Астэ тышкаськон

Удмурт Дунне
By Удмурт Дунне Апрель 1, 2013 13:06

 

Коллегаос!

Коллегаос!

Юмореска

Огыр-бугыр нуналъёс вуизы: депутатлэн мандатэз понна нюръяськон ӟырдаз. Секыт йӧтоз «Улон-вылон» колхозлэн председателезлы Лёгор Шкляевлы. Cоин ӵошатскозы «коньдон пуйыос» — «Уралинвестпром» огазеяськонлэн кивалтӥсез Микаля Ефремов, бизнесмен Онтон Бородин но Госдумалэн азьвыл депутатэз Ондрей Березуцкий.

— Ничево, нюръяськом. Депутат луыса ичи ӧй лэсьты кадь. Адямиос шузиесь ӧвӧл, шонер быръёзы, — осконзэ вераз Лёгор Лёгорыч.
— Озьы, озьы, — дурбасьтӥз солэн эшез Лӧпшо Педунёв. — Сюрес но лэсьтӥське, нефтьлы но кузё луыны тыршиськом. Туэ тани колхозмы быдэс кунын азьветлӥсьёс радэ потӥз.

Но депутат луон понна выль амалъёс кутоно. Украинаын кадь ик. Отын Михайло Дериземля депутат луэм ассэ тышкаськем чотын.

— Астэ тышкаськон — со аслыд ачид пыд пуктон ӧвӧл меда? — йырберзэ кормаз Лёгор Шкляев.
Колхоз контораын сурым потымон споръяськон ӝутскиз. Парамон Кӧтурдэсов уретӥӟ шонер ӵектонэз, пе, Лӧпшолэн: ушъяськон бырйисьёслы акыльтӥз ни, нош астэ тышкаськон, янгышъёсты шараян адямиослы яралоз.

— Умойгес уз-а луы, Ефремов но Бородин сямен, Москваысь Пугачёваез но Киркоровез ӧтьыны? Дунтэм концертъёс возьматыны? — малпанзэ шараяз мукетыз дурбасьтӥсь Олег Куртчемов.

— Яке, Березуцкий сямен, бырйисьёслы тусбуеныд календарь кузьманы, — ватсаз Арки Поздеев.
Озьы-а, тазьы-а, но депутатэ кандидат Лёгор Шкляев бырйисьёсын пумиськоназ эшезлэсь Лӧпшо Педунёвлэсь ӵектонъёссэ улонэ пыӵатӥз.

— Дано эшъёс но дуно господаос! — вазиськиз со нефть но газ поттӥсьёслы. — Депутат дыръям мон трос гинэ наказъёстэс быдэстытэк кельтӥ. Кылсярысь, Тугалудэ асфальт сюрес лэсьтон йылпумъямын ӧвӧл на. Мувӧй поттӥсьёслы корка ӝутон ӝега. Соин умойгес, дыр, луоз мукет депутатэз бырйыса.

Культура юртын чал-чал луиз, собере кутскизы ук!.. Тон, пе, Лёгор Лёгорыч секыт ужлэсь палэнскыны турттӥськод. Кутскид бере, сюрес асфальтэн мед шобырскоз. Окыльна Курегова, профсоюзлэн тӧроез, меӵак шуиӟ

— Шкляев эш! Тон корка лэсьтон вылысь Ижкаре ог кызь пол ветлӥд. Фундамент кисьтэмын ни, борддоръёс ӝутско. Оскиськом, тынад ваньмыз пӧрмоз. Шкляев — оскымон депутат!

Огыр-бугыр вал «Данлык» но «Капитализм сюрес» эштосъёсын но. Депутатэ кандидат ассэ юн пушнераз, сюлоен шачыръяз, шуыны луоз.

— Ёросысь арлыдоослы юрт пуктыны куриды вал ке, бумагаос гинэ дасямын ай, коньдон висъямын ӧвӧл на. Мон янгыш, чурытэсь куронъёс пуктыны ӧй быгаты, — ассэ тышкаськиз со.

Ничево, буйгатӥзы сое, умой уж усьтыр-табыр уг быдэсмы, пе. Калленом, удмурт манером юрт ӝутэмын луоз, тонэныд ик, пе, лэсьтӥськоз.

— Йӧл трос кыскиськоды, нош уждунды пичи. Ужан условиос но ушъямонэсь ӧвӧл, — котыръятэк шуиз Лёгор Шкляев.

— Зарни шунды вадьсамы но ӝужалоз ай. Тон гуртоос сярысь сюлмаськиськод. Ма лэсьтозы Москваысь но Ижкарысь депутатэ кандидатъёс?! Концерт возьматозы, «вань куронъёстэс быдэстом» шуыса оскытозы но бырйисьёс сярысь вунэтозы. Нош тон, Лёгорыч, артэ, тонэ нуналлы быдэ адӟиськом, кабинетад ватскыса уд пукиськы. Тышкаськы астэ, шарая янгышъёстэ — со оскымон депутат луыны гарантия, — ӟырдыт вераськиз «Данлыкысь» дано колхозник Вениамин Виноградов.

Выль быръён амалъёсты пыӵатӥсь Лӧпшо Педунёв таин ӧз буйгатскы. Астэ тышкаськон, пе, со урод ӧвӧл, 40 процентэз бырйисьёс кандидатмылы дурбасьтыны дасесь. Лёгор Шкляевмылэсь рейтингзэ эшшо но ӝутон вылысь мед, пе, кандидатмес пуштралозы — критиковать карозы Сундошурысь но Вукогуртысь окты-калтыос, тордосъёс Макня Шурик но Горей Коля. Соос Лёгор Шкляевез жугыны дасесь: огзэ фермаысь пешкытӥз пызь ворамез понна, мукетсэ «миськиз» кышнозэ лыз-вож каремысьтыз.

Быръёнъёсъя выль пыжем технологлэн Педунёвлэн таиз но ӵектонэз музэ ӧз усьы. Макня Шурик но Горей Коля ядзэс ӧз жалялэ кандидатэз золгес лексён понна. Шурик кыл вӧлдӥз, Лёгор Шкляев колхоз чотын пиезлы Ижкарын коттедж пуктӥз, пе. Пӧяськемзэ чаляк шараязы.

Колилэн супыльтэмезъя, кандидат мукетъёссэ куаретэ анай кылзэс вунэтэм понна, нош ачиз кышноеныз но пиналъёсыныз удмурт сямен уг ик вераськы, «Удмурт дунне» газетэз но семьяез ньӧмыз понна басьтэ. Бырйисьёс азьын Шкляевлэн нылыз Зося но кузпалыз Дарья Дормидонтовна асьме сямен чылкыт вераськизы, вылаз ик, кандидат «Кенеш» журналлы гожтӥськемын на вылэм. Таизлэсь но «критиклэсь» ымзэ чаль пытсазы.

…Я, быръёнъёс йылпумъяськизы. Астэ тышкаськон-а, критика шуон-а умой радъямын вал, Лёгор Шкляев понна 72 процентэз бырйисьёс куаразэс сётӥзы.

— Урод сямъёсме выжыенызы подыса кушто, оскондэс уж вылын быдэсто, — калык азьын ассэ тышкаськем кариз выль пыжем депутат.

Сергей Широбоков

Удмурт Дунне
By Удмурт Дунне Апрель 1, 2013 13:06