Шоро-куспо югдур

Удмурт Дунне
By Удмурт Дунне Май 31, 2013 14:15

Шоро-куспо югдур

portfel

Алигес, пе, Мускоын ӝотрес косон потэм: таре уг яра ни, пе, нокытын но — прессаын но, чеберлыко произведениосын но, ТВ-ын но, радиоын но, огъя вераса, калык азьын — нокыӵе но жоб кыл вераны яке печатланы. Валамон ини, указэз тодэм мурт ас пушказ но ораськон, вал уллян кылъёсын уз но малпаськы ни. Таре ваньзы ог-огзылы небыт гинэ вазиськылозы — этикетъя ог-огзэс няськатозы… Россиын ке ӧз луэ. Таин валче мон тодам вайи сандык пыдсам кемалась кыллись одӥг веросэ сярысь. Малпай: дыр вуиз сое калыклы возьматыны. Угось со гожтэмам одӥг пӧсь кылыз но ӧвӧл, вань ке — точкаосын ворсамын. Табере верос лыдӟон салкым ошмес вуэз юонлы пӧрме ни, дыр… Оло нош — уг…

Мынам одӥг тодмое вань. Кытысь со кылдӥз, али тодам но уг вайы ни. Городмы пичи бере, калык ӝог тодматске. Мон со адямиез тодэм дырысеным со ялан ужа одӥг интыяз: кыӵе ке госконтораын векчи чиновник луыса. Мон могало, дыр, солэсь арлыдзэ но шонер вераны. Ваньзы сое Парфёныч шуо, мон но. Угось зэмос нимзэ тодыны таки, ява, мон ӧй ваньмылы — кулэ ӧй кары, дыр, яке ӧй юа. Парфёныч но Парфёныч. Со тодмо шуонэ улэ городамы шоро-куспо квартираын, нуллэ шоро-куспо костюм, кышноез но шоро-куспо, машинаез но — сыӵегес ик. Шоро-куспо уждунзэ басьтыса, со арня пумын шутэтске шоро-куспо сад-бакчаяз, отчы одно ик сьӧраз одӥг ӟенелик шоро-куспо аракы нуэ но ӟамыртыса шоро-куспо кырӟанъёсты шоро-куспо кырӟалля. Арняяз огпол, аслаз верамезъя, со вутскылэ шоро-куспо дусымез доры, кудӥз шоро-куспо аптекаын шоро-куспо эмъюм вуза. Парфёнычлэн кык кузя шоро-куспо нылпиосыз вань: бадӟымез, пи, шоро-куспо ужа полициын; нош пичиез, ныл, шоро-куспо дышетске татысь шоро-куспо университетын шоро-куспо диплом басьтон понна. Тӥни озьы…

Кемалась ини со Парфёнычез адӟылэм вал. Но огаз ӝытэ мыным жингыртӥсь луиз. Мырдэм но кызьы мон тодам вайи сое… Пумиськоно, пе, вал, кемалась ӧм адӟиськылэ ини, нош аръёс, марым, ортчо ук. Таиныз мон соглаш луи. Зэмен но, шуи мон, аръёс ортчо. Тӥни ук, пе, кыӵе умой асьмеос ог-огмес валаськомы, шуиз со — шумпотӥз. Эшъёс, пе, бере… Мон лулски но азбарам потӥ: со татын вите ни вылэм монэ. Ӟечбур карем бере пуксим палэзьпу улысь ӟус вылэ. Парфёныч поттӥз пластиклэсь кык стакан, одӥг сылалтэм огреч но ӟенеликысь кыкнамылы быдэн кык чиньы ӝужда аракызэ ӟизатӥз, лэчыт синмын шапыкъёсты лыдъяса. Сябась, пе…

— Асьмеос эшъёс бере, ог-огмылы юрттоно ук, — гулькак юэмез бере шуиз со, — дунне, понимашь ли, со вылын ведь возиське.
Мон нош ик соглаш луи. Но юэме ӧз пот маке. Мон, пӧй, берлогес… Со нош ик аслыз лэзиз.

— Эх! таӵе куазен ул но ул вал. Гужем куазь, туннэ ужан вакыт быриз… Шуныт, лякыт…

— Нош мар люкетэ тыныд? — пайми мон. — Ул но ул ойдо…

— Тодскод ук мынэсьтым начальникме, — веранзэ мытӥз со.

