Партия — нылкышно тусо

Удмурт Дунне
By Удмурт Дунне Февраль 8, 2013 11:54

Партия — нылкышно тусо

А. Гальцин

А. Гальцин

Калыклэн улоназ кыӵе интыез партилэн? Ужа-а со быръёнъёс вискын? Та но мукет юанъёслы валэктонъёс сётӥз, валтӥсь редакторъёсын пумиськылыкуз, «Огъя Россия» партилэн Удмуртиысь ёзэзлэн секретарезлэн воштӥсез Андрей Гальцин.

А. Гальцин тодматӥз партилэн туннэ ужъёсыныз. Вераськыны кутскыкуз ик, со туж шонер пусйиз: партилэн валтӥсь ужпумез быръёнъёсын вормон гинэ луыны кулэ ӧвӧл. Со мед луоз нуналмысь уж: быръёнысен быръёнозь, проектысен проектозь.

Партиос сярысь закон кутэм бере соосты кылдытон данаклы капчиятэмын вал, со соку ик шӧдӥськиз огъя лыд вылын. Соин валче кивалтӥсь партия уката шаплы кариськыны кулэ. Бен, «Огъя Россия» ворме котькудаз сямен быръёнъёсын, парламентын котькинлэсь трос мандат басьтэ, озьы ке но ялан сюлмаське аслэсьтыз радъёссэ паськытатон сярысь. Туннэ нуналлы партилэн Удмурт ёзаз пыре 27 сюрс адями. Шаерамы кылдытэмын 34 интыысь ёзъёс но данак первичной огазеяськонъёс. Но туннэ понна со ичи, лыдъяло партиен кивалтӥсьёс. Огазеяськон сюлмаськыны кулэ кык поллы будон сярысь. Берло аръёсы партилэн ёзчиосыз арлы быдэ 1-2 сюрслы йылылӥзы ке, туэ ужпум пуктэмын 10 сюрс выль муртэ кыскыны.

— Но со уг возьматы, партие котькуд мылкыд карисез кутозы шуыса, — вера А. Гальцин. — Ми сюлмаськыны кулэ асьмелэн чылкытлыкмы сярысь, пӧламы луыны кулэ йӧно адямиос.

Нялтас вераса, партия кивалтӥсьёс кожысь гинэ ӧвӧл — сыӵеослэн лыдзы 30 процент сяна ӧвӧл, данакез ёзчиос — тэк пукыны яратӥсьтэм, азьветлӥсь мылкыдо огшоры адямиос, егитъёс. Но тунсыко лыдпус: 68 процентэз партиецъёс — нылкышноос.

Кыӵе проектъёс калыклы пайдаен берытскизы? Веранэз ӧвӧл, нырысь ик, «Тазалыкез утён удысэз выльдон» но «Дышетон» федерал проектъёс. Городын улӥсьёс ас пыд улазы шӧдӥзы азбаръёсысьтызы волям сюресъёсты. Жаляса верано, «Чылкыт ву» проектлы коньдон нокызьы уг окмы — сокем трос отын лэсьтонэз. Со понна Удмуртия ушъяськыны быгатэ аслаз «Егит дыр» проектэныз. Отчы пырисько 25 сюрс егитъёс, соос эшъёссы пӧлын вӧлмыто таза улон сямъёсты.

Одӥгез тужгес пайдаёез — «Огъя Россия» валэктэ» проект. Калыклэн шугъяськытӥсь юанъёсызлы валэктон сёто шаерысьтымы пӧртэм кивалтӥсьёс. Вазиськисьёс туж трос: асьсэос но лыкто, телефон пыр но жингырто. Озьы куд-огез быгатэ кема аръёс ӵоже сюлмаськытэм юанзэ син куспын сэрттыны-пертчыны.

Журналистъёс политиклэсь меӵак юазы: вань ужрадъёс быдэсмо бюджетысь коньдонэн, соку малы «Огъя Россия» ваньзэ ас чотаз гожтэ? Андрей Иванович ӧз сеськы: шонер, партилэн нимысьтыз аслаз зӧк кисыез ӧвӧл, но со сётэ кичӧлтон, кузёяське, кытчы умойгес кутыны коньдонэз, одно лыдэ басьтэ калыклэсь нырысь интыын сылӥсь кулэяськонъёссэ. Малпаськоды, мукет партиос кивалтонэ вуысалзы ке, озьы ӧй карысалзы? Соку малы нюръясько? Ваньмыз кыстӥсько ук власть дуре — со бордын ик партилэн валтӥсь ужпумез. Вормоз — кивалтоз калыкен. Но со понна нырысь котырад огазеяны быгатыны кулэ.

Удмуртилы азьланяз йыр быръён пумысен политик туж уг шугъяськы: ваньзэ возьмато ук лэсьтэм ужъёс. Нош кызьы быръёно: вылласянь пуктоно-а (назначение) яке калыкез куара сётонэ кысконо — туж бадӟым пӧртэмлыкез уз луы. Элькунмы ортчылӥз ни созэ но, тазэ но. Асьме Президентлэн данэз бадӟым, соин ик кӧберанэз ӧвӧл меӵак быръёнъёслэсь. Мукетыз ужпум: кӧня отчы коньдон кошкоз…

Зинаида Кириллова

Удмурт Дунне
By Удмурт Дунне Февраль 8, 2013 11:54