«Дэрем пуно на»

Удмурт Дунне
By Удмурт Дунне Апрель 2, 2013 12:28

«Дэрем пуно на»

З. Батырева

З. Батырева

Грак черкогуртысь 77 аресъем Зоя Васильевна Батырева пужъятӥське, чильпаське, вуриське, керттӥське, канфет бумагаосты пунэ.

Зоя Васильевна вордскемын Грак ёросысь Вужгуртын. 7-тӥ классэ йылпумъяса, колхозын ужаӟ ыж сюдӥз, скал кыскиз. Озьы со вань улонзэ гуртын ортчытӥз.

Анаезлэсь адӟем карыса, вуриськыны, керттӥськыны но чильпаськыны кутскиз. 23 арес дыръяз Ускы (Кузебаево) гуртысь курасьёс лыктӥллям. Нылашлэсь юась но луымтэ, бызьтӥллям. Пирдан сётӥллям: кунян, валес но вуриськон машина.
Картэн улон трос ик шумпотон ӧз кузьма Зоялы. Кузёез юыны кутскиз, вылаз ик, пиналъёссы ӧй вал. Вож нуныен анайёсты адӟыса, лушкем синвуаськылэм но кайгырем со, малы меда базарын улэп мунё уг вузало шуыса. Нокин адӟымтэ дыръя, мунёоссэ радэн-радэн диван вылаз пуктылыса, шудылэм но. Нош бӧрысьгес ини ассэ буйгатъям: юись картэз, оло, умой атай но ӧй луысал?

24 ар ортчыса, кышномурт огназ кылиз. Зоя апай доры нош ик курасьёс лыктӥзы. 48 аресаз кыкетӥзэ бызиз — куать пиослэн атайзылы.

— Кузпалылэн пичиез пиез армиын вал ни, — веранзэ азьланьтэ кышномурт. — Аслам пиналъёсы ӧй вал бере, мон таоссэ но быгатэмъям нуныяны сюлмаськи. Анай шуэмысьтызы, туж шумпотӥ. Аслам кадь потӥзы.

Жаляса верано, кемалась ик ӧвӧл Зоя Васильевна кыкетӥ кузпалзэ но ватӥз, табере Гракысь арлыдоослы юрттэт сётонъя центрын улэ. Улонын пумиськись шуг-секытъёсты вормыны тырше киужен. Одӥг нуналэ бускелез доры куное ветлэм но ӝӧк вылысьтыз тусьтылы синмаськем. Огшоры вылымтэ со, канфет бумагалэсь пунэмын.

— Со тусьтыез кутыса котыр ласянь бергатӥ, огпал сэрегзэ сэрттӥ но, — куное ветлэмзэ тодаз вае Зоя Васильевна. — Дорам бертӥ но канфет бумагаослэсь лента лэсьтӥ, нош итыны визьмы ӧз тырмы. Клеен но лякыны выри — усе. Бускеле доры кыкетӥзэ ветлэме бере валатски, венен-сӥньысэн итоно шуыса. Табере котьма лэсьтыны дыши, лентаосты кыкналасянь вуриськод ке, лэсьтэм арбери эшшо но юнгес луэ вылэм. Канфет бумагае но таляк люкаськемын.

Канфет бумагаез кузьласянь шори куасалтоно, сое эшшо одӥг пол. Вамен ласянь но куасалляно. Озьы квадратъёсыз ваче итоно но лента лэсьтоно, нош со лентаосты вурӟоно

Канфет бумагаез кузьласянь шори куасалтоно, сое эшшо одӥг пол. Вамен ласянь но куасалляно. Озьы квадратъёсыз ваче итоно но лента лэсьтоно, нош со лентаосты вурӟоно

Зоя Батырева коньытэз уг яраты, соин ик канфет бумага быдэс Гракысь бичаса ветлэ. Нырысь ик кудыос, тусьтыос лэсьтылӥз, киыз волям бере бадӟымгес арбериос борды но басьтӥськиз. Кутэз, айшетэз вань, кылиз на, пе, дэрем пуныны. Эсьмаса, бумага куасаллян — физкультура манер луэ, чиньыослы купырмыны маза уг сёты.

Валентина Емельянова
Туспуктӥз Владимир Беломорских

Удмурт Дунне
By Удмурт Дунне Апрель 2, 2013 12:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*