Гракын ворттылэ Граша

Удмурт Дунне
By Удмурт Дунне Февраль 28, 2013 18:18

Гракын ворттылэ Граша

igry

Кыкетӥ нуналзэ Грак черкогуртын спортъя бадӟым праздник ортче. 19-тӥ Гурт шудонъёсы вань ёросъёсысь спортсменъёс люкаськемын. Туннэ ужрадэз сиё-дано усьтӥзы.

Грак черкогурт туссэ воштӥз. Ульча кузя турлы буёло флагъёс лопыръясько. Спортсменъёслы но учкисьёслы капчи мылкыд кузьмало 60 пала лымы мунёос. Соосты лэсьтыны юрттӥз Гракысь егит пи Константин Паранин. Удмурт кун университетысь искусствоосъя но дизайнъя институтын дышетскись вордскем черкогуртсэ шулдыргес карыны малпаз. Лымы мунё лэсьтыны дышетӥз школае ветлӥсьёсты. Озьы гракъёс, ваньзы дэмен кариськыса, мультфильмъёсысь геройёсты улӟытӥллям.

Гурт шудонъёслы шуыса кылем арын ик выльдӥзы-тупатъязы школаосты но нылпи садъёсты, пуктӥзы куас база но хоккеен шудон инты. Пусйыны кулэ, нылпиос но егитъёс гинэ конькиен уг нискылало, арлыдоос но, егит дырзэс тодазы вайыса, вожмаськыса хоккеен шудо, конькиен нискылало.

Ӟырдыт кезьыт нуналэ туж пӧсь спортзалъёсын: кин ыбылӥське, кин суй кужымзэ эскере, туп мыжга, шашкиен шудэ. Ыбылӥськисьёс пӧлын, азьвыл аръёсы сямен ик, котькинлэсь трос очко люказы Эграысь нылкышно кивалтӥсьёс: Светлана Крмакова но Татьяна Чуракова — 88 но 84 очко.

Та ӵошатсконъёсы кӧня ке воштонъёс пыртэмын. Азьвыл аръёсы хоккеен ньыль команда ке шудӥз, туэ куатёзь йылтӥзы. Эгра, Глаз, Вотка, Дэри ёросъёс борды итӥськизы Якшур-Бӧдья но Пичи Пурга ёросъёс. Нырысетӥ шудонэз усьтӥзы эграос но пургаос, шудон 2:0 лыдын йылпумъяськиз.

21Вӧсь луон учыръёс но пусъемын. Пургаысь хоккеист чиньызэ тӥяз. Стадионын куасэн бызьылӥсьёс ӵошатскизы. Нош шудонъёслэсь нырысетӥ медальзэс утӥзы командаен спринтын бызьылӥсьёс. Вормисе потӥзы шаркан нылъёс но ува воргоронъёс.

Та ӵошатсконъёслы котькуд ар рос-прос дасясько ёрос йыръёслэн но Правительстволэн командаоссы. Тол шудонъёс дыръя кивалтӥсьёс волейболэн шудо. Шудон арысь аре кужмоя, азьвыл аръёсын вылӥ кивалтӥсьёс ёрос йыръёсты «кокало» ке вал, берло аръёсы ёрос йыръёс но кужмо шудыны кутскизы. Озьы туэ нырысьсэ ёрос йыръёс 3:1 лыдын вормизы.

Туннэ ужрадэз сӥё-дано усьтонэ вуылӥзы шаерысьтымы вылӥ кивалтӥсьёс, дано спортсменъёс. Туэ гужем Грак черкогуртлы 200 ар, Ашальчи Окилэн вордскемез дырысен 115 ар тырме бере, ужрадэз усьтонлэн но оглюкетэз та лыдпусъёслы сӥземын вал. Учкисьёслы капчи мылкыд кузьмазы ёросысь вить пӧртэм выжы калыкъёс, шудонлэн утисез — Граша вал.

19-тӥ Гурт шудонъёс ортчем аръёслэсь висъясько. Ростелеком сюлмаськемъя ӵошатсконлэсь мынэмзэ учкыны луэ меӵак эфирын Интернет пыр.

Валентина Емельянова
Туспуктӥз Владимир Беломорских

Удмурт Дунне
By Удмурт Дунне Февраль 28, 2013 18:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*