Анна Верина оске, оскытэ

Удмурт Дунне
By Удмурт Дунне Июнь 18, 2013 10:35

Анна Верина оске, оскытэ

Анна Верина

Анна Верина

Ог куать-сизьым ар талэсь азьвыл ки улам шедиз Анна Вериналэн кылбур бичетэз. Отысь лопыръяськыса лобись чуръёс монэ мальдытӥзы но, адскисьтэм нюжаосын сьӧлтаса, сьӧразы валтӥзы.

Соку визьмо авторез шараямелы туж шумпотӥ. Сое мон пуктӥсько тужгес но зол гожъясь писательёсын артэ, малы ке шуоно та автор — зэмос философ.

Али азям кылле Анна Вериналэн «И плакала душа» миым потэм бичетэз. Отын инкуазьлы паймон сярысь но гожтэмын, ӟеч адямиосын кусыпезлы шумпотон но возьматэмын, семья кылдытон, нылпиосмес йӧно карон тема но ӝутэмын. Будӥсь кылбурчиосмы та книгаез, мыр-мыр эскерыса, лыдӟизы ке, асьсэлы уно пайда шедьтозы — тодматскозы пӧртэм удысъёсын.

Тани Анна Верина, туала улонмы мыдланес шуыса, Россилы йыркуръяське, соин сое «И о ярой боли, вечной раной ставшей, Глиняной России — глыбе на песке» кылъёсын быдтыса куштэ. Вожез потэ Шундыпуксён палась кунъёслэсь адӟем каремез понна: «И, подражая западным столпам, Ты жаждешь стать надменной и всесильной». Ачиз отын ик оске ӟечлэн вормонэзлы: «Но твой недолог путь по их стопам, И отвратит тебя их дух могильный».

Оломар сярысь но куректэ автор, кылсярысь, вожез потэ черкын вуз каронлы. Угось Иисус Христос храмысь вузчиосты, сюлоен жугыса, туздыриз вал. Нош туннэ православной христианъёс коньдон поттон удысэ выемын.

Удмурт лыдӟисьёсты та авторлэн чуръёсыныз тодматыны, мынам валамея, туж кулэ. Вылаз ик, Анна Верина (Фаина Бушмакина) алигес юбилейзэ пусйиз.

Альберт Разин,
философия удысысь тодосчи

 Асьыклык* сярысь

Асьык муртъёс туэ ӧвӧл ни, кожаськод?
Янгышаськод! Адямилык улоз — уз ортчы.
Усто сямъёс — лул дуннеысь кузьым со, тод.
Сое уд си, сое уд ю, сое уд вормы.
Кыжен-мыжен, висёнъёсын
Одно ик — лулысь-сюлмысь
Ӧй ожмаськысалзы ке эмчиос,
Далай ни асьмеос
Архивъёсысь тузон луысалмы.

*Усьтӥськем, эш мылкыдо луон.

* * *
Бакчаям уӵы пырем огӝытэ.
Ачизъя мылкыд сётэ: чепыльтэ,
Позыртэ мырдэм бурмем сюлэмме,
Бугыртэ дарто, ческыт малпанме.
Киосме сактон пала сузьтӥсько,
Шундыез мон бакчаям ӧтисько.
Питырско шунды сиос му вылтӥ,
Зарниялляло пиялаосты.
Лысвуо марӟан кисьтаське лудын,
Емышен возь выл горд! — льӧльмаськемын.
Шонертӥ кусме,
Нош синмам — ӟардон…
Аръёсы сыло — баскичен, радэн…
Ой, кайгу-адӟон — улонэз кышъян.
Нылкышно даур — мӧзмонэн гыбдан.
Мусо уӵые, визьме эн сура…
Пересьмон арам лулме эн иса…
* * *
Ӧвӧл эрикмы асьмелэн:
улыку но,
берло но луом
Адӟонлэн эгесаз.
Огнын асьмеос.
Йыръёсмы-лулъёсмы но
ваньмылэн ик нимаз,
Музъемлэн бергамъяз.
Озьы ке но,
дуннеослэн мышказы
яркытгес ни пиштэ
пумнала ӝуась тыл.
Со тыл — асьмелэн
лул-ӝутӥськонмылэн
Ӧтисез, асьмелэн со —
пумтэм югдонмы.
* * *
Ортчиз ӝожан но, йыркуран но,
Сыӵе потэ ни лулскеме!
Тыр шепъёсын узыр муэн мон
Ӵошатӥсько туннэ асме.
Ужась кышно сямен, кин ке но
Чус аралоз монэ ӝоген.
Кылчуръёсы-нылпиосы нош
Жаль кылёзы кӧс ӝыжыен.

Берыктӥз
Юлия Разина

Кык тыл

Тылси гомӟе! — бубылиед лобӟе.
Одӥг нунал куспын кулэ вутскын.
Шунды ке — со улӟоз,
Вужер ке — шымырскоз.
Бен, шундыя инкуазь но сяськая,
Бубылиед поръя.

Нош уй тылскем
Лек кылыныз кыске,
Лопыръяса ньылэ бубылиез.
* * *
Толсуръёслэсь ини жади туж,
Югыт но номыр кадь уг пот.
Кураськыса, катьтэм ветлӥсь тус —
Кулӥ ке но, вӧсез уг шӧд.

Визьтэм ас Адӟонэ сьӧры мон
Валасьтэм ыж кадь мынӥсько.
Жади, жумми…
Сэзь ымныры нош
Аслам ӧвӧл кадь потӥсько.

Куке но туж урод
Горгона
Учкиз шорам но — мон кулӥ.
Кылбуръёсы гинэ ӝушто на —
Ӝуам пӧсь пень вылэ кыли.
* * *
«Яратонэ…» — со синпӧет, чильдэт…
Льӧль буёлэз сӥзьыл зорен гылтӥз…
Дунне — гылыт, пасё луэм липет,
Гылӟод, гуштод,
лёгаськыса вылтӥз…

Я кыместэ шуккод пеймыт азьын,
Ӧд ке адӟы, кытын сисьмем юбо…
Кыен пыроз сюлмад кышкан гизьы,
Улон потоз тырттэм — буш уробо.

* * *
Татын — ваньмыз ик ярантэм:
Сиён но ву,
Шулдыръяськон…
Бен, укылтэм но возьыттэм.
Татын «выльёс» кузёясько.

Нылпи лулъёс сӧсыртэмын.
Сютэм кулон…
Быдэс улон ик сыскемын —
Аштэм уллё.

Сыӵе та — Русь…
Каръяськемын кыйкай…
Кин азьлогес кулӥз,
Удалтэмын солы ик ай.

Берыктӥз Татьяна Чернова

Анна Верина — Россиысь Писательёслэн огазеяськонзылэн ёзчиез

Удмурт Дунне
By Удмурт Дунне Июнь 18, 2013 10:35