Помидор кизьыны бер ӧвӧл на

Удмурт Дунне
By Удмурт Дунне Апрель 2, 2013 11:41

Помидор кизьыны бер ӧвӧл на

Помидор учкылэ ини кыре

Помидор учкылэ ини кыре

Лымы ӝоген быроз, музъем шунаны-кӧсаны кутскоз но адямиос бакчаосазы потозы. Но сад возисьёс али но тэк уг уло, укно дуръёсазы пӧртэм удъёс будэто ни. Кин вунэтӥз помидор кизьыны, эн куректэ, та бакча сиёнэз мерттыны али но бер ӧвӧл на.

Та нуналъёсы кизьыны луэ чаляк вуись но лапег будӥсь помидоръёсты, кудъёсыз чакламын плёнка улэ яке кыре мерттыны. Сыӵе томатъёс кисьмало, кизем дырысен 90 нунал ортче ке. Чаляк будӥсь но кисьмась помидоръёс пӧлысь выль сортъёс — «Афродита», «Капитан», «Легионер», «Пародист», «Пинк».

Вератэк кельтыны уг луы огреч сярысь. Со но, помидор сямен ик, шунытэз яратэ, но киярзэ чалякгес сётэ. Кылсярысь, «Хуторок», «Вояж», «Лиллипут», «Хасбулат», «Охотный ряд», «Амур» вазь вуись сортъёсты мерттӥды ке, 30-40 нунал ортчыса, огреч сиёды ни. Но июнь толэзе ик кияр бичан понна, соосты удэн будэто, но огречъёс кезьыт музъемез уг ярато. Укно дурады, балконады кияр уд будэтӥськоды ке, тодады возе: соослы шундыё инты кулэ. Уго ышыг интыын кияр помидорлэсь но зол висе, кузь кук будэ. Со сяна, огречлэн выжыез туж ненег, соин ик кыре мерттыны поттыкуды, каллен выре. Умойгес луоз, соосты пичиесь горошокъёсы яке торф стаканъёсы кизьыса. Бакчаяды мерттыкуды, кияр капчиен горшокысь усёз, нош торф стаканэ интыямын ке, быдэсак ик сюе донгоно, озьы огреч капчиен дыше выль интылы, бурмыны дырзэ уг быдты. Киярез удэн мерттӥськоды ке, сое 20-тӥ апрельысен кизёно ни. Собере ог 5-10 нунал ортчыса, луоз ини удлы кизьыны кабачокез, кукурузаез, тыкваез, дыняез, арбузэз, патиссонэз, физалисэз.

Сутэрпуэз мерттоно апреле

Яблокпу, грушапу мерттэм дырысен 5-7 ар ортчыны кулэ, собере гинэ писпуос емышъёсынызы шумпотто. Но куд-ог дыръя улмолэн, грушалэн шӧмзы асьмелы уг кельшы яке соос висё. Сыӵе юмокъёс медаз луэ шуыса, писпуосты шонер быръёно.

Базарысь, сюрес дуръёсысь вузаськисьёслэсь писпуоссэс эн басьялэ. Умой луоз, питомнике мыныса, отын сортсэ но уз пӧялэ, тӥ азьын ик копалтыса сётозы. Тулыс уката умой тупа чияпу (вишня), сливапу но облепихапу мерттыны.

Чияпуэз мерттэмдылэсь азьвыл гуэ «Рязаночка» яке «Сударушка» удобрениез сюен сураса понэ. Со тырмоз 3-4 арлы. Умой луоз вишняпудэс чырсатэм вал, скал кыедэн, чырсатэм пушнер-унябей вуэн кисьтады ке.

Тужгес но вазь, лымы шунам бере ик, сайкало сутэрпу, гоно сутэрпу (крыжовник), гузэмпу (жимолость). Соин ик таоссэ куакъёсты мерттоно апреле, пучыоссы тордыны кутскытозь.

Трос юанъёс кылдо яблокпуосъя. Кылсярысь, кыӵе улмопуэз мерттонӧ аресъемзэ-а яке кык аръемзэ? Писпулэсь арлыдзэ эн мерталэ, учке солэсь вайёссэ но выжызэ. Макем трос но таза соос, сокем ӟечгес луоз улмопуды.

Вунэтыны уг яра созэ но. Тулыс шунды зол шунтэ, соин ик будосъёс чаляк куасьмыны кутско. Тулыс соосты жалятэк но пуж-пуж кисьтано, умойгес луоз, пукетэм шур яке зор вуэн сектаса.

Венедикт Дадыкин

Удмурт Дунне
By Удмурт Дунне Апрель 2, 2013 11:41