Тон огнад ӧвӧл, Мики!

Удмурт Дунне
By Удмурт Дунне Январь 10, 2013 09:51

Тон огнад ӧвӧл, Мики!

суредаз В. Дерюгин

Верос

Мамык лымы, каллен бергаса, пеймыт инмысь усе кынмем музъем вылэ. Ӝоген вуоз Выль ар. Коркаосын сыло ни чеберъям кызъёс, анайёс нылпиоссылы вуро Выль ар костюмъёс. Пиналъёс Тол бабайлы гожтэтъёс гожъяло. Кин ке куре мунё, кин ке велик, кудӥз но соиз — кучапи яке писэйпи. Нош Мики, бам вылтӥз васькись синкылизэ ӵушылыса, Тол бабайлэсь шуд куриз.

Тазэ Выль арез пияш пумиталоз огназ, тодмотэм нылпиос пӧлын, нылпи юртын. Вӧзаз уз луэ ни анай-атаез, яратоно Мани сузэрез. Куать аресъем пилэсь матысь адямиоссэ лек тылпу басьтӥз. Пичи сузэрез гинэ вань на, но со мукет нылпи юртын. Кытынзэ Мики уг тоды.

Нош кыӵе шудо вал пияш кӧня ке дыр талэсь азьло. Небыт киыныз маялляса, ӵукна сое сайкатылӥз анаез. Атаез сьӧры ветлылӥз нюлэскы пу дасямзэ адӟыны. Уката ик яратылӥз со пичи сузэреныз шудылыны!
***
Огаз уе Мики сайказ ӵын зынлэсь. Сое но Маниез атайзы, кияз кутыса, чалякгес ураме поттӥз, собере выльысь пыриз лек тылын ӝуась коркась анайзэс поттыны. Кема возьмаз Мики потэмзэс. Ӵукнапал веразы: анай-атайзэс соос ноку но уз ни адӟе.

Гуртазы ик улӥсь Онись кенаксы пумит луиз нылпиосты бордаз басьтыны. Микиез но Маниез пӧртэм нылпи юртъёсы келязы. Котьку но мынь потӥсь пияшлэн синъёсыз со дырысен ӧз ни куасьмылэ. Уйзэ изьытэк, бӧрдыса потылӥз, анайзэ, атайзэ но сузэрзэ тодаз вайыса.

Небыт анай киос уг ни сайкато Микиез. Ма, солэн аслаз но султэмез уг поты. Нош ик исалозы мукет нылпиос. Кӧня мыскыллязы ни ӟуч кылэз тодымтэеныз. Комнатаяз пырыса, ӝожомем пияш кема кисьтылӥз синвузэ. Огпол Микилэсь бӧрдэмзэ адӟиз нылпи юртлэн директорез Валентина Михайловна.

— Мики, мар-о луиз? — жингырес куараеныз юаз со пияшлэсь.
— Маниелэсь мӧзмисько… — викыштӥз Мики.
Пинал кышномуртлэн сюлмыз ӧз чида, Микиез ӟыгыртыса, ачиз но бӧрдыны ӧдъяз.

***
Нуназе бере нылпиос ульчае шутэтскыны потӥзы. Кин бызьылӥз, кин лымы мунё лэсьтӥз. Мики гинэ палэнын учкыса сылӥз. Нокин сое бордаз ӧз ӧтьы. Йырзэ ошыса, Мики каллен вамыштӥз юртсы пала. Нош мар со? Кин ке пияшлэн пыд бордаз ӝиптӥськиз? Берыктӥськиз но — Шарик пуныез. Шумпотэменыз тэтча, бызьылэ Мики котыртӥ. Кызьы Шарикез сое гуртэзлэсь кызь иськемысь шедьтэм?

Кӧтыз сюмамен, мугорыз ик пичи кылем, сьӧд чилясь гонэз тугаськем. Пичи пи сое ӟыгыртӥз но шумпотэменыз зар-зар бӧрдыны ӧдъяз. Нош соиз шораз учке но юа кадь: «Кытын бон Мани?»
— Мани татын ӧвӧл, Шарик. Кытынзэ уг тодӥськы. Табере тон гинэ мынам вань на, эн кошкы, ява, — ӟыгыртӥз Мики пунызэ.

Ӝыт сиёнзэ пияш лушкемен поттӥз пуныезлы. Та уе со капчиен умме усиз. Нош уйвӧтаз анай-атайзэ адӟиз. Бызе кадь со пумитазы, но нокызьы доразы уг вуы. «Анай! Атай! Эн кошке! Эн кельтэ монэ»! — куаляк потыса, Мики сайказ. Шуныт шобретаз йырыныз ик биниськыса, со нош синвуаськиз.

Ӵукназэ пияшез сайкатӥз Валентина Михайловна. Пыктылэм синъёссэ адӟыса, кивалтӥсьлэн аслаз но бам кузяз синкыли шапыкъёс васькизы. Мики бызьыса султӥз но укное учкиз: отын сое нокин уг возьма.

— Кытын мынам Шарике? — юаз со Валентина Михайловналэсь.
— Со табере анаед но атаед дорын, Мики. Та уе туж кезьыт вал, кынмем, мискинь.
— Табере мон воксё огнам кыли… — синкыли пыр шыпыртӥз пияш.

Валентина Михайловна Микилэсь йырзэ маялтӥз но небытак вазиз:
— Тон огнад ӧвӧл, Мики. Дӥськуттэ бича, мон ӝоген вуо.

Мики, марзэ созэ валатэк, арбериоссэ сумкаяз тырыны кутскиз. Кема ик дыр ӧз ортчы, Валентина Михайловна ки вылаз пичи нылашен пыриз. Мики соку ик тодмаз Мани сузэрзэ.

— Мани! — шумпотыса со пичи ныл борды ӝиптӥськиз. — Мани, кыӵе зол мӧзми мон тынэсьтыд!

Куинь аресъем пичи ныл, «дяди» шуыса, ачиз но юн-юн ӟыгыртӥськиз Мики борды.
Со нуналэ Валентина Михайловна нылпиосты дораз нуиз.

***
Выль арозь одӥг час кылиз на. Микилэн вӧзаз выль анаез но яратоно Мани сузэрез. Корка тыр лӧсъяське кыз зын. Кыз улысь коробкаын шуак ӵаштыртэм куара кылӥськиз.
— Мар со? — паймиз Мики.

Валентина Михайловна мыняса вазиз:
— Учкы ук, пие, кинэз вань отын.
Мики дӥсьтытэк усьтӥз коробкаез, нош отын — пичи кучапи.
— Шарик, анай, Шарик! — кеськиз Мани.
— Ура, табере асьмелэн Шарикмы но вань, — шумпотэмзэ ватэмез ӧз луы пияшлэн. Собере

Валентина Михайловналы шуиз:
— Тау, анай.

Изён азяз Мики укно пала берыктӥськиз но шыпыртӥз:
— Тол бабай, мон туж шудо: мынам зэмос семьяе вань!

Анна Бурдина,
Алнаш ёросысь Муважи школаысь 10-тӥ классын дышетскись

Туспуктэмез : www.portrets.ru

Удмурт Дунне
By Удмурт Дунне Январь 10, 2013 09:51