Дуно котькуд пинал!

Удмурт Дунне
By Удмурт Дунне Февраль 8, 2013 11:46

Дуно котькуд пинал!

Нылпи юртысь пиналъёс витё анай-атайёссэс

Нылпи юртысь пиналъёс витё анай-атайёссэс

Кылем ар пумын Россилэн Президентэз В. Путин сирота кылем но анай-атай шунытэз тодӥсьтэм нылпиослы нимысьтыз юрттон сярысь указ поттӥз.  «Огъя Россия» партия талы соку ик выль проектэн вазиськиз. Туннэ сое эскеро ни улосъёсын, палэнэ уг кыльы Удмуртия.

Кунысьтымы валтӥсь партия дэмла: нылпи юртъёсын, интернатъёсын будӥсь пиналъёсты луэмезъя семьяосы интыяно. Бен, туннэ та уж мынэ, но туж ӝегаса. Угось со понна уно документъёс люкано-дасяно, туж трос дыр кошке. Кылсярысь, нылпиез бордазы басьтыны мылкыд карись анай-атайёслэсь тазалыксэс чакланлы, эмъясьёслэсь кулэ справкаос басьтонлы гинэ ӝыны ар пала кулэ луэ. Со сяна,  толэзь пала ӝегато на югдурез утисьёс — таосыз но чаклало вуоно анай-атайёслэсь «ортчем сюрессэс»: вань-а соослэн пытсэт сьӧры шедьылэмъёссы, судъёстӥ костаськемъёссы, ӧвӧл-а таламын анай-атай луон правозы но мукет. Выль проект дэмла: эмъясьёслы эскеронъёс ортчытыны 3 толэзь но тырмоз, нош югдурез утисьёслы — 10 нунал.
Эшшо: мурт пиналэз асьсэлы карыны дасяськисьёслэсь чурыт кылзэс табере уз юалэ ни улон условиоссы ласянь, нылпи юртъёсысь вузэ пырыны дасяськись егитъёс дунтэк ветлыны быгатозы подготовительной курсъёсы, соосты ӟеч йылпумъямъёслы вузэ пырон понна льготаос тупатӥськозы.

Кун озьы ик ас вылаз басьтыны кулэ сирота нылпиосты эмъянэз, дышетонэз, соослы улон инты висъянэз.

«Огъя Россия» партилэн Удмурт ёзэзлэн секретарез Александр Соловьёв нырысьёсыз пӧлын дурбасьтӥз та проектлы. Кенеше люкаськемъёс азьын со шуиз:

— Мукет улосъёсын ӵошатоно ке, асьме республикамы сокем урод уг адӟиськы: анай-атайтэк кылем нылпиос пӧлысь 81 процентэз приёмной семьяосын быдэ вуо. Озьы ке но вань мар бордын ужаны. Кылсярысь, сиротаослы улон инты чырмытгес висъяно. Та понна выль амалъёсты кутоно. Озьы соослы сётыны луоз Сарапулысь одӥгзэ огъяулонниез.

Бен, соиз но вань: тросэзлэн сирота нылпиослэн ёросъёсысь городэ кошкемзы уг поты. Нош гуртын ӧвӧл анай-атайтэк будэм егитъёслы ярамон улон юртъёс. Мар кароно таӵе учыре? Та ужпумъёсты сэрттон-пертчон вылысь республикаямы кылдытэмын луоз нимысьтыз ужась группа. Со ик чаклалоз, кыӵе ужпумъёслы уката саклык висъяно. Ӵектонъёс вань ини: мурт нылпиез басьтыны мылкыд карисьёслэн юанъёссылы валэктонъёс сётъянъя нимысьтыз центр усьтоно, радъяно оскон телефон но мукет.

Сирота нылпиосын герӟаськем ужпумъёсъя координаторе быръемын Правительстволэн Тӧроезлэн воштӥсез Людмила Чунаева.

Элина Кумачёва
Туспуктэмез: udmfoto.ru

Удмурт Дунне
By Удмурт Дунне Февраль 8, 2013 11:46