать чур, быдтэмын мед луоз. Шудэм потэ, пыласькем потэ, но уриськиськом.

— Нош кин луон сярысь малпаськылӥды-а?

— Колхоз клубын баян вал. Огзэ, мукетсэ гурез бичаны кутски. Собере тятялы шуисько: баянэн шудыны дышӥ, мыным арган басьты. 7-тӥ классын дышетскыкум, баян басьтӥз. Озьы уен-нуналэн инструмент кысканы кутски. Сое тодӥз колхоз председательмы Валентин Егорович Калинин. Дас классэз быдтыкум, со тятялы шуэм: ойдо, пе, Володядэ культпросветэ дышетскыны ыстом, клубын, пе, ужасьмы ӧвӧл. Тӥни озьы школа бӧрсьы колхозлэн направлениеныз Ижевскысь училищее дышетскыны пыри. 1-тӥ курсэз быдтӥ но, армие басьтӥзы. Отын мыным кельшиз. Авиациын связья механик вал, самолётэн лобалляй.

Армиысь бертыса, нош ик дышетсконме азьланьтӥ. Училищеез йылпумъяса, 1979-тӥ арын асьме клубын ужаны кутски. Нылъёс возьмало ни вал. Нырысь ик котырам люкай чебер куараен егитъёсты. Кутскиз улонмы… Вань праздникъёсы концертъёс, мукет гуртъёсы ветлӥськом. Чик шутэтскон дыр ӧз сюрылы. Ваньмыз кыӵе ке но бурдъяськем мылкыдын улӥзы, ужазы, шулдыръяськизы. Валентин Егорович адӟиз: уж мынэ, клубмылы электробаян басьтыны 2 сюрс манет коньдон висъяз. Со уксёен 2 мотоцикл басьтыны луэ вал. Берлогес эшшо инструментъёс басьтӥмы на. Быдэс ёросэтӥ концертъёсын ортчылӥм. Пӧртэм фестивальёсын нырысетӥ интыос гинэ басьямы ни.

* * *
1981-тӥ арын Ӟамбайын выль школа усьтӥськиз, уно егит дышетӥсьёс вуизы. Соку монэ комсомол огазеяськонлы секретаре бырйизы. Нош ик бызьылон уж. Со дышетӥсьёс ик трос юрттӥськизы. Ма гинэ ум лэсьтӥське вал. Тани егитъёсын кенешим: ойдолэ, пӧй, хоккей коробка лэсьтом. Куинь субботник лэсьтыса, пуктӥм ми сое. Ву кисьтӥм, тыл кыским. Ӧй вал юыса, ужтэк ветлӥсьёс. Ваньмызлы уж шедьылӥз.

— Нош школае тӥ кызьы ужаны сюриды?

— Школаямы ожгарчи ужъя (военной дело) дышетӥсь кулэ луиз, монэ ӧтизы. Мон армиын сержант вал бере, мае но сое тодӥсько. Но тодон-валан басьтыны быдэс толэзьлы ысъязы Перме. Школае кариськыса, мон клубысь кошки. Пиналъёсты дышетӥ ожгарчи ужлы, крезьгурлы, нуи пуэз вӧлонъя но сутыса пужыос пуктылонъя кружокъёс. Кутски пыж крезь но лэсьтыны. Со пыж выллем адске, соин ик озьы нималлям. Мон эшъяськисько Анатолий Степанов кибашлыен. Ми доры ветлӥз но возьматӥз, кызьы мар со лэсьтӥське.

Пыж крезьлы кулэ вуж пул: пасьталаез 13 сантиметр, кузьдалаез 77 сантиметр. Отчы 5 си кыскисько но, сиос медаз лябзе шуыса, юнматон интыоссэ сирен маялляно. Мон школаын туризмъя кружок но нуылӥ бере, пиналъёсын ӵем гинэ поталлям нюлэскы, трос кыз сир бичаллямы. Со ик яралляз. Та уженымы тодмо луим асьме ёросын, потаськом мукет интыосы. Вань на бадӟым крезь. Тани пыж крезелэн 5 гинэ сиосыз ке, бадӟым крезьлэн 14-ысен 21-озь луыны быгато.

Кускерттон куон станок

Кускерттон куон станок

— Тӥ крезьгурез валаськоды бере, крезь лэсьтон борды кутскемды, валамон, нош куиськон станок лэсьтон сярысь кытысь малпан потӥз?

— Огпол ми Воткинске ветлӥм бадӟым фестивале. Отысен ик адӟи кускерттон станокез. Лэсьтоно кожай. Озьы ик кутсконэз луиз. Нырысь ик 4 станок школае пуктӥ. Отчы сӥньысъёс кыски но, огез нылпи кускерттон керттыны кутскиз, мукетыз. Али со кускерттонъёсты олокытчы но кузьмамы, сётъямы ни. Мастер-классъёс возьматъясько асьме ёросамы но мукет интыосын. Нылпи садъёс но чортыло. Кытӥяз кускерттон кузьмасько, кытӥяз станокме кельтӥсько.

— Нош станокъёс пусъемын-а, тӥляд шуыса?

— Азьлоосыз ӧй вал. Табере гуртоос но, ёросын но пусйыны косо, мед тодозы, пе, со Ӟамбайын лэсьтэмын шуыса. Куд-огез юа, конкуренцилэсь, пе, уд кышкаськы-а, киужъёстэ вузаськод-кузьмаськод, ачид ик дышетӥськод. Уг, шуисько, быгатонэ жаль ӧвӧл. Трос мурт дышетскиз ни, мед. Тани пиналъёс но кыстӥсько. Мон кытӥяз паймисько но: пиосъёс, оло, тросгес тунсыкъясько кадь куиськонэн.
Али бадӟымгес станокъёс лэсьтыны кутски, соиныз шарф керттыны луэ. Кускерттонлы мынэ 31-33 сӥньыс, нош таизлы — 75 сӥньыс.

* * *
В. Елышев кык этажъем корка но ӝутӥз. Муш вордэм, сад-бакча котыраз вырем сяна, туж яратэ пӧйшураны, койык сюръёслэсь олокыӵе но арбериос лэсьтэ. Нюлэскытӥ ветлыкуз, син шораз йӧто марлы ке но кельшись вайёс, писпу выжыос. Соосты но уже кутэ. Озьы ке но азьланезлы малпанэз — бадӟым крезь лэсьтон.

Иван Аркашев
Туспуктӥз Владимир Беломорских

Удмурт Дунне
By Удмурт Дунне Июнь 4, 2013 11:23