Ческытлэсь уг ымо

Удмурт Дунне
By Удмурт Дунне Апрель 2, 2013 09:48

Ческытлэсь уг ымо

Е. Перевалова

Е. Перевалова

Грак черкогуртысь калыклы юрттэт сётонъя центрын (ЦСО-ын) 18 улӥсез. Нуналлы быдэ чылкыт сиёнэн соосты шумпотто пӧраськисьёс Елена Перевалова но Лилия Петрова.

— Ческыт сюдэммес шӧдыса, лэся, арлыдоос пӧраськем но курыны кутскизы, — серекъяса кадь веранзэ мытӥз столовойын ужась Елена Перевалова. — Улӥсьёслэн мылкыдзы ми понна закон, ма косо — быдэстӥськомы. Огаз арняе шаньги, мукетаз сӥльын нянь я эшшо маке пыжиськомы. Курласез ӧвӧл.

Переваловъёслэн семьяязы но ческыт сиыны дышемын. Угось Елена Михайловна арлыдоос доры ужаны лыктэмезлэсь азьло кондитер вал. Нуналлы быдэ ческыт тортъёс, пряник-печенняос лэсьтыса, киыз волямын.

— Уд но оске, магазинысь торт басьтэме вунӥз ни, семьяме куноятӥсько ас пӧраськемен гинэ, — шуиз Елена Перевалова. — Ачим мон Можга ёросын вордскемын. Пичи дыръям шудон коркаен шудыкумы, ог-огмы доры куное ветлӥмы, дэри тортъёс пӧрамы, вылзэ турын-куаръёсын чеберъямы. Со дырысен ик кондитер луэме потӥз. Малпанэ быдэсмиз, Гракысь 41 номеро профтехучилищеын повар-кондитере дышетски.

Училищезэ йылпумъямез бере Лена огдырлы ужаны интыяськылӥз нянь пыжон заводэ, отын ик кизэ волятӥз, пряник-печенняос пыжыса. Кӧня ке ар ужамез бере черкогуртысь столовое выжиз. Таяз тортъёс пыжыны дышиз.

— 2009-тӥ арын Грак ёрослы 80 ар тырмиз, кондитер эшъёсынымы бадӟым ӝӧк быдӟа торт пыжимы, — тодаз вайиз Елена Михайловна. — Пыжосмы 44 килограмм кыскиз. Чечыен табаньёссэ быдэс арня погыльтыны курадӟимы. Тортлэн вылаз Граклэсь туссэ но гербзэ лэсьтӥмы. Малпанмы пӧрмиз, тортмес туннэ но тодазы возё. Ческыт сиёнмы вань куноослы тырмиз.

Елена Михайловна та вакытэ кондитер ӧвӧл ни ке но, торт пыжонлэсь уг палэнскы. Аслэсьтыз тодон-валанзэ будэтэ, Интернетын бугыръяськыса. Ас быгатонлыкъёссэ эскере Гракысь кондитеръёслэн арлы быдэ ортчылӥсь вожвылъяськоназы.

— Пӧраськон понна трос кулэ ӧвӧл, адямилэн мылкыдыз гинэ мед луоз, — шуэ Елена Перевалова. — Курегпуз, сакыр но пызь вань ке, торт пыжыны луэ ни.

Пӧраськисьлэн яратоно сиёнэз — салат. Доразы малпамтэ шорысь куноос вуо ке, ческыт пӧсьтурынэз юдэ, отчы ватса консервировать карем фасоль, кукуруза но сухари, ваньзэ майонезэн суралтэ но, салатэз дась. Та сиён ческыт но, кӧттырымон но луэ.

Туж яратэ чорыг пыжыны. Ӵужкушманэз но сугонэз юдыса тыл вылын пырсатэ но сузяса дасям чорыг вылэ понэ, юдэм картошка ватсаса, гурын пыже.

Чечыен торт

Кулэ: 3 курегпуз, стакан но ӝыны сакыр, 3 пуньы чечы, 3 пуньы водка яке коньяк, 2 стакан пызь, 1 пуньы сода, 1 банка сгущёнка, 200 грамм нӧкы вӧй, мульы но шоколад.

Торт лэсьтон понна нырысь ик курегпузэз но стакан но ӝыны сакырез ӟеч-ӟеч шукконо, отчы ватсано шунтэм чечы, водка яке коньяк, пызь но уксусэн кисьтэм сода. Тортлы дасям ыльнянез умой нырконо, куиньлы люконо. Котькудзэ погыльтоно но пӧсь таба вылын пыжоно.

Тортлы крем но капчиен лэсьтӥське. Сгущёнкаез тусьтые кисьтоно, нӧкы вӧй ватсано, зол-зол блендерен шукконо. Табань вылъёсты, тортлэсь дуръёссэ дась кремен зырано. Со вылэ небӟытэм мульы но вуштон пыр поттэм шоколад пызьнано. Торт дась.

Йӧлвылэн торт

Бисквитлы кулэ: 250 грамм йӧлвыл, 2 курегпуз, 180 грамм сакыр, 185 грамм пызь, 5 грамм разрыхлитель, 10 грамм какао.

Кремлы кулэ: 300 грамм йӧлвыл, 100 грамм сакыр пызь.

Нырысь ик дасяно бисквит. Курегпузэз сакырен шукконо но йӧлвыл ватсано. Ваньзэ умой сураса, пызь но разрыхлитель йылтоно. Дась ыльняньлэсь куиньмос люкетсэ висъяно (со тӧдьы мед кылёз), нош кылемаз какао порошок ватсаса, шукконо. Вӧяса дасям таба вылын тӧдьы кӧмечез 10 минут ӵоже пӧсь гурын пыжоно, какаоен суралтэмзэ — 20 минут ӵоже. Кӧмечъёсты сӥятоно, зӧксэ — кыклы люконо. Кӧмечъёсты кремен зыраса, уйлы кезьыт интые пуктоно. Ӵуказеяз тортлэсь вылзэ емышъёсын чеберъяно.

Валентина Емельянова
Туспуктӥз Владимир Беломорских

Удмурт Дунне
By Удмурт Дунне Апрель 2, 2013 09:48