26 пумо чер

Удмурт Дунне
By Удмурт Дунне Апрель 2, 2013 11:19

26 пумо чер

Ыжъёс но кечъёс черланы быгато 26 пумо паласькись висёнъёсын

Ыжъёс но кечъёс черланы быгато 26 пумо паласькись висёнъёсын

Ыжъёс но кечъёс черланы быгато 26 пумо паласькись висёнэн. Шуккиськыса вӧсь луон учыръёсты вератэк. Тужгес ӵем пумисько кӧт виян, гижы сисьмон но бруцеллёз. Берлоез адямилы но паласькыны быгатэ.

Бруцеллёзлэсь пудо шер кулэ. Но со вань ёзвиоссэ пумен шукке, бӧксӥсьёсты лябӟытэ.

Та кышкыт через вутто бактериос. Соос ыжез пушласянь сиё шуыса, нырысь-валысь адӟыны уг луы. Адямиос уго дышемын ӧвӧл пудолэсь мугорзэ чакланы: ӟырдамын со я ӧвӧл. Нош ыжлэн таза дыръяз температураез 38-40 градус возиськыны кулэ. Пӧсям вузэ но гонэз улысь синйылтыны шуг. Но шӧдытэк уд кыльы, пудолы ыжпи уг сюры шуыса. Куддыръя сюремез но усе. Мугорыз уго уг вормы ыжпиез «кисьматыны», сое пумозяз нуллыны. Бервылыз (последэз) но сузятэк уг усьы. Со сяна, ыжпи сюрон караз воспаление луэ. Пыдъёсыз быро, быгытъёсаз киста кылдэ.

Но вань та тодметъёс шараяськыку, висён туж пыдло пыремын луэ ни. Пушказ юнмам бактериосыз быдэс гидэз но черлатыса вуттӥзы ни, вылды. Кыедэ, вуэ, борддоре сюрыса, соос отын гань-гань 4 толэзь ӵоже улыны быгато. Нош пудолэн сӥль пушказ но гоназ 5 толэзь векало. Йӧлаз но пото, отын 1 арня ӵоже «кузёясько». Валамон нӥ та бактериос адями борды капчиен кырмисько но выль кузёез сиыны кутско.

Бруцеллёзэз рос-прос шараян понна пудолэсь вирзэ анализ лэсьтыны сётоно. Кышкыт бактериос сюризы ке, соку ӝегатскытэк эмъян борды басьтӥськоно. Юрттозы таӵе антибиотикъёс: тетрациклин, стрептомицин, доксициклин, рифампицин. Висён туж пыдло пыремын ни ке, пуктылоно луоз бисептол я нетилмицин.

Вунэтоно ӧвӧл тазатыны гидэз но. Креолинлэн, формальдегидлэн но феноллэн суретэнызы миськоно. Борддорез но вӧлдэтэз буяно извасткаен. Сотэк пудоез эмъянлэн толыкез уз луы.

Зэм, умойгес луоз, черлам ыжез вандыса. Ассэ йӧнатыны пӧрмытӥды ке но, ыжпи вайыны со ноку уз быгаты ни. Бруцеллёзлэсь вируссэ нуллӥсь кылёз, кинэ ке но черлатыны быгатоз. Солэсь сӥльзэ но сиыны уг яра.
Кӧт виян (анаэробной дизентерия) шоры кин но со кизэ шонтэ: пудое кӧня ке курадӟоз но бурмоз ай. Озьы 50 процентаз учырын ыжез ыштыны воксё но кема ӧвӧл.

Таиз чер ӵемысь омырске тулыс. Тол бере пудо лябӟемын, витаминъёс уг тырмо ни. Куд-огез боксӥсьёссэ кыре но поттаны азьтэмъяське на. Борддоръёс пурысьтало, выжъёс сисьмо. Ӵапак отчы ик люкасько пӧртэм бактериос.

Черлам пудо сиськемысь, интыысьтыз вырӟылэмысь дугдэ. Берпалыз ялан кыедэсь. Таза пудоез нимаз висъяно, таосыз но медаз черлалэ шуыса. Нош висисьсэ 12 час ӵоже сюдоно ӧвӧл. Кӧтыз быдэсак мед бушалоз. Котькуд 3 час ӵоже быректэм вуэн, крахмаллэн суретэныз люктано. Талэсь толыкез ӧз луы ке, биомицин но синтомицин антибиотикъёсты пуктылоно. Борддоръёсты буяно извасткаен.

Ыжъёслэн но кечъёслэн гижызы сисьмыны кутске гидэз кырсь но кот воземысь. Котын ялан сылыса, кузы небӟе, куалмаське. Чурыт азе лёгиськыса, юн вӧсь луо, чутыны кутско. Пумен гижызы но пилиське, сисьме. Сое ӧд ванды ке, сӧсыр пыдзэ формалинэн ӧд тазаты ке, мазьёсын зыраса ӧд биньы ке, ыж воксё но пыдтэм кыльыны быгатоз. Со сисьтӥсь бактериос уго вылэгес но вылэгес тубозы. Вандэм гижызэ сутоно — вань со бактериос ӝуаса гинэ быро. Кельтӥды ке, гидэ нош ик сюрес шедьтозы.

Екатерина Михеева,
пудо эмъян наукаосъя
кандидат
Туспуктӥз Сергей Марков

Удмурт Дунне
By Удмурт Дунне Апрель 2, 2013 11:19