Эгыр вылын пӧртмаськон

Удмурт Дунне
By Удмурт Дунне Февраль 5, 2013 09:31

Эгыр вылын пӧртмаськон

8-5-1

Венгеръёслэн сиёнзы — гуляш

Румыние, отысь сэкей венгеръёс доры вуылыкум, паймытэк ӧз луы.

Азбаразы ик ошмесысь сыномем корт шӧмо минерал ву ӟиза. Сиськыку макарон пӧлы сакыр поно. Бадӟым нянь колдызэс гурын сьӧдэктытозь ик пыжо но пуртэн куртко-сузяло. Удмурт пельняньмес нош… дуско вылын вандылыса сиё.

Татысь Трансильвания музъем вылын эмеспиелэн Дэметэр Миклошлэн вордскем палъёсыз: Ковасна ёрос, Сэнтдёрдь (Святой Георгий) город.

Татын яратоно сиёнзы — сӥль. Но асьмелэн сямен бадӟым юдэсъёсын уг пукто — сӥлен сиёнзэс олокызьы но пӧртэмъяло. Лечо ке пӧра — сугонэн, помидорен, паприкаен (ческыт пӧсьтурынэн), отчы парсь сӥльлэсь лэсьтэм, ляб ӵынатэм колбаса ватсаське. Гуляш ке — нап шыд кадь, сугонэн но паприкаен. Пёркёльт — юдэм сӥлез сугонэн кӧня ке парсатыса, помидор сок пӧлын паприкаен ӵош пӧзьто на. Паприкаш — тазьыгес ик, но курег сӥлен (чорыген), йӧлвылэн. Вань на токань — картошкаен, жаркое кадьгес… Огъя вераса, даурысь дауре возиськем пӧраськон сямъёссэс венгеръёс утьыса возё.

Сэкейёс шуо: нянь вӧзын сӥль (колбаса) но сугон вань ке, ярам. Но одно ик горд помидор, ческыт но курыт пӧсьтурын, вож сугон, петрушка кадьёс пуктыны уг вунэто. Соин ик дуско вылын созэ, тазэ вандылыса, вылысьтыз вылаз тырыса (бутерброд порма) сиськон сямзы асьсэлы тупа. Мон талэсь вуёми. Нош тыл вылын пӧртмамзы кельшиз.

Дэметэръёс городлы матысь Бикфалва гуртэ пичияк корка басьтоно кариськизы. Бакчаез, емышо писпуосыз но вань бере, ужмы бер ӝытозь ӧз бырылы. Оград Миклош векчи гинэ ыль колбаса ваем но, азбарын тыл вылын пыжыса, сое сиим. Ческыт, но курыталэс, укыр кӧё-вӧё потӥз.

Мукет дыръя Дёндилэсь но Каталэсь, дыдыосмылэсь, Настя анайзы юа: гомбоц сиёды-а пе. Таос лӧптӥзы: сиём, сиём… Настя векчиоссэгес слива дасяны косӥз. Ачиз пельняньлы сямен ыльнянь дасяз, отчы пӧзьтэм картошка нелькыса понӥз на, собере лайиськиз но зӧкесьгес котыретъёслы вандылӥз. Отчы сливамес тырыса, пельнянез сямен чепылляса, пичи туп кадесь лэсьтылӥм. Быректэм вуын соос 2-3 минут гинэ пӧзизы. Гомбоцмес, пырсатэм сукари пызе веттылыса, сиим. Настя шуиз: таӵе сиён пушкы чурыт варення но поныны луэ.

Мон отын дыръя Каталэн но, Дёндилэн но, Эржебет туклячилэн но вордскем нуналзы тупаз. Миклошлэн анаез ческыт торт но, сливаен пыжос но вайылӥз. Нош тужгес син азям кылиз винэтэ пӧраммы.

Миклош азбаре тылскиз, шашлыклы сямен, ӝуась эгыръёс дасяз. Отчы, кӧня ке интыетӥ пасялляса, баклажанъёс тыриз но берыкъяса-берыкъяса пыжиз. Ошмесысь минерал ву пыртӥм. Пӧсь баклажанъёсыз, тазысь вуэ веттылыса, сузямы но бадӟым дуско вылын пу пуртэн кораса векчиятӥм — нелькем кадь луиз. Табере нимысьтыз сурет (майонез) дасяно. Ыль курегпуз ӵужез чечы пуньы тыр, йырвыло карытэк, горицаен сурано (укыр курытсэ кулэ ӧвӧл). Табере татчы пичиен-векчиен гинэ кӧсвӧй (рафинированнойзэ) ватсалляса, пу пуньыен весь огпала гинэ, комоко медаз луы шуыса сурано… Озьы та суретмы пумен напчиз, тӧдьыёмиз, пичи тусьты тыр луиз. Баклажанэн огазе карыкумы, векчи гинэ юдэм сугон но сылал понӥм на. Тае эшшо зол-зол сурам.

Нянь вылын со туж ческыт кошке вылэм. Ӵын зыныз уката аспӧртэм шӧмо каре. Та винэтэ сиёнэз, морозильникын кынтыса, толлы но дасяны луэ. Баклажан интые кабачокъёс но, пе, яра кутыны, только шӧмыз мукет луэ.

Чорыгез татын трос ик уг сиё, уг ярато вылэм. Ӝукез но уг тодо. Сюкасен сиёнэз (сюкасез но) веръямзы ӧвӧл. Со понна сӥль но бакча сиёнъёс ваче туж тупало вылэм.

Гуляш
Кулэ: 1 килограмм кунян сӥль, 3 йыр сугон, 4 картофка, 4 пуньы парсь кӧй, 1 пилет чеснок, 1 грамм тмин, 10 грамм горд пӧсьтурын, 2 вож курыт пӧсьтурын, 3 помидор, шӧмызъя сылал.

Венгеръёс гуляшез сиё шыдэз сямен. Дасяны кутскиськомы сӥль бордысен. Сое чылкыт миськыса, пичи кубикъёслы вандылоно но сылал пызьнано. Сугонэз векчи юдыса, таба вылын зарни пыры луытозяз пырсатоно. Собере отчы ватсано юдэм сӥль. Пичи тыл вылын пароно, аслаз вуэз потоз.

Ӝыны час ортчыса, шыд лым яке ву ватсаса, кубикъёсын юдэм картофка, небӟытэм чеснок, тмин, горд пӧсьтурын. Гӧршоке понэм сиён вуэн огкадь мед луоз. Вылаз будэтоно на пӧсьтурын но кульчоосын вандылэм перец. Пароно картофкаез пӧзьытозь. Ӝӧк вылэ пуктон азьын лыме вож турын ватсано.

Пыжем ӵӧж
Кулэ: 1 ӵож, 1 йыр сугон, 1 ӵужкушман, ӝыны стакан горд вина, 2 стакан бульон, 4 пуньы кӧс вӧй, 2 пуньы пызь, 1 чечы пуньы тимьян, 1 пуньы вож укроп, векчи изэм горд пӧсьтурын.

Сугонэз но ӵужкушманэз соломкаослы юдоно. Ӵожез юдэсъёслы люкылоно, пызь пушкы веттылыса, таба вылын пырсатоно зарни тус пыӵатозь. Со табаын ик ӵужкушманэз но сугонэз пырсатоно. Выльысь ваньзэ табае поныса, кӧня ке ву но горд вина ватсаса пичи тыл вылын 40 минут пала пароно.

Татьяна Чернова

Удмурт Дунне
By Удмурт Дунне Февраль 5, 2013 09:31