Тӧлӟем сяська

Удмурт Дунне
By Удмурт Дунне Январь 22, 2013 10:25

Тӧлӟем сяська

О. Данилова

О. Данилова

Эссе

— Котькуд ӵукна султыса синучкон азьын сылӥськод. Ымнырысьтыд кисыриоссэ учкиськод, бездэм йырсидэ маялтӥськод. Учкымон ӧвӧл ни. Сяськаяськись вакытад отчы но татчы мынӥськод вал. Пиосмуртъёсыд вӧзысьтыд ӧз ик бырылэ. Валес вылысь, вылды, озьы шуд утчад тон? Сюлэмы вандэм кадь вӧсь луэ. Кызьы озьы астэ уд гажа? Кин атае, тон али но вераны ӧй шедьтысалыд, дыр. Ышид та улонын. Монэ но ыштӥд…

Укыр тон капчи адями вылэм. Пинал мылкыд — юмал йӧлпыд шуыса, шулдыръяськыса ветлӥд. Соин ик тушмон муртлы кидэ но сётӥд.

Мон адями вал ини. Кык киы, пыды, пельы, сьӧд йырсие… Кызьы ки но љутскыны кулэ виыны сыӵе пичи муртэз? Кыӵе мыным кышкыт вал, куке мон доры кыстӥськиз кыӵе ке тодмотэм но йӧспӧртэм арбери. Мон кеськи, вань кужмысьтым кеськи, нош тон ӧд кылы. Мон тыныд кулэ ӧй вал. Убиръёслы сётӥд. Ӧд яраты монэ, ӧд жаля. Кылдымтэ тыныд «анай» шуэмез кылыны, адӟыны нырысетӥ вамышъёсме, синвуосме небыт киосыныд ӵушалтыны.

Мыным туэ 18 арес тырмысал. Туннэ, шорад учкыса, чаклай: ымнырад вакытэзлэсь вазь кисыриос потэмын. Синучкон азе но мылпоттэк вамыштӥд. Кофта улад миндэр понӥд. Мыньпотӥд. Синвуостэ лушкем ӵушылӥд, кинлэсь ке ватскыса кадь. Нокинлэсь ватскыны. Огнад.
Улон тулкым тонэ шелепез кадь зӥръяз. Шуг-секытъёсын нюръяськемед ӧз поты. Ӧй но учкысалыд ке, анай, озьы ик будысал мон. Будысал сюрес дурысь жаг турын кадь. Тышкаськысал ке но монэ, мон тодысал: яратыса тон озьы.

— 18 арес. Вождэ эн вай. Аслам кужымелы ӧй оскы. Малпай, ортчиз, кошкиз — жаль ӧвӧл, азьпалан дыръёс ӟеч луозы. Егит дыръям ойдо юмшало. Янгыш малпанэн улӥськем. Мӧйымемъя валасько ни: адями шудзэ ас кияз возе, нош мынамез тон киын вылэм. Котькуд уйвӧтам тонэ адӟисько. Кышканэн пачылам синъёстэ.

— Я, эн, эн бӧрды ортчемез понна, анай. Бездэм дэремез выль уд кары ни. Нош тӧлӟем сяська выльысь уз сяськаяськы ни.

Ольга Данилова

Удмурт Дунне
By Удмурт Дунне Январь 22, 2013 10:25