— Кудзэ тӥ ваньды синмаз шуиськоды шеф, нош тыбыр сьӧраз — Така, — малы ке мынам но мае-сое тодэмме возьматэме потӥз. — Шуо, соды, пе, Испаниын дворец басьтэм, зарезь дурын…

— Во! Во! Испаниын гинэ ке луысал… У-у-у! Депутатэ али нырсаське… Пыроз, конечно, — уксёез вань. Самой со — Така! Дыг. Буш йыро, буква-цифраез но уг тодма. Нурскетӥсь парсь. Одӥг манетэз кыед пӧлысь но кылыныз ӝутоз — сыӵе аксым! Но… Варматаез министерствоямы ёзэтэн кивалтэ. Шуд пуйы со — Такамы… Нош кышноез — чисто, ява, бакча сульдэр! Кук вискыз, пе, лыдэ солэн — шофёръёс верало… Нош нылпиоссы таослэн — гын тулъёс… Атайзытэк, песятайзытэк ноку но Америкаын ӧй улсалзы… Табере отын ини кӧйзэс голято, зӧк коньдон турнало… Не то што ми — ас уженызы улӥсьёс, алдаськонэз тодӥсьтэмъёс…

— Уг валаськы тонэ, Парфёныч… Мар луиз? Шефед сярысь та верамдэ быдэс шаермы но тодэ… Кузёдэс вылэгес пукто-а яке тонэ улэгес каро-а?
Парфёныч, шуак тэтчытскыса ик, султӥз но, акшан омырез киыныз кораса, мадьыны кутскиз — ӟырдыт, коть али ик — трибуна сьӧры.

— Вот со бордын ик ужпум: ӧйтӧд, оломар луиз… Тон тодскод: милям-то Така — туж некультурной. Ӝокыт пеймыт гуртысь мылес… Армиын со прапорщикын но вал, пе, ог кык-куинь арзэ, со вие ик тӥни со кышно луонзэ но кӧто карем… Ать-два!

— Ну, улонэз адӟем адями ни шуыны луоз сое, иське… Туала буржуйёс армиез уг но тодыло ни ук… Йыр, иське, ужа солэн — сыӵе тузӥ варматай ке шедьтэм…

— Солэн йырыз пельпумъёсаз ӧвӧл — штан пыдсаз!

— Ма, отынэз но луыны кулэ, дыр…

— Вот тон котьку сыӵе либерал, — Парфёныч таӵ! пуксиз ӟус вылэ… Собере шарак кариськиз. — Но мон тон доры политика муген ӧй лыкты… Так вот… Мон малпай кунгож сьӧры улыны кошкыны… Всё! Тырмоз… Берлинын-а, Прагаын-а, Римын-а кафеосысь локан ведраоссэс коть поттылыны басьтозы на, дыр, монэ… Яке берен-а гутёям тэтчоно — Кенэмгуртам пудо возьманы…

Та кылъёсын Парфёныч бордам ӝиптӥськиз но, йырзэ гадь вылам поныса, викыштэм кариз. Таӵезэ солэсь кылэм-адӟем ӧй вал бере, мон воксё паймытски:

— Я мар бен луиз?

— Тодскод-а, марым… — Парфёныч пуконъяз шонерскиз но посӥськем кариськиз. — Милям со Такамылэн туж некультурной сямыз вань: со ваньмыз шоры ораське. Мать-перемать каре кабинетаз, невоспитанной бере… Ма, дышим но ини кадь… Но… Тодскод-а… Такалэн кинлы ке йырыз кур луэ ке, соку со дугдэ адямиез тышкаськемысь… Нимын-тулын гинэ кӧсыт вазе, ява. Официально.

Сыӵе дыръя адями тодэ ини: адӟон пилем — йыр вадесаз; яке ӝоген «ньӧралозы», яке туздыртозы, яке, берпалаз ӵыжыса, лэзёзы урам шоры «кион билетэн»… Нош мон ведь та интыям 15 ар ини… Коньдонэз ӧвӧл ке но шырыт, но — тырме, маке-со вӧзаз но шеде… Так вот… Така ялан шорам ораськылӥз, нош берло арнязэ уретэм кадь дугдӥз… Азьло кӧтэ но мырӟылӥз — умой улӥм Такаен… Уждун мынэ, нылпиосты пыдъяй… Нош таре — коть калъяськы, ява…

— Мар?

— Ӧд вала на-а, мар-а? — нискетӥз Парфёныч. — Така шорам ораськемысь дугдӥз. Иське, уг кар ни аслазэн… Быдэс арня ини монэн кезьыт но мыр-мыр: Платон Парфёныч да Платон Парфёныч… Нокыӵе … — остэк! Мар понна? Мон ведь калыклэсь тросгес уг кыскаськы… Вань улонэз со вожъяськисьёс суралтӥзы, быдтӥзы…

— Тынад нимыд, иське, Платон вылэм, вашкала Грециысь философлэн паньтэмез, — малпаськон кылзонъям мон вераны шедьтӥ — буйгатон чотын, оло…

— А монэ чик но уг дунъяло, ява, Платон но луыса, — мур лулӟиз Парфёныч но йырзэ ошиз…

— Сэре? Дунне быриз, лэся, шуиськод… — юано кариськи.

