Кырӟанъёсыз тодэ вайытыло нимзэ

Удмурт Дунне
By Удмурт Дунне Февраль 19, 2013 12:24

Кырӟанъёсыз тодэ вайытыло нимзэ

А. Вотяков

А. Вотяков

1928-тӥ арын 17-тӥ тулыспалэ Дэри ёросысь Подшивал гуртын вордскиз Александр Вотяков.

Капчи но шӧртчи луэмез сое Ижысь крезьгуръя школае вуттӥз, но будонэзлы война люкетӥз. Бӧрысь тырмыт дышетскыны ӧз кылды ни ке но, кылбураны быгатэмез ас вай пушъетъёссэ сётӥз. 1958-тӥ арын кылбуръёсын «Нырысетӥ вамышсэ» поттӥз. Нылпиослы но гожъяз, куинь книгазэ соослы сӥзиз: «Ойдолэ бакчае», «Вить кузя ми» но «Иши». Йыртэмась Иши сярысь мадёнзэ 1981-тӥ арын выжыкыл-пьесаезлы герой кариз на.

Сценаен, газетэн, радиоен эшъяськем мурт серемес кылбуръёс, басняос но пӧрмытъяз, соос «Ӧжытак серекъялом» бичетаз поттэмын. Мукет ласянь, лирика визылэз кужмояса, крезьгурен валчеяськыса, ӧръяськиз.

Кылъёсызъя 200-лэсь уно кырӟанъёс кылдытэмын! Соос пӧлысь «Нэнӥелы» — тужгес тодмоез. Н. Шкляевен но мукет крезьгурчиосын огкылысь ужамез ас емышъёссэ сётӥз, А. Вотяковлэн кырӟан текстъёсыз Удмурт театрлэн трос спектакльёсаз пыризы.

Яратоно Мария кузпалыз кулэм бере, солы сӥзьыса, Александр Дмитриевич 1977-тӥ арын «Оскисько тыныд» книгазэ поттӥз на. 1985-тӥ арын 25-тӥ куарусёнэ секыт висён уретӥз улонзэ.

Татьяна Чернова

arganchiДан тыныд, солдат!

Пичигес сюрес дуре огнад
Кемалась султӥд ни вырйылэ.
Бабылес кызьпу тынад вӧзад
Чебер ныл сямен сылэ,
Йырсизэ пунэ тӧлэн,
Шундыё куазен кырӟа со весь,
Зорыку кисьтэ синвуоссэ.
Тодӥсь мурт вала солэсь
Кайгузэ, малпанъёссэ.
Кыдёкысь, пыдлось, аръёс сьӧрысь
Ми доры вуэ яратонэд.
Шаердэ, солдат, гажад сюлмысь,
Нош шаер — тонэ.
Ялан тон егит.
Тон ӧд быр, шудмес утид…

***
Ӧй пыра мон ӝуась тылэ,
Ӧй кыл ожлэсь гудыръямзэ,
Нош со аръёс пинал пилэсь
Туж вазь сайкатӥзы визьзэ.

Ӝожтэк верам ке но уг лу,
Ми люкиським дышетсконэн,
Пинал кие кутӥм вуж плуг,
Тыршим, мӧйы муртъёс музэн.

Плугмы туж ӵем могӟылӥське
Лӥял но кыз выжы борды.
Ӵошен сое ум вормиське
Кулэ дыръяз вырӟытыны.

Яке тэльын. Лымы — кускозь,
Куазь пелляське — сюрес ӧвӧл.
Валъёс воззэс мырдэм кыско,
Сыӵе дыръя тэльын коть кӧл.

Мар ватонэз, курадӟимы,
Нош чидаммы ӧз лу юнме.
Асьме ӟырдыт уженымы
Ми утимы выль улонмес…

Востэм арганчи

Бер сӥзьыл усем куаръёс
Гуждорез пужыято.
Кылыса арган гурез,
Тупалась нылъёс пото.

Сад улын Ваня ялан
Кырӟаса шудэ арган.
Нош нылъёс со котырын
Кырӟало арган сьӧры.

Арганчи кема шудэ,
Ас дораз бертэ огназ.
Нош нылъёс малы меда
Учкыса кылё бӧрсяз?

Ой, малы меда, малы
Лулскыло чебер нылъёс?
Ой, кинлы меда, кинлы
Арганчи гажан луоз?
Тон ачид востэм ке но,
Арганэд ӧвӧл востэм.
Кыл уд шедьтӥськы ке тон,
Арганэд сюлмез шунтэ.

Пыра на табере!

— Сани, тодскод-а мар?!
— Ӧйтӧд, Макар?
— Пуны басьто мон, юлтоше,
Ведь со адямилэн эшез.

Зэмзэ, одӥг нунал Макар
Пуны вайиз. Кунян выллем.
Куара сётэ — азбар зурка,
Шоре учке — вырӟе сюлэм.

Ваньмон дыръя эше доры
Пырем потоз вал куд-огдыр.
Нош капказяз вуылыса,
Мон кошкылӥ берытскыса.

Ачиз Макар ӝожке ни табере:
Малы ӧд ву, пе, Выль аре,
Ваньмыз эшъёс, шуэ,
берло дыре
Вунэтӥзы дорам сюрес.

— Пырысалмы, — шуи мон Макарлы, —
Но тон кузё ӧвӧл ни со юртлы.
Кузё отын «адямилэн эшез…»
Пуны.

Туспуктэмез: l-pics.livejournal.com

Удмурт Дунне
By Удмурт Дунне Февраль 19, 2013 12:24