Турынэн гинэ тырмыт уз луы!

Удмурт Дунне
By Удмурт Дунне Январь 8, 2013 16:58

Турынэн гинэ тырмыт уз луы!

Ческыт сиёнэз пудо но яратэ

Берло аръёсы кӧс куазь возиськемен, пудо сиёнлэн ӟечлыкез начар. Озьыен, пудоос, витаминъёс тырмытэк, тол ӵоже лябӟыны быгатозы. Но та югдурысь потон амал вань.

Адями мае но уг сиы: емыш,  йӧл, сӥль. Озьы асьмеос кулэ минералъёс но витаминъёс басьтӥськомы, тазалыкмес утиськомы. Пудо но урод сюдэмлэсь пӧртэм висёнъёслы сётскыны кутске. Гужем вож турынысь аслыз ма кулэ, сое шедьтэ. Нош толалтэ кытын ай со вож турын? Зэм, животъёсты нокин уг косы котлетэн но вӧйын сюдыны. Но витаминъёсты тодэ вайылоно.

Пудодылэсь йылэмзэ возьмаськоды ке, одно ик сётъялэ солы А витамин. Сотэк пудо курадӟоз мумы луыны. Кидыс сюриз ке но, пизэ шуген нуллоз. Со ик утьыны юрттэ пудолэсь синъёссэ.  А витамин тырмымтэен, пудо пеймытэн адӟемысь дугдэ. Быгытъёсыз но лябӟо.

А витамин трос йӧлын, курегпуз ӵужын, кешырын, вож турынын, ӟеч силосын.
Д витамин тырмытэк, живот борды кутско рахит, остеодистрофия. Пудо ӟызыя, котьмалэсь курдась луэ. Куд-огез музъем сиыны кутске. Пиньёссы быро. Соин ик сётъяно видехол, видеин, тривитамин, чорыг вӧй кадьёсты.

Пудо пу борддоръёсты я тусез йырйыны-нюлыны кутске ке, тодэ: мугораз калиез уг тырмы. С витамин тырмымтэ дыръя пиньёссы быро. Соин ик пудолы дырын-дырын сётъялэ кыз лыс яке кыз лыслэсь пызь. Лысэз бичалэ кезьыт куазен — урод веществоосыз кезьытэн ичигес кылё. Скал, кылсярысь, со лысэз нуналаз 1-2 килограммен но сиыны дась луоз. Отын уго С витаминэз гинэ ӧвӧл. Лысын каротинэз но трос, со каротин, ӝуше но вире сюрыса, А витамин кылдытэ.

Пудо туж яратэ сылалэн нянез. Таин сое дырын-дырын шумпоттылоно. Мугоразы сылал тырмемысь дугдэ ке, сием потон мылкыдзы пуксе, ӟызыяло, синъёссы пожасько, кузы но гонзы чурытоме. Соин ик сылал комок — лизунец — пудо син азьын котьку мед луоз, нюлӥськемзы потыку, асьсэос сое шедьтозы.

Висись пудодылы пенициллин пуктылӥськоды ке, дугдылэ сётъямысь В витамин — мугоре огдыре сюрыкузы, кыксы но кужымзэс ышто. Е но С витаминъёс кужымзэс ышто, кортэн сураськыса.
Туж ӟеч сиён — чорыглэсь, сӥльлэсь но лылэсь пызь.

Кальций тужгес кулэ скалъёслы, кечъёслы но ыжъёслы. Йӧлзэс кыскыса, мугорысьтызы гылтӥськомы кальциез. Таин валче пыдъёссы лябӟо.

Турын-куар, бакча сиён гинэ ноку тырмыт уз луэ. Али вузасько «Золотой белок», «Золотой фелуцен» нимо концентратъёс. Татын микроэлементъёсыз но, витаминъёсыз но тачак, дунзы но зол уг куртчылӥськы. Пайдаез но шӧдскымон.

Екатерина
Михеева,
пудо эмъян наукаосъя
кандидат

Удмурт Дунне
By Удмурт Дунне Январь 8, 2013 16:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment

Your e-mail address will not be published.
Required fields are marked*