Пальпотӥсь синкылиос

Удмурт Дунне
By Удмурт Дунне Февраль 14, 2013 14:24

Пальпотӥсь синкылиос

sinkyli

Туспуктэмез: udmfoto.ru

Верос

Кин меда яратэ та акылес сӥзьылэз? Зор, дэри, кезьыт. Таӵе куазен мынам но пушкын кезьыт, мылкыд дэриен саптаськемын кадь. Номыр карем уг пот. Али но укно пыр ураме учкыса пукисько. Нош отын…

Тӧл кызьпуысь берпум куарзэ ишкалтӥз. Кызьпу огназ кылиз. Кыӵе мон сое валасько. Таӵе ик шимес сӥзьыл нуналэ мон но огнам кыли. Ар талэсь азьло Костяеным люкиським. Со шуиз: «Асьмеос ум луэ ни ӵош. Мон уг быгаты таӵезэ вунэтыны.» Мае? Мае вунэтыны? Мар мон сое кари? Быдэс ар со юанъёс йырысь уг ни кошко. Сӥзьыл тӧл кадь ик ваньзэ сюлмам пазяса кыллё.

— Семёнова! Тон мар куака лыдӟыса пукиськод? — дышетӥсьмылэн гудыртэм куараез сайкатӥз монэ. — Усьты книгадэ!

Мылы потытэк утчаны кутски параграфез. Аслам йырам Костя, нокыӵе история кулэ ӧвӧл?
— Оля, кыӵе параграф? — юай вӧзам пукись эшелэсь.
— Дас кыкетӥ. Тонэн мар Лена? Весь Костядэ малпаськод-а? Вунэты ни сое. Вӧсь карыны турттыса, юромо озьы шуиз, дыр?
— Нылъёс! Тӥ урокын-а, базарын-а? Шыпыт кариське! — нош ик черектӥськиз Василиса Ивановна.

Со куспын пельпумам йӧтскись луиз. Берытски. Костя, чагыр синъёсыныз небыт учкыса, шуиз:
— Лена, книгаме вунэтӥськем. Тӥляд кык кадь. Вай, пожалуйста.
— Ме, — мычи солы книгаме. Кыӵе кема вал ни соин ваче син учкем. Одӥг классын дышетскиськом ке но, со учыр бере ог-огмылэсь палэнскиськом.

Урок быриз. Ваньзы классысь пото ни, нош мон книгаме утчасько. Воксё вунэтӥ Костялы сётэмме.
— Костя, книгаме берыктод, дыр? — мыняса юай солэсь.
— Тани, тау бадӟым! — шорам учкытэк ик сётӥз.
— Мар ке луиз-а, Костя? — кунэрес мылкыдзэ шӧдыса, юай.
— Урокъёс бырем бере кыль классэ, вераськон вань.

Возьмаськон туж секыт, минутъёс быдэс даур кадь кыстӥсько, шуылэ анае. Зэмзэ но, урокъёс туннэ ноку уз ни быре кожасько вал. Мар меда вералоз ни? Оло, яратӥсько шуоз? Туннэ сыӵе небыт шорам учкиз ук. Нош малы книгаме сыӵе мылкыдтэк берыктӥз? Оломар но йырам берга. Дышетӥсьёслэсь верамзэс уг ик кылӥськы ни, киы маке но гожъя, нош синъёсы нош ик укно шорын. Нош отын, вожмаськыса сямен, экто, поръяло, шудо нырысетӥ лымы пырыос. Соос шоры учкыса, мынам но шудэме, тэтчаса бызьылэме потыны кутскиз. Таӵе дырез мон туж яратӥсько! Сюлмы мае ке но умойзэ шӧдэ кадь.

Тани ми нош ик ӵошен. Учкиськомы синмысь синме. Кабинетысь удмурт писательёслэн туспуктэмъёссы но сак учко кадь ми шоры.

— Книгаысьтыд «Костя, мон тонэ яратӥсько!» гожтэмез адӟи. Лена, со чын-а? — котыръятэк юаз Костя.

Шӧдӥсько, бамъёсы горд-горд луизы, шоканэ пытсаськиз кадь, синкылиос люкасько.
— Чын! Чын! Яратӥсько! Тыныд бон мар? Куштӥд монэ, вунэтӥд. Нош мон яратӥ, али но яратӥсько ай!
— Денистэ вунэтӥд шат?
— Кыӵе Денис? Нокыӵе Денисэз уг тодӥськы. Мон тонэ яратӥсько!

Костя, киыныз йырзэ кутыса, кема одӥг интые учкиз. Со куспын мон но буйгатски.
— Кыӵе Денис? — выльысь юай мон.
— Шат вунэтӥд? Мыным Оля ваньзэ вераз соку.
— Мае, вераз? — нош ик керӟегъяськыны кутски мон.
— Тон, пе, мукет гуртысь Денисэн ветлӥськод, сое яратӥськод. Ачид со сярысь мыным вераны кышкамед, Оляез косэмед.

Веран кылъёс уг шедё, нош ик шоканы омыр уг тырмы. Мискинь сюлэмы, четлыке сюрем сӧсыр тылобурдо сямен, берпум кужымзэ люкаса, лопыръяське. Тани-тани гадьысьтым потоз кадь.
— Уг, уг оскиськы! Кызьы озьы тужгес матысь эше озьы шуоз?

Йырысь малпанъёс муш палэп кадь гужето. Малы, мар понна матысь эше люкиз яратоно адямиелэсь? Соин йырин кӧня куректӥ?! Олялэсь аслэсьтыз юало шуыса, ури-бери потыны вырӟи.
— Лена, сыл! — тодмо куара монэ интыям думиз кадь. — Олялэн кылъёсызлы оскыса, мон соку кужмысь тонэ вунэтыны тырши. Собере — синмаськи. Лена, вождэ эн вай, но мон Оляез яратӥсько.

Та кылъёс бере малы ке сереме потӥз, сюлмысьтым секыт из усиз кадь.
— Мон туж шумпотӥсько тӥ понна. Ог-огдылы тӥ туж тупаськоды! — пальпотӥсь ымнырысьтым синкылиосме ӵушылыса, ульчае вамыштӥ.

Нош отын… Син мальдымон тӧдьы лымы кылле. Сӥзьыл куазьлэсь вань кырсьсэ, дэризэ ас улаз шобыртэм.
— Кемалась тазьы кулэ вал! — гадь тырам чылкыт омырез шокчыса, тӧдьы шобрет вылэ пытьыосме кельтӥ.

Анна Шарыпова
Алнаш ёросысь
Выль Утчан школаысь
9-тӥ классын дышетскись

Туспуктӥз Александр Горбунов

Удмурт Дунне
By Удмурт Дунне Февраль 14, 2013 14:24