Котькуд коркалы — паспорт

Удмурт Дунне
By Удмурт Дунне Февраль 8, 2013 10:39

Котькуд коркалы —  паспорт

ЖКХ-лэн ужпумъёсызлы сӥзем кенешон

ЖКХ-лэн ужпумъёсызлы сӥзем кенешон

Жилищно-коммунальной хозяйствоен герӟаськем туж трос юанъёс кылдо. Тае лыдэ басьтыса, «Огъя Россия» партилэн кивалтӥсезлэн Д. Медведевлэн улосысьтымы ёзэз меӵак телефон пыр кенешон орчытӥз.

Ужрадэ пыриськизы Лэсьтӥськонъя, архитектурая но улон инты политикая министерствоысь, Улон интыя кун инспекциысь, Ижысь ЖКХ-я управлениысь валтӥсь специалистъёс. Чаклам дыр йылпумъяськем бере но телефонъёс кема ӟырдазы на. Калыклэн юанъёсыз тымиськемын. Туж тросэз герӟаськемын жилищно-коммунальной хозяйствоен сётӥськись услугаослэн ӟечлыкенызы, шунытлы, вулы, тыллы дунъёсын но мукет. Котькудаз ик учыре специалистъёс ӵектӥзы: нырысь вазиське кивалтӥсь компание. Отын кылымтэ-адӟымтэ каро, юандылы умой-умой валэктон уг сёто ке, юрттыны быгатоз Улон интыя кун инспекция.

— Но дунъёс пумысен юанъёс но уз кылдэ, квартираосы пуктэмын луизы ке вуэз, шунытэз, тылэз чаклась приборъёс, — шуиз Лэсьтӥськонъя, архитектурая но улон инты политикая министрлэн воштӥсез Иван Новиков. — Уката ик выль куронъёсъя таӵе приборъёс матысь дыре котькуд улон интыын луыны кулэ ни. Соосты пуктылозы управляющей компаниос, адямилэн счётчиклэсь дунзэ али ик сётыны луонлыкез ӧвӧл ке, 5 ар ӵоже пичиен-пичиен тыриськыны быгатоз.

— Бен, тросэз ӝожтӥське: куд-ог квартираосын кунооссы аръёсын уло, соос управляющей компаниосын пусйиськемын ӧвӧл, иське, номыр понна дун уг тыро, — шуиз Иж город администрациысь ЖКХ-я управленилэн кивалтӥсез Елена Дворниченко. — Жаляса верано, али законэн юнматэмын ӧвӧл пусйиськымтэ муртъёслы тыриськонъёс тупатоно шуыса. Но та сярысь вераськонъёс Москваын мыно ни.

Озьы-а, тазьы-а, но коркаосты тыро-пыдо тупатъян удысэз бадӟымесь воштӥськонъёс витё. Иван Новиковлэн верамезъя, 2013-тӥ ар ӵоже таин герӟаськем пӧртэм документъёс дасямын луозы. Ваньмыз радызъя тодмо ӧвӧл на ке но, валамон ни: котькуд коркалэн луоз электрон паспортэз. Отын пусйиськоз, кыӵе арын со ӝутэмын, ку выльдылэмын шуныт, ву сётон гумыосыз, кӧня со коркан улӥсез но мукетыз. Али юртъёс сярысь тыро-пыдо тодо ке управляющей компаниос гинэ, электрон паспортъёс муниципалитетъёслэн но син улазы луозы. Нялтас вераса, республикаямы трос квартираем юртъёс 12 сюрс пала.

Шаерамы улӥсьёс корка пушъёссы сярысь гинэ уг сюлмасько, азбаръёссы но шулдыресьгес мед луозы кадь потэ. Нош мар кароно, укно улын толэзь пала жуг-жаг кыстаське ни ке, управляющей компания лымыез уг сузя ке? Меӵак телефон пыр кенешонэ люкаськемъёс валэкто: Ижын вань муниципальной милиция, вазиськоно отчы. Нош мар кароно, укно улысь газонъёс, пыдын ветлон сюресъёс вылэ куд-огез машиназэ пуктылэ ке? Ӧжытак чидано. Машина кузёослэсь кылзэс юась закон республикаямы али ӧвӧл. Но Кун Кенешлэн Тӧроезлэн воштӥсез, «Огъя Россия» валэктэ» проектлэн координаторез Светлана Кривилёва оскытӥз: парламентын та сярысь вераськонъёс мыно, одӥгаз сессиын та ужпум учкемын луоз. Нылпиос шудон-бызьылон интыосын машинаос сылыны кулэ ӧвӧл!

Элина Кумачёва
Туспуктӥз Владимир Беломорских

Удмурт Дунне
By Удмурт Дунне Февраль 8, 2013 10:39