— Конечно. Мон интые таре Така одно ик апаезлэсь пизэ, донгыззэ, туйнатоз. Кемалась ини соос, кырныжъёс, бергало вал йыр вадьсам… Но мон ведь пичи адями… Марлы соос монэ озьы каро? Вордскем нуналам но алигес кыӵе сектай, утялтӥ вал мон соосты… Сэре мунчое но нуллӥ, нылокъёсты вайылӥ… Ресторан тыр юмшамы… Нош тон марлы ӧд лыкты соку? А-а, мон жингыръяй, но шуизы — тон, пе, командировкаын. Июне ук вал со, тодад вай ай…

— Ма, июне мон нокытчы ӧй пота, гуртын ик пуки…

— Али со бордын ужпум ӧвӧл, — шонскиз гинэ Парфёныч, — слушай, тынад ведь трос кусыпъёсыд вань… Тынад кышноедлэн агаезлэн нылыз Такалэн кенэныз одӥг гуртысь… Можот, со маке но со юрттысал, кулэ муртлы пеляз сипыр но вуысал… Медам сие ук монэ — мон умой, ас адями…

— Нош кызьы, пе, вуоз со кулэ адями доры? — пайми мон.

— Ма, мед вераськоз кышноед племянницаеныз, соиз — Такалэн кенэныз, нош кенэз — асэныз…

— Хм…

Зэм но. Мынам кышное тодэ вылэм со кивалтӥсьлэсь кензэ. «Ӧйтӧд…» — шуиз со но жингыртӥз агаезлэн нылызлы, соиз — азьлань… Мар вераськизы — ӧйтӧд, но кузпалы мынам мон кадь ик — амалтэм.

…Толэзь ортчыса, яке нош ятыргес, мынам маке муге кылдӥз Парфёнычлэн ужано контораяз пырыны. Вай ай, пӧй, тодмоме нялтас эскеро — мар каре ни, тодо.

Парфёныч вӧл шунды кадь пуке ӝӧк сьӧраз, нимаз пичи кабинетын. Ӧс вылаз — солэн нимыз. У-у, талэн ужъёс тупатскиллям, лэся… Мон ӧсэтӥ пырыкум, Парфёныч шуак луиз но боз-боз индылӥз:

— Стучаться надо, дыр!..

Но, монэ тодмаса, соку ик пальпотэм кариз:

— Пуксьы, пыр, кылбурчи! Вань книгаостэ, дыр ке шеде, лыдӟиськом… Мукетъёссэ витиськом… Оло, куке-соку лыдӟом… Но — цейтнот, ява… Дыр — ӧвӧл! Ужъёс — дурыстэм! Тӥ отӥ тросгес гожъялэ ужась калык сярысь, милемдыз но, калык понна тыршисьёсты, эн вунэтэ…

— Я, кыӵе-мар ини улон? — юасько.

— Сюлмаськонъёс ыж сӥть мында, — Парфёнычлэн ымныр кисырскиз. — Соиз-таиз уг тырмы, адямиослэн ужам уг поты, ваньзэ даром гинэ возьмало. Нош милемлы гыроно луэ… М-да…

— Ачид сярысь вера.

— А ведь соку, шонерзэ вераса, куалектӥськиз но вал… Но… Со пумиськеммы бере, усьсэяз, монэ ӧтё, ява, Кузё доры. Едрит-паровоз! Куалекъясько, пӧсям вуэ жальыр! ваське… Кабинетаз пырисько. Кузёмы отӥ-татӥ шӧл-пал вамышъя, котыр берга, нош ӝӧк сьӧраз — калык… Мон пыри гинэ но как, ява, со Кузёмы хроп! гинэ, будто ке шудыса, кӧтэ мырӟиз ук — мон куасалски… Со гондырлэн киыз секыт… И кутскиз ук, ява, со монэ мать-перемать!.. Сизьым-тямыс этажен… Чылкак, ява, симфония! Гимн! Нылпи веттан крезьгур вал со! Нӧкыен чечы суро! Эх, кисьматэ ук, ява, Такаед монэ! Нош мон синву пыр куанӥсько гинэ, кучапи сямен… Аслазэн ук кариз! Татчыозь арняен ятыр уйзэ ӧй кӧл, сиён ӧз мын, я, таре мелэ — кузьым! Улон соку ик шулдырскиз. Арня ортчыса, тани нимаз кабинет но сётӥзы — пичигес, правда… Но — ярам. Табере, ява, город сьӧры корка но пуктыны луоз ини… Кышноедлы, нимзэ вунэтӥ, салам вера…

— Кытын со Пердёныч? Ё.., м.., б..! — со вие коридорын гудыртэм кылӥськиз, — ойдо ни, сием потэ — лымшор вуиз! З..!

— Кузё ачиз ӧте монэ, — Парфёныч кырмектӥз. Собере нош кеськиз ук: — Мон али ик сьӧрады!

Учки но, Парфёныч ӧвӧл ни. Оп! шуытозь адями ышиз… Шоро-куспо югдур пӧлысь.

Вячеслав Ар-Серги
Туспуктэмез: udmfoto.ru

Удмурт Дунне
By Удмурт Дунне Май 31, 2013 14:15