Сусыпу уллялоз жобез

Удмурт Дунне
By Удмурт Дунне Апрель 2, 2013 11:26

Толэзьем кунянъёс но парсьпиос, 3 толэзьем ыжпиос, пыд йылазы сыло ни ке но, туж начаресь на. Бронхопневмония висён бордазы туж ӝог кырмиськыны пӧрмытэ. Тыоссы ляб ужаны ӵемысь кутско еж дыръязы кӧтынызы курадӟемен сэрен. Огпол кӧтазы йӧтылӥз ке, мугорзы азьланяз но ляб луоз.

Начар пудолэн вордӥсь-кыкуз ик уг тырмы кужмыз тыысьтыз вань люкаськем жобзэ кызйыса поттыны. Будэмъяз тыосыз уката но ӵоксасько. Вылаз ик — мумыезлэн кӧтаз улыкуз солы тырмыт вуэмын ӧвӧл ке А витамин.

Гадь тыр шоканы пӧрмытӥсьтэм пудо котькуд тӧл пельтэмез шӧдэ, ассэ ачиз шунтыны уг вормы. Пурысьтаны кутскем борддоръёс вискын, кот выж вылын солы уката секыт. Гидын люкаськем аммиак, сероводород, нюлам пырыос нырпелесаз гинэ уг пуксё — пыдло пыро. Вирсэръёссэ но ӵакмыто. Мугораз кислород рос-прос вуэмысь дугдэ. Пумен сюлэмыз но умой уг жугиськы ни. Мусэз, пекляез пуксе. Тыосаз люкаськем жобын уго кыӵе но бактериос уг «пыласько», соос ик вань пуштӥрлыкез сӧро ни. Тыэз отӥяз воксё но сисьмыны кутске.

Тыэныз курадӟись пудо шуген но ӵем шока. Сием потон мылкыдыз пуксе. Каллен будэ. Шокан шедьтытэк, кызйылэ. Кызонэз уката но пӧсьтэ ву юэмез бере.

Йӧнатыны пудоез луоно. Пенициллин, новоциллин, левомицетин, пепсин, эуфиллин кадь антибиотикъёс кунянлы но ыжлы юрттыны кулэ. Парсьлы пуктылоно тилан, фармазин. Вылаз ик ӟеч но витамино сюдӥды ке, туж усто луоз. Пудо шоры кидэс шонтӥды ке, пумен кулоз. Мукет пудоез но черлатоз на. Тыысьтыз жобез мед потоз шуыса, сусыпулэсь вайёссэ сётъяно. Веньёссэ вуэн парыса но люктады ке, номыр уродэз уз луы. Номыр но уг юртты ке, пудоез вандоно. Вандэмлэсь 2-3 часлы азьвыл пудоез сюдыны но люктаны уг яра ни — курадӟеменыз йырин пуштӥрлыкез пильыськыны быгатоз.

Эмъюмъёс сяна, сётъяно А, В, Д, Е витаминъёс, чорыг вӧй. Вань та ужрадъёсты быдэстоно пудо эмъясь чаклам улсын.

Екатерина Михеева,
пудо эмъян наукаосъя
кандидат

Удмурт Дунне
By Удмурт Дунне Апрель 2, 2013 11:26