Кылбуръёссэ сьӧраз нуиз…

Удмурт Дунне
By Удмурт Дунне Февраль 19, 2013 11:35

Кылбуръёссэ сьӧраз нуиз…

5-19-1Алевтина Аникиналэн кылбуранэз, мон шуысал, Флор Васильевлэн кылбуръёсызлы матын.

«Солэсь пӧрмысал «шыпыт» лирикаез азинтӥсь яркыт кылбурчи». Алевтина Аникина (1938 — 1996) сярысь тазьы вера литературовед Любовь Фёдорова.

Отӥяз валэктэ: 1950-тӥ-1960-тӥ аръёсы нылкышно кылбурасьёс шоры, пе, улӥ быгатонлыкен гожъясьёс шоры кадь учкылӥзы: воргоронлэн суредам дуннеяз бадӟымесь ужпумъёс пуктэмын ке, нылкышнолэн малпанъёсыз, пе, лул-сюлэм пушказ но кышнопал сэрег котырын бергало.

Зэм, критикъёслэн тышкаськемзылы но редакторъёслэн тупатъямъёссылы, со вакытысь мукет нылкышно гожъяськисьёс сямен ик, А. Аникина но сётскиз. Кылбуръёссэ граждан мылкыдо карыны тыршиз, но «куараез ырак ӧз ӧръяськы ни», кужмо лирика визылэз пумен куасьмыны кутскиз…

Тӥни озьы А. Аникина улытозяз одӥг кылбур книга гинэ — «Вераме потэ» (1976) — поттыса вуиз. Нош солэсь азьвыл, 1960-тӥ аръёсы, кылбуръёсыз «Егит сюлэм кырӟа», «Чагыр инбам» но «Ныл сюлэм» огъя бичетъёсын печатласькизы.

Огшоры гинэ но туж сюлмысь потэм кылъёсын гожтэм «Чагыр инмын пишто кизилиос» кылбурез кырӟан луиз (гожтӥз В. Шоркин). Мукет чуръёсыз но кырӟанэ куриськизы: «Я бен, пуксьы, анай, вӧзамы…», «Малы мынам ныл сюлэмам…»

Одӥг гинэ вунонтэм-ӵушонтэм кырӟан яке кылбур ке но гожтэ, авторлэн нимыз кысонтэм ини. Озьы ик А. Аникина но Якшур-Бӧдья, Шаркан палъёслэн данъяськонзы луыса кылиз. 17-тӥ тулыспалэ (шонерзэ — 8-тӥ тулыспалэ) вордскем кылбурчи куарусёнлэн 4-тӥ нуналаз кема висемез бере улонысь кошкиз. Пушказ возем, печатлатэк ӝокатэм кылбуръёссэ ас сьӧраз нуиз.

Татьяна Чернова

Анайлы

Я бен, пуксьы, анай,  вӧзамы,
Тани ваньмы татын кадь туннэ.
Вордӥськем нуналдэ пусйыны
Нылпиед люкаськиз огинэ.

Азвесям йырсидэ ватыны  тыршыса,
Кышеттэ ӝикытак  керттӥськод.
Ымпумтӥд гинэ  пальпотыса,
Янгышам мурт сямен  лулӟиськод.

Туж уно кайгуэз омыртӥд
Тон аслад нылкышно даурад,
Одӥгнад трос нылпи будэтӥд,
Бен, тон ваньзэ ик, ваньзэ чидад.

Я бен, пуксьы, анай, вӧзамы,
Тани ваньмы татын кадь туннэ.
Вордӥськем нуналдэ пусйыны
Нылпиед люкаськиз огинэ.

Тон возьмаськод
Ураме потыкуд,
Капкадэ усьтыкуд,
Учкиськод тон гожтэт ящике:
Возьмаськод, дыр, ивор кинлэсь ке.

Азбаре потыса,
Синъёстэ шундылэсь ватыса,
Учкиськод кыдёке, бамалэ:
Витиськод, дыр, пидэ я нылдэ.

Нош соос кытӥяз вунэто
Гожтэтъёс гожъяны,
Асьсэос но уг берто кема,
Сюлэмыд нош возьма но возьма.

Нылпилэн бен сыӵе ни сямыз,
Весь уг тырмы дырыз,
Я дыртэ кытчы ке,
Я ужез лэсьтоно кыӵе ке.

Я, эн вай тон вождэ,
Туж шудтэм но эн кожа астэ;
Возьманэд мед луоз —
Со одно ик вуоз.
lilia

* * *

«Чигты мыным со лилиез», —
Шуи, сяська шоры возьматыса.
Нош тон кышкад, ӧд пыр вуэ,
Выё, дыр, кожаса.

Ӵуказеяз ӧй вал ни со —
Кин ке но ишкалтэм.
Шорам учкид мӧзмыт тусо,
Паймид, дыр: «Кин меда дӥсьтэм?»

* * *
Чагыр инмын пишто кизилиос,
Вож садъёсын чирдо ӵуж уӵыос.
Кыӵе умой вылэм таӵе дыре,
Кыӵе умой мыным тонэн артэ.

Кема утчай тонэ мон, гажанэ,
Кема утчай, кема возьмай тонэ.
Кыӵе умой, макем умой вылэм,
Куке яратонзэ шедьтэ сюлэм.

Малы меда та уй сокем вакчи?
Шулдыр садысь кошкем уг поты чик.
Пуком, эше, куазь ӟардытозь, пуком,
Гужем уйлэсь куараоссэ кылзом.

* * *
Гажано егит пиос,
Атайёс, дуно картъёс,
Тӥ, кузьым басьтыкуды,
Ма карыны паймиськоды.
«Чыртывесь чебер вылэм,
Вузало чагыр дэрем.
Яралоз меда зундэс?
Кышномуртъёслэсь сямзэс
Валаны секыт уга», —
Куд-огез озьы шуга.
Гажано пиос, картъёс!
Тӥ сокем эн сюлмаське —
Кузьманы быгатӥды ке,
Милемлы ваньмыз кельшоз,
Кышномурт шудо луоз,
Шӧдӥз ке ӟеч мылкыддэс,
Тулыс зор кадь учкемдэс.

Удмурт Дунне
By Удмурт Дунне Февраль 19, 2013 11:35